ആള്‍ക്കൂട്ടക്കൊല നീതിയോട് ചെയ്യുന്നത്, സെന്‍സര്‍ഷിപ്പിനെതിരെ ആഞ്ഞടിച്ച് മുരളി ഗോപി

സിനിമയിലെ സര്‍ഗാത്മകതയ്ക്ക് മേല്‍ സെന്‍സര്‍ ബോര്‍ഡ് നടത്തുന്ന ഇടപെടലുകള്‍ക്കെതിരെ അതിരൂക്ഷമായ വിമര്‍ശനവുമായി നടനും തിരക്കഥാകൃത്തുമായ മുരളി ഗോപി രംഗത്ത്. ‘ജാനകി വേഴ്‌സസ് സ്റ്റേറ്റ് ഓഫ് കേരള’ എന്ന സിനിമയുടെ പേര് മാറ്റാനും സംഭാഷണങ്ങള്‍ ഒഴിവാക്കാനും സെന്‍സര്‍ ബോര്‍ഡ് നിര്‍ദ്ദേശിക്കുകയും, നിര്‍മ്മാതാക്കള്‍ അത് അംഗീകരിക്കുകയും ചെയ്ത സാഹചര്യത്തിലാണ് മുരളി ഗോപിയുടെ പ്രതികരണം.

‘ആള്‍ക്കൂട്ടക്കൊല നീതിയോട് എന്താണോ ചെയ്യുന്നത്, അതാണ് സെന്‍സര്‍ഷിപ്പ് കലയോട് ചെയ്യുന്നത്’ എന്ന വിഖ്യാത അമേരിക്കന്‍ ചിന്തകന്‍ ഹെന്റി ലൂയിസ് ഗേറ്റ്‌സ് ജൂനിയറിന്റെ വാക്കുകളാണ് അദ്ദേഹം ഫേസ്ബുക്കില്‍ പങ്കുവെച്ചത്. കലയ്ക്കുനേരെയുള്ള കടന്നുകയറ്റത്തെ നീതിയുടെ കൊലപാതകത്തോട് ഉപമിച്ച മുരളി ഗോപിയുടെ പോസ്റ്റിന് വലിയ സ്വീകാര്യതയാണ് സാമൂഹിക മാധ്യമങ്ങളില്‍ ലഭിച്ചത്. ഇതൊരു ഗംഭീരമായ രാഷ്ട്രീയ പ്രസ്താവനയാണെന്ന് പലരും കമന്റുകളിലൂടെ അഭിപ്രായപ്പെട്ടു.

‘ജാനകി’ എന്ന പേര് രാമായണത്തിലെ സീതയെ ഓര്‍മ്മിപ്പിക്കുന്നുവെന്നും അതിനാല്‍ മതവികാരം വ്രണപ്പെടുത്തുമെന്നുമുള്ള വിചിത്രമായ വാദം ഉന്നയിച്ചാണ് സെന്‍സര്‍ ബോര്‍ഡ് ചിത്രത്തിന് പ്രദര്‍ശനാനുമതി നിഷേധിച്ചത്. ഇതേത്തുടര്‍ന്ന് നിര്‍മ്മാതാക്കള്‍ ഹൈക്കോടതിയെ സമീപിച്ചിരുന്നു. ഒടുവില്‍, ‘ജാനകി’ എന്ന പേര് ‘ജാനകി വി.’ എന്ന് മാറ്റാനും ചില സംഭാഷണങ്ങള്‍ ഒഴിവാക്കാനും നിര്‍മ്മാതാക്കള്‍ സമ്മതിക്കുകയായിരുന്നു.

മുന്‍പ് മുരളി ഗോപി തന്നെ രചന നിര്‍വഹിച്ച ‘ഘ2: എമ്പുരാന്‍’ എന്ന മോഹന്‍ലാല്‍ ചിത്രവും സമാനമായ വിവാദങ്ങളില്‍ അകപ്പെട്ടിരുന്നു. ഗുജറാത്ത് കലാപവുമായി ബന്ധപ്പെട്ട ചില സൂചനകള്‍ ചിത്രത്തിലുണ്ടെന്ന് ആരോപിച്ച് സംഘപരിവാര്‍ രംഗത്തുവന്നതോടെ, കഥാപാത്രത്തിന്റെ പേര് മാറ്റുന്നതടക്കമുള്ള തിരുത്തലുകള്‍ക്ക് അണിയറക്കാര്‍ നിര്‍ബന്ധിതരായിരുന്നു. എന്നാല്‍ അന്ന് ഈ വിഷയത്തില്‍ മുരളി ഗോപി പ്രതികരിച്ചിരുന്നില്ല. ഇപ്പോള്‍ അദ്ദേഹം നടത്തിയ പ്രതികരണം അതുകൊണ്ടുതന്നെ കൂടുതല്‍ ശ്രദ്ധ നേടുന്നു.