യു.പിയിൽ ആർ.എസ്.എസ് നേതാവിനേയും കുടുംബത്തേയും വെടിവെച്ച് കൊന്നു

ലഖ്നോവിൽ പട്ടാപ്പകൽ നടന്ന വെടിവെപ്പിൽ ആർ.എസ്.എസ് നേതാവും രണ്ട് കുടുംബാംഗങ്ങളും കൊല്ലപ്പെട്ടു. ആർ.എസ്.എസ് പടിഞ്ഞാറൻ ലഖ്നോ ഭാഗത്തെ മുൻ സഹ-ജില്ല കാര്യവാഹും വൈദ്യുതി വകുപ്പിൽ നിന്ന് വിരമിച്ചയാളുമായ ശിവാജി തിവാരി (65), മകൻ സുയശ് തിവാരി, സഹോദരൻ ശിവേന്ദ്ര തിവാരി (55) എന്നിവരാണ് ദാരുണമായി കൊല്ലപ്പെട്ടത്.

ലഖ്നോവിലെ സആദത്‌ ഗഞ്ചിലെ നവ ബസ്തി പ്രദേശത്തെ ബ്രാഹ്മണി ടോളയിൽ ക്ഷേത്രത്തിന് സമീപം വെച്ചാണ് ഈ ആക്രമണം നടന്നത്. കാർ പാർക്ക് ചെയ്യുന്നതുമായി ബന്ധപ്പെട്ട് അയൽവാസിയായ ഋഷഭ് ശുക്ലയുമായി ശിവാജി തിവാരിയും കുടുംബവും തർക്കത്തിൽ ഏർപ്പെട്ടിരുന്നു. ഈ മുൻവൈരാഗ്യവും തർക്കവുമാണ് പിന്നീട് കൊലപാതകത്തിൽ കലാശിച്ചത്.

 തർക്കത്തിനിടയിൽ പ്രതിയായ ഋഷഭ് ശുക്ല വീട്ടിൽനിന്ന് പിസ്റ്റൾ കൊണ്ടുവന്ന് ഇവർക്ക് നേരെ വെടിയുതിർക്കുകയായിരുന്നു. വെടിയേറ്റ ശിവാജി തിവാരിയും മകൻ സുയശ് തിവാരിയും സംഭവസ്ഥലത്തുവെച്ചുതന്നെ മരണപ്പെട്ടു. ഗുരുതരമായി പരിക്കേറ്റ് ആശുപത്രിയിൽ ചികിത്സയിലായിരുന്ന സഹോദരൻ ശിവേന്ദ്ര തിവാരിയും പിന്നീട് മരണത്തിന് കീഴടങ്ങി.

സംഭവത്തെ തുടർന്ന് പ്രതിയായ ഋഷഭ് ശുക്ലയെ പൊലീസ് ഉടൻതന്നെ അറസ്റ്റ് ചെയ്യുകയും കൊലപാതകത്തിന് ഉപയോഗിച്ച പിസ്റ്റൾ പിടിച്ചെടുക്കുകയും ചെയ്തിട്ടുണ്ട്. ഇരു കുടുംബങ്ങൾക്കുമിടയിൽ നേരത്തെയും തർക്കങ്ങൾ നിലനിന്നിരുന്നുവെന്ന് പൊലീസ് വ്യക്തമാക്കിയിട്ടുണ്ട്. നിലവിൽ പ്രദേശത്ത് സംഘർഷാവസ്ഥ നിലനിൽക്കുന്നതിനാൽ മുൻകരുതലിന്റെ ഭാഗമായി അധിക പൊലീസ് സേനയെ സ്ഥലത്ത് വിന്യസിച്ചിട്ടുണ്ട്.