കെ.ജി.എഫിലെ കാസിം ചാച്ച; കന്നഡ നടൻ ഹരീഷ് റായ് അന്തരിച്ചു

പ്രശസ്ത നടൻ ഹരീഷ് റായ് (55) അന്തരിച്ചു. ദീർഘനാളായി കാൻസർ രോഗബാധിതനായിരുന്ന അദ്ദേഹം വ്യാഴാഴ്ച ബെംഗളൂരുവിലെ കിഡ്‌വായ് ആശുപത്രിയിൽ വെച്ചാണ് മരണത്തിന് കീഴടങ്ങിയത്.

കന്നഡ സിനിമയുടെ സുവർണ കാലഘട്ടത്തിലാണ് ഹരീഷ് റായ് തൻ്റെ സിനിമാ ജീവിതം ആരംഭിച്ചത്, തൊണ്ണൂറുകളിൽ സൂപ്പർഹിറ്റായ ‘ഓം’ എന്ന ചിത്രത്തിലെ ഡോൺ റോയി എന്ന കഥാപാത്രത്തിലൂടെയാണ് അദ്ദേഹം പ്രശസ്തനായത്. ഈ കഥാപാത്രത്തിന്റെ പേര് അദ്ദേഹം പിന്നീട് സ്വന്തം പേരിനൊപ്പം ചേർക്കുകയും ചെയ്തു.

‘ഓം’ എന്ന ചിത്രത്തിനുശേഷം തമിഴ്, കന്നഡ സിനിമകളിലായി അദ്ദേഹം നിരവധി വൈവിധ്യമാർന്ന വേഷങ്ങൾ കൈകാര്യം ചെയ്യുകയും വെള്ളിത്തിരയിൽ തന്റേതായ ഒരിടം കണ്ടെത്തുകയും ചെയ്തു. ഏതു വേഷമായാലും തൻ്റെ സ്വാഭാവികമായ അഭിനയത്തിലൂടെ അദ്ദേഹം ആ കഥാപാത്രങ്ങളെ അവിസ്മരണീയമാക്കി. വില്ലൻ വേഷങ്ങളിലൂടെയും അദ്ദേഹം പ്രേക്ഷക ശ്രദ്ധ നേടിയിരുന്നു.

എന്നാൽ, അന്താരാഷ്ട്ര തലത്തിൽ ഉൾപ്പെടെ അദ്ദേഹത്തിന് ഏറ്റവും കൂടുതൽ പ്രശസ്തി നേടിക്കൊടുത്തത് സൂപ്പർതാരം യഷ് നായകനായ കന്നഡ ബ്ലോക്ക്ബസ്റ്റർ ചിത്രമായ ‘കെ.ജി.എഫ്’ സീരീസിലെ കാസിം ചാച്ച എന്ന കഥാപാത്രമാണ്. ഈ ശക്തമായ പ്രകടനം കന്നഡയ്ക്ക് പുറത്തുള്ള പ്രേക്ഷകർക്കിടയിലും അദ്ദേഹത്തിന് വലിയ ആരാധകരെ നേടിക്കൊടുത്തു.

തൻ്റെ ജീവിതത്തിൻ്റെ പകുതിയിലധികം സിനിമാലോകത്ത് സജീവമായിരുന്ന ഹരീഷ് റായിയുടെ വിയോഗം കന്നഡ ചലച്ചിത്രമേഖലയ്ക്ക് നികത്താനാവാത്ത വിടവാണ് സൃഷ്ടിച്ചിരിക്കുന്നത്. അദ്ദേഹത്തിൻ്റെ മരണം സിനിമാ മേഖലയിലും ആരാധകർക്കിടയിലും അഗാധമായ ദുഃഖം ഉണ്ടാക്കിയിരിക്കുകയാണ്.