കാസ്റ്റിങ് കൗച്ചിനെതിരെ ശക്തമായ നടപടി വേണം, സിനിമാനയത്തിന്റെ കരട് രേഖ പുറത്ത്

തിരുവനന്തപുരം: സിനിമാരംഗത്തെ ലൈംഗിക ചൂഷണങ്ങൾ തടയാൻ കർശന നടപടികൾ നിർദേശിച്ചുകൊണ്ടുള്ള സിനിമാ നയത്തിന്റെ കരട് രേഖ പുറത്തുവന്നു. കാസ്റ്റിങ് കൗച്ച് ഉൾപ്പെടെയുള്ള ചൂഷണങ്ങളിൽ ഏർപ്പെടുന്നവരെ ബ്ലാക്ക്‌ലിസ്റ്റ് ചെയ്യണമെന്നാണ് കരട് രേഖയിലെ പ്രധാന നിർദേശം. കാസ്റ്റിങ് കൗച്ച് നടത്തുന്നവരെ സിനിമയിൽ നിന്ന് വിലക്കാനുള്ള നിയമപരമായ മാർഗങ്ങൾ കൊണ്ടുവരണം. ഓഡിഷനുകൾക്ക് ഏകീകൃതവും സുതാര്യവുമായ ഒരു പ്രോട്ടോക്കോൾ ഏർപ്പെടുത്തണം. സിനിമയുടെ ചിത്രീകരണ സ്ഥലങ്ങളിൽ സ്ത്രീകളും ലൈംഗിക ന്യൂനപക്ഷങ്ങളും നേരിടുന്ന വെല്ലുവിളികൾക്ക് പരിഹാരം കാണണം. ജോലിസ്ഥലത്തെ ലൈംഗികാതിക്രമം തടയുന്നതിനുള്ള POSH നിയമം കർശനമായി നടപ്പാക്കണം.

സിനിമാമേഖലയിൽ എല്ലാ വിഭാഗം ജീവനക്കാർക്കും ബാധകമായ ഒരു ഏകീകൃത പെരുമാറ്റച്ചട്ടം കൊണ്ടുവരണം. ശുചിമുറി, വിശ്രമമുറി എന്നിവയുൾപ്പെടെയുള്ള അടിസ്ഥാന സൗകര്യങ്ങൾ സിനിമാ സെറ്റുകളിൽ ഉറപ്പാക്കണം. ചിത്രീകരണ സ്ഥലങ്ങളിലെ ലഹരി ഉപയോഗം തടയാൻ കർശനമായ നടപടികൾ സ്വീകരിക്കണം. കരട് രേഖയിലെ നിർദേശങ്ങൾ സിനിമാ മേഖലയിലെ പ്രശ്നങ്ങൾക്ക് പരിഹാരമാകുമെന്നാണ് പ്രതീക്ഷ.