ബെറ്റിങ് ആപ്പുകളെ പ്രൊമോട്ട് ചെയ്തു പ്രകാശ് രാജ്, വിജയ് ദേവരകൊണ്ട, റാണ ദഗ്ഗുബാട്ടി എന്നിവർക്കെതിരെയാണ് കേസ്

അനധികൃത ഓൺലൈൻ ബെറ്റിങ് ആപ്പുകൾ പ്രോത്സാഹിപ്പിച്ചതിന് പ്രമുഖ നടന്മാരായ പ്രകാശ് രാജ്, വിജയ് ദേവരകൊണ്ട, റാണ ദഗ്ഗുബാട്ടി എന്നിവരുൾപ്പെടെ 29 സെലിബ്രിറ്റികൾക്കും സോഷ്യൽ മീഡിയ ഇൻഫ്ലുവൻസർമാർക്കുമെതിരെ എൻഫോഴ്സ്മെൻ്റ് ഡയറക്ടറേറ്റ് (ഇ.ഡി.) മണി ലോണ്ടറിംഗ് കേസ് രജിസ്റ്റർ ചെയ്തു. തെലങ്കാന, ആന്ധ്രാപ്രദേശ് സംസ്ഥാനങ്ങളിലെ പോലീസ് രജിസ്റ്റർ ചെയ്ത അഞ്ച് എഫ്.ഐ.ആറുകളുടെ അടിസ്ഥാനത്തിലാണ് ഇ.ഡി.യുടെ നടപടി.

വിജയ് ദേവരകൊണ്ട, റാണ ദഗ്ഗുബാട്ടി, പ്രകാശ് രാജ് എന്നിവരെ കൂടാതെ മഞ്ചു ലക്ഷ്മി, നിധി അഗർവാൾ, പ്രണിത സുഭാഷ്, അനന്യ നാഗല്ല, ടി.വി. അവതാരക ശ്രീമുഖി, ഹർഷ സായി, ‘ലോക്കൽ ബോയ് നാനി’ യൂട്യൂബ് ചാനലിൻ്റെ അണിയറ പ്രവർത്തകർ തുടങ്ങിയവരും പ്രതിപ്പട്ടികയിലുണ്ട്.

Junglee Rummy, JeetWin, Lotus365 തുടങ്ങിയ ഓൺലൈൻ ബെറ്റിങ് പ്ലാറ്റ്‌ഫോമുകൾക്ക് വേണ്ടി ഈ പ്രമുഖർ പണം വാങ്ങി പരസ്യം ചെയ്തെന്നും, ഇതുവഴി കോടിക്കണക്കിന് രൂപയുടെ അനധികൃത വരുമാനം ഉണ്ടാക്കിയെന്നുമാണ് ഇ.ഡി.യുടെ കണ്ടെത്തൽ. ഈ പണമിടപാടുകൾ കള്ളപ്പണം വെളുപ്പിക്കലുമായി ബന്ധപ്പെട്ടതാണെന്നും ഇ.ഡി. സംശയിക്കുന്നു.

ഈ വ്യക്തികളുടെ സാമ്പത്തിക ഇടപാടുകളും ഡിജിറ്റൽ പാതകളും ഇ.ഡി. നിലവിൽ പരിശോധിച്ചുവരികയാണ്. കൂടുതൽ അന്വേഷണം നടന്നുവരികയാണെന്നും, പ്രതികളുടെ മൊഴിയെടുത്ത ശേഷം കുറ്റപത്രം സമർപ്പിക്കുമെന്നും അധികൃതർ അറിയിച്ചു.

തങ്ങൾ നിയമപരമായി അനുമതിയുള്ള ഗെയിമിംഗ് പ്ലാറ്റ്‌ഫോമുകളെയാണ് പ്രോത്സാഹിപ്പിച്ചതെന്നും, നിയമവിരുദ്ധമായ പ്രവർത്തനങ്ങളെക്കുറിച്ച്അ റിവുണ്ടായിരുന്നില്ലെന്നും വ്യക്തമാക്കിയിട്ടുണ്ട്.

പ്രകാശ് രാജ് 2016-ൽ ഒരു ഗെയിമിംഗ് ആപ്പിന് വേണ്ടി പരസ്യം ചെയ്തിരുന്നെന്നും, എന്നാൽ അനുചിതമാണെന്ന് മനസ്സിലാക്കിയപ്പോൾ 2017-ൽ കരാർ അവസാനിപ്പിച്ചെന്നും അറിയിച്ചു. റാണ ദഗ്ഗുബാട്ടിയും തൻ്റെ കരാർ 2017-ൽ അവസാനിച്ചതായി വ്യക്തമാക്കി.