കുൽഗാമിൽ ഭീകരരുമായുള്ള ഏറ്റുമുട്ടലിൽ രണ്ട് സൈനികർക്ക് വീരമൃത്യു

ജമ്മു-കശ്മീരിലെ കുൽഗാം ജില്ലയിൽ ഭീകരരുമായി നടന്ന ഏറ്റുമുട്ടലിൽ രണ്ട് സൈനികർക്ക് വീരമൃത്യു. ‘ഓപ്പറേഷൻ അഖൽ’ എന്ന് പേരിട്ടിരിക്കുന്ന ഈ സൈനിക നടപടി ഒമ്പതാം ദിവസത്തിലേക്ക് കടന്നു. ഏറ്റുമുട്ടലിൽ രണ്ട് ഭീകരരെയും വധിച്ചതായി സൈന്യം സ്ഥിരീകരിച്ചു. ഭീകരരുടെ സാന്നിധ്യമുണ്ടെന്ന രഹസ്യവിവരത്തെ തുടർന്ന് അഖൽ വനമേഖലയിൽ സുരക്ഷാസേന നടത്തിയ തിരച്ചിലിനിടെയാണ് ഏറ്റുമുട്ടൽ ആരംഭിച്ചത്. ലാൻസ് നായിക് പ്രിത്പാൽ സിംഗ്, ഹർമിന്ദർ സിംഗ് എന്നിവരാണ് വീരമൃത്യു വരിച്ച സൈനികർ. ഇവരുടെ ധീരമായ ത്യാഗത്തിന് ചൈനാർ കോർപ്സ് ആദരാഞ്ജലികൾ അർപ്പിച്ചു. കൂടുതൽ ഭീകരർക്കായി സൈന്യം തിരച്ചിൽ തുടരുകയാണ്. ഓപ്പറേഷന്റെ പുരോഗതി ഉന്നത ഉദ്യോഗസ്ഥർ നിരീക്ഷിച്ചുവരുന്നു.