റോഡുകളില്‍ നിന്ന് തെരുവുനായകളെ ഉടന്‍ മാറ്റണം, സുപ്രധാന ഉത്തരവുമായി സുപ്രിം കോടതി

തെരുവ് നായകളുടെ വിഷയത്തിൽ സുപ്രീം കോടതിയിൽ നിന്നും സുപ്രധാനമായ ഇടക്കാല ഉത്തരവ്. പൊതുസ്ഥലങ്ങളിൽ നിന്നും, പ്രത്യേകിച്ച് സ്കൂളുകൾ, ആശുപത്രികൾ, ബസ് സ്റ്റാൻഡുകൾ തുടങ്ങിയ സ്ഥാപനങ്ങളുടെ പരിസരങ്ങളിൽ നിന്നും തെരുവ് നായകളെ പൂർണ്ണമായും മാറ്റണമെന്ന് കോടതി നിർദ്ദേശിച്ചു. ഈ വിഷയത്തിൽ കോടതി സ്വമേധയാ (Suo Motu) സ്വീകരിച്ച കേസിലാണ് നിർണായകമായ ഈ ഉത്തരവുണ്ടായിരിക്കുന്നത്.

ദേശീയപാതകളിൽനിന്നും പൊതു റോഡുകളിൽനിന്നും തെരുവ് നായകളെയും കന്നുകാലികളെയും മാറ്റാൻ ഉടനടി നടപടി സ്വീകരിക്കണമെന്നും കോടതി ആവശ്യപ്പെട്ടു. ഇതിനായി സംസ്ഥാന സർക്കാരുകളും ദേശീയപാത അതോറിറ്റികളും ചേർന്ന് പദ്ധതികൾ ആസൂത്രണം ചെയ്ത് നടപ്പിലാക്കണം. തെരുവ് നായകളുടെ സാന്നിധ്യം പൊതുജനങ്ങൾക്ക്, പ്രത്യേകിച്ച് കുട്ടികൾക്ക് സുരക്ഷാ ഭീഷണിയാകുന്ന സാഹചര്യങ്ങൾ ഒഴിവാക്കുകയാണ് ഉത്തരവിന്റെ പ്രധാന ലക്ഷ്യം.

പൊതുസ്ഥലങ്ങളിലെ സുരക്ഷ ഉറപ്പാക്കുന്നതിന്റെ ഭാഗമായി, പിടികൂടുന്ന നായകളെ വീണ്ടും പൊതുവിടങ്ങളിൽ തുറന്നുവിടരുത് എന്നും കോടതി കർശന നിർദ്ദേശം നൽകി. വിദ്യാഭ്യാസ സ്ഥാപനങ്ങളുടെ പരിസരങ്ങളിൽ നായകൾ പ്രവേശിക്കാതിരിക്കാൻ ഫെൻസിങ് അടക്കമുള്ള സുരക്ഷാ ക്രമീകരണങ്ങൾ ഉറപ്പാക്കണം. കൂടാതെ, രാത്രികാലങ്ങളിൽ ഉൾപ്പെടെ സുരക്ഷ ഉറപ്പുവരുത്തുന്നതിനായി പട്രോളിങ് നടത്തണമെന്നും കോടതി നിർദേശിച്ചു.

സുപ്രീം കോടതിയുടെ ഈ നിർദ്ദേശങ്ങൾ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ചീഫ് സെക്രട്ടറിമാർ കർശനമായി പാലിക്കുന്നുണ്ടെന്ന് ഉറപ്പുവരുത്തണം. ഉത്തരവുകൾ നടപ്പിലാക്കാത്തപക്ഷം ബന്ധപ്പെട്ട ഉദ്യോഗസ്ഥർ ഉത്തരവാദികൾ ആയിരിക്കും എന്നും കോടതി വ്യക്തമാക്കി. നിർദ്ദേശങ്ങൾ നടപ്പിലാക്കുന്നതിനുള്ള വിശദമായ പദ്ധതികളും തൽസ്ഥിതി റിപ്പോർട്ടും 8 ആഴ്ചയ്ക്കുള്ളിൽ സുപ്രീം കോടതിയിൽ സമർപ്പിക്കണമെന്നും ഇടക്കാല ഉത്തരവിൽ ആവശ്യപ്പെട്ടിട്ടുണ്ട്.