ടോള്‍ പ്ലാസയില്‍ സൈനികന് ക്രൂരമര്‍ദനം; ആറുപേര്‍ അറസ്റ്റില്‍, ഓപ്പറേറ്റര്‍ക്ക് 20 ലക്ഷം രൂപ പിഴ; അപലപിച്ച് സൈന്യം

ഉത്തര്‍പ്രദേശിലെ മീററ്റ് ജില്ലയില്‍ അവധി കഴിഞ്ഞ് ജോലിസ്ഥലത്തേക്ക് മടങ്ങുകയായിരുന്ന സൈനികനെ ടോള്‍ പ്ലാസ ജീവനക്കാര്‍ മര്‍ദിച്ചതായി പരാതി. സംഭവത്തില്‍ ആറുപേരെ അറസ്റ്റ് ചെയ്യുകയും, ടോള്‍ ഓപ്പറേറ്റര്‍ക്ക് ദേശീയപാത അതോറിറ്റി (NHAI) 20 ലക്ഷം രൂപ പിഴ ചുമത്തുകയും കരിമ്പട്ടികയില്‍ പെടുത്താന്‍ നടപടി ആരംഭിക്കുകയും ചെയ്തു. ഇന്ത്യന്‍ സൈന്യം സംഭവത്തെ ശക്തമായി അപലപിച്ചു.

സംഭവത്തിന്റെ വീഡിയോ സോഷ്യല്‍ മീഡിയയില്‍ പ്രചരിച്ചതോടെ മീററ്റിലെ നാട്ടുകാര്‍ പ്രതിഷേധവുമായി രംഗത്തിറങ്ങി. ശ്രീനഗറില്‍ ജോലി ചെയ്യുന്ന ഗോട്ക ഗ്രാമവാസിയായ കപില്‍ എന്ന സൈനികന്‍ ഡല്‍ഹി വിമാനത്താവളത്തിലേക്ക് പോകുമ്പോഴാണ് ആക്രമിക്കപ്പെട്ടത്. ഞായറാഴ്ച (ഓഗസ്റ്റ് 17, 2025) വൈകുന്നേരം സരൂര്‍പൂര്‍ ഏരിയയിലെ ഭുനി ടോള്‍ പ്ലാസയിലായിരുന്നു സംഭവം.

അദ്ദേഹത്തിന്റെ കാര്‍ ടോള്‍ പ്ലാസയിലെ നീണ്ട ക്യൂവില്‍ കുടുങ്ങിയപ്പോള്‍, വേഗത്തില്‍ വഴി ഒരുക്കാന്‍ ജീവനക്കാരോട് ആവശ്യപ്പെട്ടതിനെ തുടര്‍ന്നുണ്ടായ തര്‍ക്കമാണ് മര്‍ദനത്തില്‍ കലാശിച്ചത്. ടോള്‍ പ്ലാസ ജീവനക്കാര്‍ കപിലിനെ ക്രൂരമായി മര്‍ദിക്കുകയായിരുന്നുവെന്ന് അധികൃതര്‍ അറിയിച്ചു.

സൈനികന്റെ കുടുംബം നല്‍കിയ പരാതിയുടെയും സിസിടിവി ദൃശ്യങ്ങളുടെയും അടിസ്ഥാനത്തില്‍ പോലീസ് കേസെടുത്ത് ആറ് ജീവനക്കാരെ അറസ്റ്റ് ചെയ്തു. ടോള്‍ ജീവനക്കാരും ചില നാട്ടുകാരും ചേര്‍ന്ന് കപിലിനെയും സുഹൃത്തുക്കളെയും ഒരു തൂണില്‍ കെട്ടിയിട്ട് മര്‍ദിച്ചതായി റൂറല്‍ പോലീസ് സൂപ്രണ്ട് രാകേഷ് കുമാര്‍ മിശ്ര പറഞ്ഞു. സംഭവത്തില്‍ ഉള്‍പ്പെട്ട മറ്റുള്ളവരെ കണ്ടെത്താനുള്ള ശ്രമങ്ങള്‍ തുടരുകയാണെന്നും അദ്ദേഹം കൂട്ടിച്ചേര്‍ത്തു.

സംഭവം ശ്രദ്ധയില്‍പ്പെട്ട ദേശീയപാത അതോറിറ്റി (NHAI), കരാറിലെ ഗുരുതരമായ ലംഘനം ചൂണ്ടിക്കാട്ടി ടോള്‍ പിരിവ് ഏജന്‍സിയായ എം/എസ് ധരം സിങ്ങിന് 20 ലക്ഷം രൂപ പിഴ ചുമത്തി. ഏജന്‍സിയുമായുള്ള കരാര്‍ റദ്ദാക്കാനും ഭാവിയില്‍ മറ്റു കരാറുകളില്‍ നിന്ന് അവരെ വിലക്കാനുമുള്ള നടപടികളും ആരംഭിച്ചിട്ടുണ്ട്. ‘ടോള്‍ പ്ലാ? ജീവനക്കാരുടെ ഇത്തരം പെരുമാറ്റത്തെ NHAI ശക്തമായി അപലപിക്കുന്നു. ദേശീയപാതകളില്‍ സുരക്ഷിതവും തടസ്സമില്ലാത്തതുമായ യാത്ര ഉറപ്പാക്കാന്‍ ഞങ്ങള്‍ പ്രതിജ്ഞാബദ്ധരാണ്,’ അതോറിറ്റി പ്രസ്താവനയില്‍ പറഞ്ഞു.

ഇന്ത്യന്‍ സൈന്യത്തിന്റെ സെന്‍ട്രല്‍ കമാന്‍ഡും സംഭവത്തില്‍ ശക്തമായി പ്രതികരിച്ചു. ‘സേവനത്തിലുള്ള ഒരു സൈനികനെതിരായ ഇത്തരം നടപടിയെ സൈന്യം ശക്തമായി അപലപിക്കുന്നു. കുറ്റവാളികളെ നിയമത്തിന് മുന്നില്‍ കൊണ്ടുവരാന്‍ ഉത്തര്‍പ്രദേശ് പോലീസിലെ ഉന്നത ഉദ്യോഗസ്ഥരുമായി ബന്ധപ്പെട്ടിട്ടുണ്ട്,’ എന്ന് സെന്‍ട്രല്‍ കമാന്‍ഡ് എക്സില്‍ കുറിച്ചു. ഭാരതീയ ന്യായ സംഹിതയിലെ (BNS) കൊലപാതകശ്രമം, നിയമവിരുദ്ധമായി സംഘംചേരല്‍, കവര്‍ച്ച എന്നീ വകുപ്പുകള്‍ പ്രകാരം എഫ്ഐആര്‍ രജിസ്റ്റര്‍ ചെയ്തിട്ടുണ്ടെന്നും സൈന്യം NHAI-യോട് പ്രതിഷേധം അറിയിച്ചിട്ടുണ്ടെന്നും അവര്‍ കൂട്ടിച്ചേര്‍ത്തു. ‘നീതി ഉറപ്പാക്കാന്‍ ഇന്ത്യന്‍ സൈന്യം പ്രതിജ്ഞാബദ്ധമാണ്, കേസ് അതിന്റെ സ്വാഭാവികമായ അന്ത്യത്തിലേക്ക് എത്തിക്കാന്‍ ശ്രമിക്കും,’ സെന്‍ട്രല്‍ കമാന്‍ഡ് വ്യക്തമാക്കി.

സോഷ്യല്‍ മീഡിയയിലെ പ്രതിഷേധത്തിന് പുറമെ, തിങ്കളാഴ്ച നാട്ടുകാരും പ്രതിഷേധവുമായി രംഗത്തെത്തി. ടോള്‍ പ്ലാസയില്‍ ഒത്തുകൂടിയ ഗ്രാമീണര്‍ മുദ്രാവാക്യം വിളിക്കുകയും വാഹനങ്ങള്‍ ടോള്‍ നല്‍കാതെ കടത്തിവിടുകയും ചെയ്തു. ടോള്‍ പിരിവ് കമ്പനിയുടെ ലൈസന്‍സ് റദ്ദാക്കണമെന്നും അവര്‍ ആവശ്യപ്പെട്ടു. മുന്‍ സര്‍ധാന എംഎല്‍എയും ബിജെപി നേതാവുമായ ഠാക്കൂര്‍ സംഗീത് സോമും സ്ഥലത്തെത്തി ഗ്രാമീണര്‍ക്കൊപ്പം കുത്തിയിരിപ്പ് സമരത്തില്‍ പങ്കെടുത്തു.

സ്ഥിതിഗതികള്‍ നിയന്ത്രിക്കാന്‍ വിവിധ സ്റ്റേഷനുകളില്‍ നിന്ന് കൂടുതല്‍ പോലീസ് സേനയെ വിന്യസിച്ചതായി എസ്പി (റൂറല്‍) മിശ്ര പറഞ്ഞു. സിസിടിവി ദൃശ്യങ്ങളുടെ അടിസ്ഥാനത്തില്‍ സച്ചിന്‍, വിജയ്, അനുജ്, അങ്കിത്, സുരേഷ് റാണ, അങ്കിത് ശര്‍മ്മ എന്നീ ആറു പ്രതികളെ അറസ്റ്റ് ചെയ്തതായും ഇവരെ കോടതിയില്‍ ഹാജരാക്കുമെന്നും അദ്ദേഹം അറിയിച്ചു.