ഇന്ത്യയിൽ മുസ്ലിങ്ങൾ സുരക്ഷിതർ; രാജ്യപുരോഗതിക്കായി കൈകോർക്കും; പ്രധാനമന്ത്രിയുമായുള്ള കൂടിക്കാഴ്ചയ്ക്ക് ശേഷം കാന്തപുരം

ഇന്ത്യയിൽ മുസ്ലിം സമുദായം സുരക്ഷിതരാണെന്നും രാജ്യത്ത് അവർക്ക് യാതൊരുവിധ അരക്ഷിതാവസ്ഥയും നിലനിൽക്കുന്നില്ലെന്നും ഇന്ത്യൻ ഗ്രാൻഡ് മുഫ്തി കാന്തപുരം എ.പി. അബൂബക്കർ മുസ്ലിയാർ. പ്രധാനമന്ത്രി നരേന്ദ്ര മോദിയുമായി ഡൽഹിയിൽ നടത്തിയ കൂടിക്കാഴ്ചയ്ക്ക് ശേഷം സി.എൻ.എൻ ന്യൂസ് 18-ന് നൽകിയ പ്രത്യേക അഭിമുഖത്തിലാണ് അദ്ദേഹം തന്റെ നിലപാട് വ്യക്തമാക്കിയത്. ദേശീയ പുരോഗതിക്കും സമാധാനത്തിനുമായി എല്ലാ ജനവിഭാഗങ്ങളും ഒന്നിച്ച് പ്രവർത്തിക്കേണ്ടത് അനിവാര്യമാണെന്നും അദ്ദേഹം കൂട്ടിച്ചേർത്തു.

സാമൂഹികം, വിദ്യാഭ്യാസം, വികസനം തുടങ്ങിയ വിവിധ മേഖലകളെക്കുറിച്ച് പ്രധാനമന്ത്രിയുമായി അർത്ഥവത്തായ ചർച്ചകൾ നടത്തിയെന്ന് കാന്തപുരം പറഞ്ഞു. ന്യൂനപക്ഷ ക്ഷേമം, അന്താരാഷ്ട്ര തലത്തിലെ സുപ്രധാന സംഭവവികാസങ്ങൾ എന്നിവയും കൂടിക്കാഴ്ചയിൽ വിഷയമായി. മാനുഷിക ലക്ഷ്യങ്ങളോടുള്ള തന്റെ സർക്കാരിന്റെ പ്രതിബദ്ധത തുടരുമെന്ന് പ്രധാനമന്ത്രി ഉറപ്പുനൽകിയതായും കൂടിക്കാഴ്ചയിൽ അദ്ദേഹം സംതൃപ്തി രേഖപ്പെടുത്തിയതായും ഗ്രാൻഡ് മുഫ്തി അറിയിച്ചു.

‘മാനവികതയ്ക്കൊപ്പം’ എന്ന പ്രമേയത്തിൽ കേരളത്തിൽ നടത്തിയ യാത്രയ്ക്കിടെ ജനങ്ങളിൽ നിന്ന് ലഭിച്ച പരാതികളും നിർദ്ദേശങ്ങളും അദ്ദേഹം പ്രധാനമന്ത്രിയുടെ ശ്രദ്ധയിൽപ്പെടുത്തി. വിഭവ വിതരണത്തിൽ ജനസംഖ്യാനുപാതവും പ്രാദേശിക സന്തുലിതാവസ്ഥയും പാലിക്കണമെന്ന് അദ്ദേഹം ആവശ്യപ്പെട്ടു. സമസ്ത കേരള ജംഇയ്യത്തുൽ ഉലമയുടെയും ജാമിഅ മർക്കസിന്റെയും നേതൃത്വത്തിൽ നടക്കുന്ന വിദ്യാഭ്യാസ-സാമൂഹിക പ്രവർത്തനങ്ങളെ പ്രധാനമന്ത്രി പ്രശംസിക്കുകയും ഇത് രാജ്യത്തിന്റെ യശസ്സ് ഉയർത്തുന്നതാണെന്ന് ചൂണ്ടിക്കാട്ടുകയും ചെയ്തു.

കൂടിക്കാഴ്ചയ്ക്ക് ശേഷം പ്രധാനമന്ത്രി നരേന്ദ്ര മോദി തന്റെ ഔദ്യോഗിക എക്സ് (ട്വിറ്റർ) ഹാൻഡിലിലൂടെ ചിത്രങ്ങൾ പങ്കുവെച്ചു. സാമൂഹിക സൗഹാർദ്ദവും സാഹോദര്യവും പ്രോത്സാഹിപ്പിക്കുന്നതിനും വിദ്യാഭ്യാസം മെച്ചപ്പെടുത്തുന്നതിനും കാന്തപുരം നടത്തുന്ന പരിശ്രമങ്ങൾ ഏറെ ശ്രദ്ധേയമാണെന്ന് പ്രധാനമന്ത്രി കുറിച്ചു. ശൈഖ് അബൂബക്കർ അഹമ്മദുമായി വിവിധ വിഷയങ്ങളിൽ ആശയങ്ങൾ പങ്കുവെക്കാൻ സാധിച്ചതിൽ സന്തോഷമുണ്ടെന്നും അദ്ദേഹം വ്യക്തമാക്കി.

ഗ്രാൻഡ് മുഫ്തിക്കൊപ്പം സമസ്ത കേരള ജംഇയ്യത്തുൽ ഉലമ സെക്രട്ടറി ഷേയ്ഖ് അബ്ദുൽ റഹ്മാൻ സഖാഫി, മർക്കസ് നോളജ് സിറ്റി മാനേജിംഗ് ഡയറക്ടർ ഡോ. മുഹമ്മദ് അബ്ദുൽ ഹക്കീം അസ്ഹരി എന്നിവരും കൂടിക്കാഴ്ചയിൽ പങ്കെടുത്തു. വരാനിരിക്കുന്ന റമദാൻ മാസത്തെക്കുറിച്ചുള്ള സന്ദേശവും കാന്തപുരം പ്രധാനമന്ത്രിക്ക് കൈമാറി. എല്ലാവരെയും ഉൾക്കൊള്ളുന്ന വികസനത്തിന്റെ പ്രാധാന്യം ഊന്നിപ്പറഞ്ഞാണ് കൂടിക്കാഴ്ച അവസാനിച്ചത്.