മോഹൻ ഭാഗവതിൻ്റെ ‘വിരമിക്കൽ’ പരാമർശം മോദിയെ ലക്ഷ്യം വെച്ചോ?

75 വയസ്സായാൽ വിരമിക്കണമെന്ന് ഓർമിപ്പിച്ച് ആർഎസ്എസ് മേധാവി മോഹൻ ഭാഗവത്. പ്രായമെത്തിയാൽ സന്തോഷത്തോടെ വഴിമാറണമെന്നാണ് മോഹൻ ഭാഗവതിന്റെ പ്രസ്താവന ഇത് വലിയ രാഷ്ട്രീയ വിവാദങ്ങൾക്ക് തിരികൊളുത്തിയിരിക്കുകയാണ്. സെപ്റ്റംബറിൽ 75 വയസ്സ് തികയുന്ന പ്രധാനമന്ത്രി നരേന്ദ്ര മോദിയെ ലക്ഷ്യം വെച്ചാണ് ഈ പരാമർശം എന്ന നിലയിൽ പ്രതിപക്ഷം രംഗത്തെത്തി.

നാഗ്പൂരിൽ നടന്ന ഒരു പുസ്തക പ്രകാശന ചടങ്ങിൽ സംസാരിക്കവെയാണ് മോഹൻ ഭാഗവത് ഈ പ്രായപരിധി പരാമർശിച്ചത്. “75 വയസ്സ് തികഞ്ഞാൽ സന്തോഷത്തോടെ വഴിമാറണം, മറ്റുള്ളവർക്ക് അവസരം നൽകണം” എന്ന് അദ്ദേഹം പറഞ്ഞു. ആർ.എസ്.എസ്. സൈദ്ധാന്തികൻ മോറോപന്ത് പിംഗ്ലെയുടെ കാഴ്ചപ്പാടുകൾ ഉദ്ധരിച്ചുകൊണ്ടായിരുന്നു ഭാഗവതിൻ്റെ ഈ വാക്കുകൾ.

മോഹൻ ഭാഗവതിൻ്റെ ഈ പ്രസ്താവനയെ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ പ്രധാനമന്ത്രി നരേന്ദ്ര മോദിക്കെതിരെ ഉപയോഗിച്ചു. ബി.ജെ.പി.യുടെ തന്നെ ’75 വയസ്സ്’ എന്ന അനൗദ്യോഗിക വിരമിക്കൽ നയം ചൂണ്ടിക്കാട്ടി, എൽ.കെ. അദ്വാനി, മുരളി മനോഹർ ജോഷി തുടങ്ങിയ മുതിർന്ന നേതാക്കളെ പാർട്ടിയിൽ നിന്ന് മാറ്റിനിർത്തിയത് കോൺഗ്രസ് ഓർമ്മിപ്പിച്ചു. മോദിയും ഭാഗവതും “സഞ്ചി എടുത്ത് പോകാൻ” സമയമായെന്ന് കോൺഗ്രസ് നേതാവ് പവൻ ഖേര പരിഹസിച്ചു.

മോദിക്ക് പ്രായം ഒരു പ്രശ്നമല്ലെന്നും, അദ്ദേഹം കാലാവധി പൂർത്തിയാക്കുമെന്നും ബി.ജെ.പി. നേരത്തെ വ്യക്തമാക്കിയിട്ടുണ്ട്. എന്നാൽ, ഭാഗവതിൻ്റെ ഈ പരാമർശം ആർ.എസ്.എസ്. നേതൃത്വത്തിലും ബി.ജെ.പി.യിലും എന്ത് സ്വാധീനം ചെലുത്തും എന്നത് ഉറ്റുനോക്കപ്പെടുന്നു.

മോഹൻ ഭാഗവതും പ്രധാനമന്ത്രി നരേന്ദ്ര മോദിയും സെപ്റ്റംബറിലാണ് ജനിച്ചത് (ഭാഗവത് സെപ്റ്റംബർ 11, മോദി സെപ്റ്റംബർ 17). ഈ സാഹചര്യത്തിൽ, മോദിക്ക് 75 വയസ്സ് തികയുന്ന സെപ്റ്റംബർ 17-ന് ഈ വിഷയം വീണ്ടും ചർച്ചയാകാൻ സാധ്യതയുണ്ട്.