ലഖ്നൗവിലെ ലുലു മാള്‍ വീണ്ടും വിവാദത്തില്‍; മാനേജര്‍ക്കെതിരെ ബലാത്സംഗത്തിനും ബ്ലാക്ക്മെയിലിനും കേസ്

ലഖ്നൗവിലെ പ്രശസ്തമായ ലുലു മാള്‍ ഒരിക്കല്‍ കൂടി വിവാദത്തില്‍. ഇത്തവണ, മാളിലെ മാനേജര്‍ക്കെതിരെ സഹപ്രവര്‍ത്തകയായ യുവതി ബലാത്സംഗം, ബ്ലാക്ക്‌മെയിലിംഗ്, ശാരീരിക പീഡനം തുടങ്ങിയ ഗുരുതരമായ ആരോപണങ്ങളാണ് ഉന്നയിച്ചിരിക്കുന്നത്. മാനേജറെ യുപി പോലീസ് അറസ്റ്റ് ചെയ്ത് ജയിലിലടച്ചു.

എന്താണ് സംഭവം?

ലുലു മാളില്‍ ജോലി ചെയ്യുന്ന യുവതിയുടെ പരാതി പ്രകാരം മാനേജര്‍ ശീതളപാനീയത്തില്‍ മയക്കുമരുന്ന് കലര്‍ത്തി നല്‍കി ബലാത്സംഗം ചെയ്യുകയായിരുന്നു. പീഡന ദൃശ്യങ്ങള്‍ മൊബൈലില്‍ പകര്‍ത്തുകയും പിന്നീട് ഇത് ഉപയോഗിച്ച് പണം തട്ടാന്‍ ശ്രമിക്കുകയും ചെയ്‌തെന്നും യുവതി ആരോപിക്കുന്നു. പണം നല്‍കാന്‍ വിസമ്മതിച്ചപ്പോള്‍, വീഡിയോ ഓണ്‍ലൈനില്‍ പ്രചരിപ്പിക്കുമെന്ന് ഭീഷണിപ്പെടുത്തിയതായും യുവതി പറയുന്നു.

ഇതിനൊപ്പം, മാനേജര്‍ തന്നെ ശാരീരികമായി മര്‍ദ്ദിക്കുകയും സിഗരറ്റ് ഉപയോഗിച്ച് പൊള്ളിക്കുകയും ചെയ്തതായും യുവതി പരാതിയില്‍ പറയുന്നു.

ബലാത്സംഗം, കയ്യേറ്റം തുടങ്ങിയ വകുപ്പുകള്‍ ചുമത്തി പോലീസ് എഫ്ഐആര്‍ രജിസ്റ്റര്‍ ചെയ്യുകയും പ്രതിയെ കസ്റ്റഡിയിലെടുക്കുകയും ചെയ്തിട്ടുണ്ട്. ലഖ്നൗവിലെ സുശാന്ത് ഗോള്‍ഫ് സിറ്റി പോലീസ് സ്റ്റേഷന്‍ പരിധിയിലാണ് കേസ് രജിസ്റ്റര്‍ ചെയ്തിട്ടുള്ളതെന്ന് പോലീസ് അറിയിച്ചു.

നമസ്‌ക്കാര വിവാദം

ഇതിനു മുന്‍പും ലഖ്നൗവിലെ ലുലു മാള്‍ വാര്‍ത്തകളില്‍ ഇടംപിടിച്ചിരുന്നു. മാളിന്റെ ഉദ്ഘാടനത്തിന് തൊട്ടുപിന്നാലെ, ഒരു സംഘം ആളുകള്‍ മാളിനുള്ളില്‍ നിസ്‌കരിക്കുന്നതിന്റെ വീഡിയോ പുറത്തുവന്നത് വലിയ വിവാദമായിരുന്നു. ഇതിനെതിരെ ഹിന്ദു സംഘടനകള്‍ ശക്തമായി രംഗത്തുവരികയും, മാളിന് പുറത്ത് ഹനുമാന്‍ ചാലീസ ചൊല്ലുമെന്ന് പ്രഖ്യാപിച്ച് പ്രതിഷേധിക്കുകയും ചെയ്തിരുന്നു.

ഇതിനെത്തുടര്‍ന്ന്, മാള്‍ അധികൃതര്‍ നിസ്‌കരിച്ചവര്‍ക്കെതിരെ എഫ്ഐആര്‍ ഫയല്‍ ചെയ്യുകയും, ഒരു തരത്തിലുള്ള മതപരമായ ചടങ്ങുകളും മാളിനുള്ളില്‍ അനുവദനീയമല്ലെന്ന് വ്യക്തമാക്കുകയും ചെയ്തു. പൊതു വാണിജ്യ ഇടങ്ങളിലെ മതപരമായ ആചാരങ്ങളെക്കുറിച്ച് വലിയ ചര്‍ച്ചകള്‍ക്കും ഈ സംഭവം അന്ന് വഴിവെച്ചിരുന്നു.