മിനിമം ബാലൻസ് കുത്തനെ വർധിപ്പിച്ച് ഐ.സി.ഐ.സി.ഐ ബാങ്ക്

രാജ്യത്തെ പ്രമുഖ സ്വകാര്യ ബാങ്കുകളിലൊന്നായ ഐസിഐസിഐ ബാങ്ക്, സേവിങ്‌സ് അക്കൗണ്ടുകളുടെ മിനിമം ബാലൻസ് തുക ഗണ്യമായി വർദ്ധിപ്പിച്ചു. ഓഗസ്റ്റ് ഒന്നിനോ അതിനു ശേഷമോ പുതിയ അക്കൗണ്ടുകൾ തുറക്കുന്ന ഉപഭോക്താക്കൾക്കാണ് ഈ പുതിയ നിബന്ധനകൾ ബാധകമാകുക. പുതിയ പരിഷ്കരണമനുസരിച്ച്, ചില അക്കൗണ്ടുകളിൽ നിലനിർത്തേണ്ട തുക അഞ്ചിരട്ടിയോളം വർധിച്ചു. ഇതോടെ, ഇന്ത്യയിലെ ബാങ്കുകളിൽ ഏറ്റവും ഉയർന്ന മിനിമം ബാലൻസ് ആവശ്യകതയുള്ള ബാങ്കുകളിലൊന്നായി ഐസിഐസിഐ മാറി. മെട്രോ/നഗരപ്രദേശങ്ങൾ: നേരത്തെ 10,000 രൂപയായിരുന്നത് ഇപ്പോൾ 50,000 രൂപയായി ഉയർത്തി. അർധ നഗരപ്രദേശങ്ങൾ 5,000 രൂപയിൽ നിന്ന് ഇത് 25,000 രൂപയായി വർധിച്ചു. ഗ്രാമീണ മേഖല: ഇവിടെ മിനിമം ബാലൻസ് തുക 2,500 രൂപയിൽ നിന്ന് 10,000 രൂപയായി ഉയർത്തി.

നിലവിലുള്ള അക്കൗണ്ടുകൾക്ക് ഈ മാറ്റങ്ങൾ ബാധകമല്ലെന്ന് ബാങ്ക് വ്യക്തമാക്കിയിട്ടുണ്ട്. എന്നാൽ, ഓഗസ്റ്റ് ഒന്നു മുതൽ മിനിമം ബാലൻസ് നിലനിർത്താൻ കഴിയാത്ത പുതിയ ഉപഭോക്താക്കൾക്ക് പുതുക്കിയ ഫീസ് ഷെഡ്യൂൾ അനുസരിച്ച് പിഴ ചുമത്തുമെന്ന് ബാങ്ക് അറിയിച്ചിട്ടുണ്ട്. ഇത് ഒഴിവാക്കാൻ ഉപഭോക്താക്കൾ അക്കൗണ്ടിലെ ബാലൻസ് തുക ഉറപ്പുവരുത്തണമെന്ന് ബാങ്ക് നിർദേശിച്ചു.