രാഹുലിന്റെ വെളിപ്പെടുത്തല്‍ സ്‌ഫോടനാത്മകം; തൃശൂരും അന്വേഷിക്കണം, പിന്തുണ പ്രഖ്യാപിച്ച് സിപിഎം, തെരഞ്ഞെടുപ്പ് കമ്മീഷനെതിരെ രൂക്ഷ വിമര്‍ശനം

വോട്ട് അട്ടിമറി സംബന്ധിച്ച് കോണ്‍ഗ്രസ് നേതാവും പ്രതിപക്ഷ നേതാവുമായ രാഹുല്‍ ഗാന്ധി ഉന്നയിച്ച ഗുരുതര ആരോപണങ്ങള്‍ക്ക് പൂര്‍ണ്ണ പിന്തുണ പ്രഖ്യാപിച്ച് സിപിഎം. രാഹുല്‍ ഗാന്ധിയുടെ വെളിപ്പെടുത്തലുകള്‍ ‘സ്‌ഫോടനാത്മക’മാണെന്നും വിഷയത്തില്‍ തെരഞ്ഞെടുപ്പ് കമ്മീഷന്‍ അടിയന്തരമായി വിശദീകരണം നല്‍കണമെന്നും സിപിഎം പോളിറ്റ്ബ്യൂറോ അംഗം എം.എ ബേബി ആവശ്യപ്പെട്ടു. തെരഞ്ഞെടുപ്പ് കമ്മീഷന്‍ കേന്ദ്രസര്‍ക്കാരിന്റെ ഒരു അനുബന്ധ സ്ഥാപനം പോലെയാണ് പ്രവര്‍ത്തിക്കുന്നതെന്നും അദ്ദേഹം തൃശൂരില്‍ മാധ്യമങ്ങളോട് പറഞ്ഞു.

ആറുമാസത്തെ പഠനത്തിന് ശേഷമുള്ള വെളിപ്പെടുത്തല്‍

മുന്‍ തെരഞ്ഞെടുപ്പുകളിലെ ക്രമക്കേടുകള്‍ സംബന്ധിച്ച് ആറുമാസത്തോളം നീണ്ട പഠനത്തിന് ശേഷമാണ് രാഹുല്‍ ഗാന്ധി നിര്‍ണായക വിവരങ്ങള്‍ പുറത്തുവിട്ടതെന്ന് എം.എ ബേബി ചൂണ്ടിക്കാട്ടി. ഈ കണ്ടെത്തലുകള്‍ അദ്ദേഹം ഇന്‍ഡ്യാ മുന്നണിയിലെ ഘടകകക്ഷി നേതാക്കള്‍ക്ക് മുന്നില്‍ വിശദീകരിച്ചിരുന്നു. ഇത് അതീവ ഗൗരവമുള്ള വിഷയമാണെന്നും അദ്ദേഹം കൂട്ടിച്ചേര്‍ത്തു.

കമ്മീഷനെതിരെ ഗുരുതര ആരോപണങ്ങള്‍

തെരഞ്ഞെടുപ്പ് കമ്മീഷന്റെ പ്രവര്‍ത്തനങ്ങളെയും എം.എ ബേബി രൂക്ഷമായി വിമര്‍ശിച്ചു. ബിഹാറിലെ വോട്ടര്‍ പട്ടിക പരിഷ്‌കരണത്തിന് മുന്‍പ് രാഷ്ട്രീയ പാര്‍ട്ടികളുമായി യാതൊരു ചര്‍ച്ചയും നടത്തിയിട്ടില്ലെന്നും ഇതിന് പിന്നില്‍ ദുരുദ്ദേശ്യമുണ്ടെന്നും അദ്ദേഹം ആരോപിച്ചു. സമാനമായ രീതിയില്‍, തൃശൂരിലെ വോട്ടര്‍ പട്ടിക അട്ടിമറിച്ചെന്ന ആരോപണങ്ങളിലും ശരിയായ അന്വേഷണം വേണമെന്ന് അദ്ദേഹം ആവശ്യപ്പെട്ടു.