ഭരണനേതൃത്വത്തിൽ 25 വർഷം: നരേന്ദ്ര മോദിയെ അഭിനന്ദിച്ച് പ്രമേയം പാസാക്കി കേന്ദ്ര മന്ത്രിസഭ 

ഭരണനേതൃത്വത്തിൽ തുടർച്ചയായി 25 വർഷം പൂർത്തിയാക്കിയ പ്രധാനമന്ത്രി നരേന്ദ്ര മോദിയെ അഭിനന്ദിച്ചുകൊണ്ട് കേന്ദ്ര മന്ത്രിസഭ ചൊവ്വാഴ്ച പ്രത്യേക പ്രമേയം പാസാക്കി. 2001 ഒക്ടോബർ 7-ന് ഗുജറാത്ത് മുഖ്യമന്ത്രിയായി ചുമതലയേറ്റ മോദി, 12 വർഷത്തിലേറെ ആ പദവിയിൽ തുടർന്ന ശേഷമാണ് 2014 മേയിൽ രാജ്യത്തിന്റെ പ്രധാനമന്ത്രിയാകുന്നത്.

ജനങ്ങളുടെ തുടർച്ചയായ വിശ്വാസവും ഇന്ത്യൻ ജനാധിപത്യത്തിന്റെ മഹത്വവുമാണ് സാധാരണക്കാരനായ ഒരു വ്യക്തിയെ ഈ നേട്ടത്തിലേക്ക് നയിച്ചതെന്ന് മന്ത്രിസഭാ യോഗത്തിന് ശേഷം വാർത്താവിതരണ പ്രക്ഷേപണ മന്ത്രി അശ്വിനി വൈഷ്ണവ് വ്യക്തമാക്കി.

ഗുജറാത്തിൽ ജനങ്ങളുടെ പരാതികൾ നേരിട്ട് പരിഹരിക്കാൻ തുടക്കമിട്ട ‘സ്വാഗത്’ പദ്ധതി, പിന്നീട് കേന്ദ്ര തലത്തിൽ പദ്ധതികളുടെ നടത്തിപ്പ് വേഗത്തിലാക്കാൻ ‘പ്രഗതി’ എന്ന പേരിൽ വ്യാപിപ്പിച്ച നടപടികളും പ്രമേയത്തിൽ എടുത്തുപറയുന്നുണ്ട്. കൂടാതെ കാർഷിക മേഖലയ്ക്കും ഗ്രാമങ്ങൾക്കും തടസ്സമില്ലാതെ വൈദ്യുതി ഉറപ്പാക്കിയ ‘ജ്യോതിഗ്രാം’ പദ്ധതിയും ഗുജറാത്ത് മോഡലിൽ നിന്ന് ദേശീയ തലത്തിലേക്ക് ഉയർത്തപ്പെട്ട പ്രധാന ഭരണനേട്ടങ്ങളിലൊന്നായി കേന്ദ്ര മന്ത്രിസഭ ചൂണ്ടിക്കാട്ടി.

ദാരിദ്ര്യ നിർമാർജനത്തിലും അടിസ്ഥാന സൗകര്യ വികസനത്തിലും രാജ്യം കൈവരിച്ച വലിയ കുതിച്ചുചാട്ടത്തെയും പ്രമേയം പ്രശംസിക്കുന്നു. 60 കോടിയോളം ജൻധൻ അക്കൗണ്ടുകൾ, 4 കോടിയലധികം വീടുകളുടെ നിർമാണം, 25 കോടി ആളുകളെ ദാരിദ്ര്യത്തിൽ നിന്ന് കരകയറ്റിയത്, 3.5 കോടി ലഖ്പതി ദീദികൾ, സ്ത്രീ സംവരണം ഉറപ്പാക്കിയ നാരീ ശക്തി വന്ദൻ അധിനിയമം തുടങ്ങിയവ സാമൂഹിക ശാക്തീകരണത്തിലെ നിർണായക നാഴികക്കല്ലുകളായി മാറി. ജിഎസ്\u200Dടി (GST) നടപ്പിലാക്കൽ, യുപിഐ (UPI) വഴിയുള്ള ഡിജിറ്റൽ വിപ്ലവം, പ്രതിരോധ മേഖലയിലെയും സെമികണ്ടക്ടർ നിർമാണത്തിലെയും സ്വയംപര്യാപ്തത എന്നിവ സാമ്പത്തിക രംഗത്തെ കരുത്തുറ്റതാക്കി.

ദേശീയ സുരക്ഷ ഉറപ്പാക്കുന്നതിൽ സ്വീകരിച്ച കർശന നിലപാടുകളും കോവിഡ് മഹാമാരി ഉൾപ്പെടെയുള്ള ആഗോള പ്രതിസന്ധി ഘട്ടങ്ങളിലെ മികച്ച നേതൃത്വവും ഇന്ത്യയുടെ ആഗോള പ്രതിച്ഛായ വർധിപ്പിച്ചതായി മന്ത്രിസഭ വിലയിരുത്തി. സർജിക്കൽ സ്ട്രൈക്ക്, ബലാകോട്ട് വ്യോമാക്രമണം, ഓപ്പറേഷൻ സിന്ദൂർ, ആർട്ടിക്കിൾ 370 റദ്ദാക്കൽ തുടങ്ങിയ തീരുമാനങ്ങൾക്കൊപ്പം ജി20 (G20), ബ്രിക്സ് (BRICS) വേദിയിൽ ഇന്ത്യ നേടിയ ആഗോള സ്വാധീനവും പ്രമേയത്തിൽ പരാമർശിക്കപ്പെട്ടു. വികസനത്തിനൊപ്പം സാംസ്കാരിക പൈതൃകവും പരിസ്ഥിതി സംരക്ഷണവും ഒരേപോലെ മുൻനിർത്തി 2047-ഓടെ വികസിത ഇന്ത്യയെന്ന ലക്ഷ്യത്തിലേക്ക് രാജ്യം മുന്നേറുമെന്ന പ്രഖ്യാപനത്തോടെയാണ് പ്രമേയം അവസാനിക്കുന്നത്.