ബംഗാളിൽ കഥ മാറി; മുസ്ലിം യുവാക്കൾ പശുസംരക്ഷകരാകുന്നു, കന്നുകാലി കശാപ്പ് ആവശ്യപ്പെട്ട് ഹിന്ദു വ്യാപാരികൾ

പശ്ചിമ ബംഗാളിൽ പുതുതായി അധികാരമേറ്റ സുവേന്ദു അധികാരിയുടെ നേതൃത്വത്തിലുള്ള ബി.ജെ.പി സർക്കാർ കന്നുകാലി കശാപ്പ് നിയന്ത്രണങ്ങൾ കർശനമാക്കിയതോടെ പശുവിനെച്ചൊല്ലിയുള്ള പരമ്പരാഗത രാഷ്ട്രീയ സമവാക്യങ്ങൾ തലകീഴായി മറിയുന്നു. ഇത്തവണത്തെ ബക്രീദ് (ഈദുൽ അദ്ഹ) വേളയിൽ പശുക്കളെ വാങ്ങരുതെന്ന് മുസ്ലിം സ്വാധീനശക്തികൾ പരസ്യമായി ആഹ്വാനം ചെയ്യുമ്പോൾ, കന്നുകാലികളെ വിൽക്കാൻ കഴിയാതെ കടുത്ത സാമ്പത്തിക പ്രതിസന്ധിയിലായ ഹിന്ദു വ്യാപാരികൾ കശാപ്പിന് അനുമതി നൽകണമെന്ന് ആവശ്യപ്പെട്ട് രംഗത്തെത്തിയിരിക്കുകയാണ്. മുസ്ലിം യുവാക്കൾ ഹിന്ദു കന്നുകാലി കൽക്കർമാരെ തടഞ്ഞ് പശുക്കളെ തിരികെ വീട്ടിലേക്ക് കൊണ്ടുപോകാൻ ആവശ്യപ്പെടുന്ന വീഡിയോകൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.

മേയ് 13-നാണ് പശ്ചിമ ബംഗാൾ അനിമൽ സ്ലോട്ടർ കൺട്രോൾ ആക്ട് (1950) കർശനമായി നടപ്പാക്കാൻ പുതിയ ബി.ജെ.പി സർക്കാർ ഉത്തരവിട്ടത്. ഇതനുസരിച്ച് 14 വയസ്സിൽ കൂടുതൽ പ്രായമുള്ളതോ അല്ലെങ്കിൽ പണിയെടുക്കാൻ തീർത്തും അയോഗ്യമോ ആയ കന്നുകാലികളെ മാത്രമേ ഔദ്യോഗിക സർട്ടിഫിക്കറ്റോടെ സർക്കാർ അംഗീകൃത കശാപ്പശാലകളിൽ അറുക്കാൻ പാടുള്ളൂ. പൊതുസ്ഥലങ്ങളിലെ കശാപ്പും നിരോധിച്ചു. നിയമം ലംഘിക്കുന്നവർക്ക് ആറ് മാസം തടവോ 1000 രൂപ പിഴയോ അല്ലെങ്കിൽ രണ്ടും കൂടിയോ ശിക്ഷ ലഭിക്കാം. ഇതിന് പിന്നാലെ റോഡുകളിൽ കന്നുകാലി കടത്ത് തടഞ്ഞ് തീവ്ര ഹിന്ദുത്വ സംഘടനകളും പൊലീസും പരിശോധന ശക്തമാക്കിയതോടെയാണ് കന്നുകാലി വിപണി പൂർണ്ണമായും സ്തംഭിച്ചത്.

ബംഗാളിലെ കന്നുകാലി സമ്പദ്‌വ്യവസ്ഥയുടെ വലിയൊരു വൈരുദ്ധ്യം, പശുക്കളെ വളർത്തുന്നതും വിൽക്കുന്നതും ഭൂരിഭാഗവും ഹിന്ദുക്കളിലെ ‘ഘോഷ്’ (ക്ഷീര കർഷകർ) സമുദായക്കാരാണ് എന്നതാണ്. പരമ്പരാഗതമായി ആർ.എസ്.എസ് – ബി.ജെ.പി അനുഭാവികളായ ഈ സമുദായത്തെയാണ് പുതിയ നിയമം ഏറ്റവും കൂടുതൽ ബാധിച്ചിരിക്കുന്നത്. പാൽ ഉൽപ്പാദനം നിലയ്ക്കുന്ന പശുക്കളെ വിറ്റാണ് ഇവർ ഉപജീവനമാർഗ്ഗം കണ്ടെത്തിയിരുന്നത്. എന്നാൽ പുതിയ നിയമപ്രകാരം പശുക്കൾക്ക് 14 വയസ്സാകുന്നത് വരെ കർഷകർ സ്വന്തം ചിലവിൽ നോക്കേണ്ടി വരും. ഇതിനായി മാസം തോറും വൻ തുക ചിലവാകുന്നത് തങ്ങളെ ആത്മഹത്യയിലേക്ക് നയിക്കുമെന്നും, കോടിക്കണക്കിന് രൂപയുടെ ബാങ്ക് ലോണുകൾ എങ്ങനെ തിരിച്ചടയ്ക്കുമെന്നും കർഷകർ ആശങ്കപ്പെടുന്നു.

വിഷയം സങ്കീർണ്ണമായതോടെ ഐ.എസ്.എഫ് എം.എൽ.എ നൗഷാദ് സിദ്ദിഖി, സി.പി.എം എം.എ.ൽ.എ മുസ്തഫിസുർ റഹ്മാൻ റാണ എന്നിവർ ബക്രീദ് പ്രമാണിച്ച് നിയമത്തിൽ പ്രത്യേക ഇളവുകൾ നൽകണമെന്ന് ആവശ്യപ്പെട്ട് മുഖ്യമന്ത്രിക്ക് കത്തെഴുതി. അതേസമയം അനാവശ്യ നിയമനടപടികൾ ഭയന്ന് മുസ്ലിം സംഘടനകൾ പശുക്കൾക്ക് പകരം പോത്തിനെയോ ആടിനെയോ ബലി നൽകാൻ വിശ്വാസികളോട് ആവശ്യപ്പെട്ടു കഴിഞ്ഞു. ഈ കടുത്ത നിയന്ത്രണങ്ങൾ കർഷകരെ മാത്രമല്ല, തീറ്റ വിതരണക്കാർ, ഇറച്ചി-ചർമ്മ വ്യവസായങ്ങൾ, ട്രാൻസ്പോർട്ട് മേഖല എന്നിവയെയും ദോഷകരമായി ബാധിക്കുമെന്നും നിലവിൽ കൽക്കട്ട ഹൈക്കോടതിയിൽ നിയമത്തിനെതിരെ അഞ്ച് പൊതുതാൽപര്യ ഹർജികൾ (PIL) ഫയൽ ചെയ്യപ്പെട്ടിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു.