യു.എസിലെ ടെക്സസിൽ മിന്നൽ പ്രളയം മരണം 20തിൽ കൂടുതലെന്ന് റിപ്പോർട്ടുകൾ

ടെക്സസ്: അമേരിക്കയിലെ ടെക്സസ് സംസ്ഥാനത്ത് കനത്ത മഴയെത്തുടർന്നുണ്ടായ മിന്നൽ പ്രളയത്തിൽ മരിച്ചവരുടെ എണ്ണം 24 ആയി ഉയർന്നു. 20-ൽ അധികം കുട്ടികളെ കാണാതായതായും റിപ്പോർട്ടുകൾ സൂചിപ്പിക്കുന്നു. കാണാതായവരിൽ 23 പെൺകുട്ടികൾ ഒരു വേനൽക്കാല ക്യാമ്പിൽ ഉണ്ടായിരുന്നവരാണ്.

വെള്ളിയാഴ്ച പുലർച്ചെയാണ് കനത്ത മഴയെ തുടർന്ന് ​ഗ്വാദലൂപ്പ് നദി കരകവിഞ്ഞൊഴുകിയത്. മണിക്കൂറുകൾക്കുള്ളിൽ ഏകദേശം 25 സെൻ്റിമീറ്റർ മഴയാണ് ഈ മേഖലയിൽ ലഭിച്ചത്. ഇതാണ് പെട്ടന്നുള്ള വെള്ളപ്പൊക്കത്തിന് കാരണമായത്.

അടിയന്തര രക്ഷാപ്രവർത്തനങ്ങൾ തുടരുകയാണ്. ഹെലികോപ്റ്ററുകളും ബോട്ടുകളും ഡ്രോണുകളും ഉപയോഗിച്ച് കാണാതായവർക്കായുള്ള തിരച്ചിൽ ഊർജിതമാക്കിയിട്ടുണ്ട്. ഇതുവരെ 200-ൽ അധികം ആളുകളെ രക്ഷപ്പെടുത്താൻ സാധിച്ചുവെന്ന് അധികൃതർ അറിയിച്ചു.

ദുരന്തം പ്രവചിക്കാൻ കഴിഞ്ഞിരുന്നില്ലെന്ന് പ്രാദേശിക അധികൃതർ പറയുന്നു. മുന്നറിയിപ്പുകൾ ഉണ്ടായിരുന്നെങ്കിലും, ഇത്രയും വലിയ തോതിലുള്ള വെള്ളപ്പൊക്കം അപ്രതീക്ഷിതമായിരുന്നുവെന്നാണ് വിലയിരുത്തൽ. മരണസംഖ്യ ഇനിയും ഉയരാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകിയിട്ടുണ്ട്.