ഇറാൻ ആക്രമണം: ഖത്തർ അമീറിനെ ഫോണിൽ വിളിച്ച് ട്രംപ്

ദോഹ: ഖത്തറിലെ അൽ-ഉദൈദ് വ്യോമതാവളത്തിന് നേരെ നടന്ന ആക്രമണത്തിൽ ഖത്തർ അമീർ ഷെയ്ഖ് തമീം ബിൻ ഹമദ് അൽ താനിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ് ഫോണിൽ സംസാരിച്ചു. ആക്രമണത്തെ ട്രംപ് അപലപിക്കുകയും ഖത്തറിനോട് ഐക്യദാർഢ്യം പ്രകടിപ്പിക്കുകയും ചെയ്തുവെന്ന് ഖത്തർ അമീരി ദിവാൻ പുറത്തിറക്കിയ പ്രസ്താവനയിൽ പറയുന്നു.

ഇറാന്റെ ആക്രമണം ഖത്തറിന്റെ പരമാധികാരത്തെയും വ്യോമാതിർത്തിയെയും അന്താരാഷ്ട്ര നിയമങ്ങളെയും നഗ്നമായി ലംഘിക്കുന്നതാണെന്ന് പ്രസിഡന്റ് ട്രംപ് ചൂണ്ടിക്കാട്ടി. ഖത്തറിന്റെ സുരക്ഷയ്ക്കും സ്ഥിരതയ്ക്കും ഭീഷണിയാകുന്ന ഒരു ആക്രമണത്തെയും അംഗീകരിക്കില്ലെന്നും അദ്ദേഹം ഊന്നിപ്പറഞ്ഞു. ഖത്തറിനും അവിടുത്തെ ജനങ്ങൾക്കും അമേരിക്ക നൽകുന്ന പിന്തുണയ്ക്കും ഐക്യദാർഢ്യത്തിനും അമീർ ട്രംപിനോട് നന്ദി അറിയിച്ചു.

ആക്രമണത്തിൽ അമേരിക്കൻ സൈനികർക്കോ ഖത്തറി പൗരന്മാർക്കോ ജീവാപായമോ പരിക്കുകളോ സംഭവിച്ചിട്ടില്ലെന്ന് അമീർ ട്രംപിനെ അറിയിച്ചു. ഖത്തർ സായുധ സേനയുടെ സജ്ജീകരണവും ജാഗ്രതയും സ്വീകരിച്ച മുൻകരുതൽ നടപടികളുമാണ് ഇതിന് കാരണമെന്നും അദ്ദേഹം കൂട്ടിച്ചേർത്തു. മേഖലയിലെ സമാധാനത്തിനായി ഖത്തർ അമീർ നടത്തിയ ശ്രമങ്ങൾക്ക് പ്രസിഡന്റ് ട്രംപ് നന്ദി പറയുകയും ചെയ്തു.