അറസ്റ്റ് ഭയന്ന് വിമാനത്തിന്റെ റൂട്ട് മാറ്റി നെതന്യാഹു

വാഷിങ്ടൺ: യുദ്ധക്കുറ്റങ്ങളുടെ പേരിൽ അറസ്റ്റ് ചെയ്യപ്പെടാനുള്ള സാധ്യത ഭയന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു ഐക്യരാഷ്ട്രസഭാ സമ്മേളനത്തിന് പോകുന്ന യാത്രാമാർഗ്ഗം മാറ്റി. അദ്ദേഹത്തിന്റെ ഔദ്യോഗിക വിമാനമായ ‘വിങ്സ് ഓഫ് സായൻ’, അറസ്റ്റ് ഭീഷണി നിലനിൽക്കുന്ന യൂറോപ്യൻ രാജ്യങ്ങളുടെ വ്യോമാതിർത്തികൾ ഒഴിവാക്കി അധിക ദൂരം സഞ്ചരിച്ചതായി മാധ്യമങ്ങൾ റിപ്പോർട്ട് ചെയ്തു. ഈ റൂട്ട് മാറ്റം കാരണം വിമാനത്തിന് 600 കിലോമീറ്ററിലധികം അധികമായി പറക്കേണ്ടിവന്നു.

ഗാസയിലെ യുദ്ധക്കുറ്റങ്ങളുടെ പേരിൽ 2024 നവംബറിലാണ് അന്താരാഷ്ട്ര ക്രിമിനൽ കോടതി നെതന്യാഹുവിനും ഇസ്രായേലിൻ്റെ മുൻ പ്രതിരോധ മന്ത്രി യോവ് ഗാലൻ്റിനുമെതിരെ അറസ്റ്റ് വാറണ്ട് പുറപ്പെടുവിച്ചത്. തങ്ങളുടെ രാജ്യത്തിൻ്റെ വ്യോമാതിർത്തിയിൽ പ്രവേശിച്ചാൽ അദ്ദേഹത്തെ അറസ്റ്റ് ചെയ്യുമെന്ന് ചില യൂറോപ്യൻ രാജ്യങ്ങൾ മുന്നറിയിപ്പ് നൽകിയിരുന്നു. വിമാനം അടിയന്തരമായി നിലത്തിറക്കേണ്ട സാഹചര്യം ഒഴിവാക്കാനാണ് യൂറോപ്യൻ രാജ്യങ്ങൾക്ക് മുകളിലൂടെയുള്ള യാത്ര ഒഴിവാക്കിയത്.

യാത്രാപാത മാറ്റിയതിനെക്കുറിച്ച് ഇസ്രായേൽ ഔദ്യോഗികമായി പ്രതികരിച്ചിട്ടില്ല. തങ്ങളുടെ വ്യോമമേഖലയിലൂടെ പറക്കാൻ ഇസ്രായേൽ അനുമതി ചോദിച്ചിരുന്നുവെന്നും അത് നൽകിയെന്നും ഫ്രാൻസ് വ്യക്തമാക്കി. എങ്കിലും ഇസ്രായേൽ ആ റൂട്ട് ഉപയോഗിച്ചില്ല. യുഎൻ പൊതുസമ്മേളനത്തിൽ പങ്കെടുത്ത ശേഷം നെതന്യാഹു യുഎസ് പ്രസിഡന്റ് ട്രംപുമായി കൂടിക്കാഴ്ച നടത്താൻ പദ്ധതിയിട്ടിട്ടുണ്ട്.