ഇറാൻ ആക്രമണം തുടരുന്നു ഇസ്രായേലിലെ അമേരിക്കൻ എംബസി അടച്ചു

ടെൽ അവീവ്: ഇസ്രായേലിലെ യു.എസ്. എംബസി ഇന്ന് ബുധനാഴ്ച മുതൽ വെള്ളിയാഴ്ച വരെ അടച്ചിടുമെന്ന് അറിയിച്ചു. നിലവിലെ സുരക്ഷാ സാഹചര്യവും ഇസ്രായേൽ സൈന്യത്തിന്റെ നിർദ്ദേശങ്ങളും പാലിച്ചാണ് ഈ നടപടി. ഇസ്രായേലും ഇറാനും തമ്മിലുള്ള യുദ്ധം ആറാം ദിവസത്തിലേക്ക് കടന്നതോടെ നിരവധി രാജ്യങ്ങൾ തങ്ങളുടെ പൗരന്മാരെ ഒഴിപ്പിക്കാൻ തുടങ്ങി.

എംബസി ‘എക്സി’ൽ (X) പങ്കുവെച്ച പോസ്റ്റിൽ, ജറുസലേമിലെയും ടെൽ അവീവിലെയും കോൺസുലർ വിഭാഗങ്ങളും അടച്ചിടുമെന്ന് വ്യക്തമാക്കിയിട്ടുണ്ട്. ഇറാനുമായുള്ള പരസ്പര ആക്രമണങ്ങൾക്ക് ശേഷം ഇസ്രായേൽ സൈന്യത്തിന്റെ ആഭ്യന്തര മുന്നണി കമാൻഡിന്റെ നിർദ്ദേശമനുസരിച്ച്, കൂട്ടംകൂടുന്നത് നിരോധിച്ചിട്ടുണ്ട്. കൂടാതെ ജനങ്ങൾ ഷെൽട്ടറുകൾക്ക് സമീപം കഴിയണമെന്നും നിർദ്ദേശമുണ്ട്.

അതേസമയം, നിലവിൽ അമേരിക്കൻ പൗരന്മാരെ രാജ്യം വിടാൻ സഹായിക്കുന്നതിനെക്കുറിച്ച് ഔദ്യോഗികമായി ഒരു പ്രഖ്യാപനവും ഇല്ലെന്നും യു.എസ്. എംബസി പ്രസ്താവനയിൽ സൂചിപ്പിച്ചു. വർദ്ധിച്ചുവരുന്ന സുരക്ഷാ പിരിമുറുക്കങ്ങൾക്കിടയിൽ ചില ഇസ്രായേലികൾ രാജ്യം വിടാൻ ശ്രമിക്കുന്നതായി റിപ്പോർട്ടുകൾ വരുന്നതിനിടയിലാണ് ഈ പ്രസ്താവന.