ഇസ്രായേലിനെതിരെ ഇറാൻ ഉപയോഗിക്കുന്നത് ക്ലസ്റ്റർ മിസൈലുകൾ

ഇസ്രായേലിനെതിരെ ഇറാൻ നടത്തിയ ഏറ്റവും പുതിയ ആക്രമണത്തിൽ ക്ലസ്റ്റർ ബോംബുകൾ ഘടിപ്പിച്ച മിസൈലുകൾ ഉപയോഗിച്ചെന്ന് റോയിട്ടേഴ്സ് റിപ്പോർട്ട് ചെയ്തു. ഇസ്രായേൽ പ്രതിരോധ സേന (IDF) ഈ ആരോപണം സ്ഥിരീകരിച്ചിട്ടുണ്ട്. ഇസ്രായേലിലെ മധ്യഭാഗത്താണ് ഇറാൻ ആദ്യമായി ക്ലസ്റ്റർ ബോംബുകൾ പ്രയോഗിച്ചതെന്ന് ഇസ്രായേൽ സൈന്യം പറയുന്നു.വ്യാഴാഴ്ച ഇസ്രായേലിന് നേരെ ഇറാൻ തൊടുത്തുവിട്ട മിസൈലുകളിലൊന്ന് ക്ലസ്റ്റർ യുദ്ധോപകരണങ്ങൾ ഘടിപ്പിച്ചതായിരുന്നുവെന്ന് ഇസ്രായേൽ പ്രതിരോധ മന്ത്രാലയവും വാഷിംഗ്ടണിലെ ഇസ്രായേൽ എംബസിയും സ്ഥിരീകരിച്ചു.ഒരു മിസൈലിന്റെ വാർഹെഡ് ഏകദേശം 7 കിലോമീറ്റർ ഉയരത്തിൽ പൊട്ടിത്തെറിക്കുകയും ഏകദേശം 20 ചെറുബോംബുകൾ 8 കിലോമീറ്റർ ചുറ്റളവിൽ ചിതറിക്കുകയും ചെയ്തതായാണ് ഇസ്രായേൽ സൈന്യം റിപ്പോർട്ട് ചെയ്യുന്നത്. ഇതിൽ ഒരു ചെറുബോംബ് അസൂർ എന്ന മധ്യ ഇസ്രായേലിലെ ഒരു വീട്ടിൽ പതിക്കുകയും ചെറിയ നാശനഷ്ടങ്ങൾ വരുത്തുകയും ചെയ്തു.

ഒന്നിൽ നിന്ന് നിരവധി ചെറുബോംബുകളായി (submunitions) ചിതറിത്തെറിക്കാൻ രൂപകൽപ്പന ചെയ്ത ആയുധങ്ങളാണ് ക്ലസ്റ്റർ ബോംബുകൾ. ഇവ ഒരു വലിയ പ്രദേശത്ത് നാശം വിതയ്ക്കാൻ കഴിവുള്ളവയാണ്. ഈ ചെറുബോംബുകൾ ആകാശത്ത് വെച്ച് തന്നെ ചിതറിത്തെറിക്കുകയും ലക്ഷ്യസ്ഥാനത്ത് പതിക്കുകയും ചെയ്യും. ഈ ബോംബുകളുടെ പ്രധാന പ്രശ്നം, പല ചെറുബോംബുകളും ആദ്യ സ്ഫോടനത്തിൽ പൊട്ടാതിരിക്കുകയും വർഷങ്ങളോളം നിലത്ത് കിടന്ന് സാധാരണക്കാർക്ക് അപകടമുണ്ടാക്കുകയും ചെയ്യാം എന്നതാണ്.