ഒക്ടോബർ 7 മോഡൽ ആക്രമണവുമായി ഇസ്രായേലിനെ ഞെട്ടിച്ച് വീണ്ടും ഹമാസ്, അമ്പരപ്പിക്കുന്ന പ്രത്യാക്രമണം

ഇസ്രായേലിനെ ഞെട്ടിച്ചുകൊണ്ട് ഖാൻ യൂനിസിൽ വൻ പ്രത്യാക്രമണം നടത്തി ഹമാസിന്റെ സൈനിക വിഭാഗമായ അൽ-ഖസ്സാം ബ്രിഗേഡ്. ഒക്ടോബർ 7-ന് സമാനമായ ശൈലി പിന്തുടർന്ന ഹമാസ്, ഇസ്രായേലി സൈനിക പോസ്റ്റുകൾക്ക് നേരെ അപ്രതീക്ഷിതവും ശക്തവുമായ ആക്രമണം നടത്തുകയായിരുന്നു. സൈന്യം പുറത്തുവിട്ട ഔദ്യോഗിക വാദങ്ങളെ തള്ളിക്കളയുന്ന ദൃശ്യങ്ങൾ പുറത്തുവന്നതോടെ സംഭവം ഇസ്രായേലിന് കനത്ത തിരിച്ചടിയായി.

ഒക്ടോബർ 7 മോഡൽ കടന്നുകയറ്റത്തിന് സമാനമായിരുന്നു ഖാൻ യൂനിസിലെ അൽ-ഖസ്സാമിന്റെ നീക്കം. നിരീക്ഷണ ക്യാമറകളും പ്രതിരോധ സംവിധാനങ്ങളും തകർത്തുകൊണ്ട് ഇസ്രായേലി സൈനികർ തമ്പടിച്ചിരുന്ന കെട്ടിടത്തിലേക്ക് ഇരച്ചുകയറിയ ഹമാസ് പോരാളികൾ, ഗ്രനേഡുകളും തോക്കുകളും ഉപയോഗിച്ച് മിന്നലാക്രമണം നടത്തുകയായിരുന്നു. ഒരു പോറൽ പോലുമേൽക്കാതെ മുഴുവൻ സംഘവും സുരക്ഷിതമായി പിൻവാങ്ങിയെന്ന് അൽ-ഖസ്സാം വൃത്തങ്ങൾ വ്യക്തമാക്കുന്നു.

ആക്രമണത്തിന് പിന്നാലെ, ഹമാസ് പോരാളികളെ വധിച്ച് തിരിച്ചടി നൽകി എന്നവകാശപ്പെട്ട് ഇസ്രായേൽ സൈന്യം ഒരു വീഡിയോ പുറത്തുവിട്ടു. എന്നാൽ, മണിക്കൂറുകൾക്കകം ഈ വാദങ്ങളെല്ലാം പൊളിച്ചടുക്കുന്ന ദൃശ്യങ്ങൾ പുറത്തുവന്നു. ഒന്നര മിനിറ്റിലധികം ദൈർഘ്യമുള്ള വീഡിയോയിൽ, എട്ടോളം അൽ-ഖസ്സാം പോരാളികൾ തികച്ചും ശാന്തരായി, ആയുധങ്ങളുമായി ഒരു തുരങ്കത്തിലേക്ക് മടങ്ങുന്നത് വ്യക്തമാണ്. ഇത് ഇസ്രായേലിന്റെ സൈനിക വാദങ്ങളുടെ വിശ്വാസ്യതയെ പൂർണ്ണമായും തകർത്തു.

ഹമാസിന്റെ അപ്രതീക്ഷിത പ്രത്യാക്രമണങ്ങൾ ഗാസയിൽ ഇസ്രായേൽ നേരിടുന്ന കടുത്ത വെല്ലുവിളികളിലേക്കാണ് വിരൽ ചൂണ്ടുന്നത്. സൈന്യത്തിൽ നിലവിൽ 12,000-ത്തോളം സൈനികരുടെ കുറവുണ്ടെന്ന റിപ്പോർട്ടുകൾക്കിടെയാണ് ഹമാസിന്റെ ഈ മുന്നേറ്റം. ഗാസയിലെ യുദ്ധം ഇസ്രായേലിന്റെ ദേശീയ സുരക്ഷയെയും അന്താരാഷ്ട്ര തലത്തിലുള്ള വിശ്വാസ്യതയെയും ഗുരുതരമായി ബാധിക്കുന്നതായി രാജ്യത്തെ പ്രമുഖ സുരക്ഷാ പഠന സ്ഥാപനങ്ങൾ തന്നെ സമ്മതിക്കുന്നു.

ഇതിനിടെ, ഗാസയിൽ കൊല്ലപ്പെടുന്ന സാധാരണക്കാരുടെ എണ്ണം 83% വരെ എത്തിയതായും, കൊല്ലപ്പെടുന്ന പലസ്തീനികളെ സൈന്യം ഭീകരരായി മുദ്രകുത്തുന്നതായും പുറത്തുവന്ന സൈനിക രേഖകളെ ഉദ്ധരിച്ചുള്ള റിപ്പോർട്ടുകൾ സ്ഥിതിഗതികളുടെ ഭീകരത വർധിപ്പിക്കുന്നു.