Skip to content
Opinion

ആക്ഷൻ സോങ്ങ് വിവാദം വീണ്ടും കത്തിക്കുന്നത് ആർക്കുവേണ്ടി? അല്ലപ്ര സ്കൂൾ വിവാദത്തിന് പിന്നിലെ കാണാച്ചരടുകൾ

വിഷയം രമ്യമായി പരിഹരിക്കപ്പെട്ട ശേഷവും എസ്.ഡി.പി.ഐ പോലുള്ള സംഘടനകൾ പ്രതിഷേധ റാലിയുമായി മുന്നോട്ട് പോകുന്നതിന് പിന്നിൽ കൃത്യമായ രാഷ്ട്രീയ ലക്ഷ്യങ്ങളുണ്ട്. എസ്.എഫ്.ഐ, ഡി.വൈ.എഫ്.ഐ അടക്കമുള്ള ഇടതുപക്ഷ യുവജന-വിദ്യാർത്ഥി സംഘടനകൾ ഇക്കാര്യത്തിൽ തുടക്കം മുതലേ മൗനം പാലിച്ചപ്പോൾ, അധ്യാപകരെ പുറത്താക്കണമെന്നും പോലീസ് ഇരട്ടത്താപ്പ് കാണിക്കുകയാണെന്നും ആരോപിച്ചാണ് എസ്.ഡി.പി.ഐ സമരം പ്രഖ്യാപിച്ചിരിക്കുന്നത്.

W

web desk

Published on: 16 Nov 2026, 9:04 pm

ആക്ഷൻ സോങ്ങ് വിവാദം വീണ്ടും കത്തിക്കുന്നത് ആർക്കുവേണ്ടി? അല്ലപ്ര സ്കൂൾ വിവാദത്തിന് പിന്നിലെ കാണാച്ചരടുകൾ

ജോർജ് മാത്യു ഓടക്കാലി

രാഷ്ട്രീയത്തിൽ സ്ഥിരമായ ശത്രുക്കളോ മിത്രങ്ങളോ ഇല്ല, സ്ഥിരമായ താൽപ്പര്യങ്ങൾ മാത്രമേയുള്ളൂ എന്ന ചൊല്ല് ഒരിക്കൽക്കൂടി ശരിവെക്കുന്ന സംഭവവികാസങ്ങൾക്കാണ് മധ്യകേരളം ഇപ്പോൾ സാക്ഷ്യം വഹിക്കുന്നത്. പെരുമ്പാവൂർ അല്ലപ്ര സെന്റ് മേരീസ് സ്കൂളിലെ യുകെജി കുട്ടികൾ അവതരിപ്പിച്ച ഒരു ഗാനത്തിന്റെ പേരിലുണ്ടായ വിവാദവും, അതിനെത്തുടർന്ന് എസ്.ഡി.പി.ഐയും അവരുടെ യുവജന വിഭാഗവും പ്രഖ്യാപിച്ചിട്ടുള്ള സമരപരിപാടികളും കേരളത്തിലെ രാഷ്ട്രീയ അന്തരീക്ഷത്തെ പുതിയൊരു ദിശയിലേക്ക് ചൂടുപിടിപ്പിക്കുകയാണ്. കേവലം ഒരു സ്കൂൾ കലോത്സവത്തിലെ പിഴവ് എന്നതിനപ്പുറം, ഇതിന് പിന്നിൽ കൃത്യമായ രാഷ്ട്രീയ അടിയൊഴുക്കുകളുണ്ടെന്നത് വ്യക്തമാണ്. യാക്കോബായ സഭയുടെ പുതിയ രാഷ്ട്രീയ നിലപാടുകളും, എറണാകുളം-ഇടുക്കി മേഖലകളിലെ തിരഞ്ഞെടുപ്പ് കണക്കുകൂട്ടലുകളുമാണ് ഈ വിവാദത്തെ ആളിക്കത്തിക്കുന്നത്.

വിവാദത്തിന്റെ തുടക്കവും ഒത്തുതീർപ്പും

നവംബർ 10-ന് ആലുവ മഹിളാലയം സ്കൂളിൽ നടന്ന സി.ബി.എസ്.ഇ കലോത്സവത്തിൽ അല്ലപ്ര സെന്റ് മേരീസ് സ്കൂളിലെ യുകെജി വിദ്യാർത്ഥികൾ വേദിയിൽ അവതരിപ്പിച്ച ആക്ഷൻ സോങ്ങാണ് വിവാദങ്ങൾക്ക് തിരികൊളുത്തിയത്. ആ പാട്ടിലെ വരികളും ദൃശ്യാവിഷ്കാരവും തെറ്റായിരുന്നു എന്ന കാര്യത്തിൽ ആർക്കും തർക്കമില്ല. അറബി വേഷം ധരിച്ചവരെ കള്ളന്മാരും ഭീകരരുമായി ചിത്രീകരിക്കുകയും, ട്രെയിനിൽ കയറി ഭീതി പരത്തുന്നവരും പാളത്തിൽ ബോംബ് വെച്ച് ഓടുന്നവരുമായി അവതരിപ്പിക്കുകയും ചെയ്തതിനെതിരെ വേദിയിൽ വെച്ചുതന്നെ പ്രതിഷേധം ഉയർന്നു.

വാർത്ത കാട്ടുതീ പോലെ പടർന്നതോടെ പൗരപ്രമുഖരും, ബെന്നി ബഹനാൻ അടക്കമുള്ള ജനപ്രതിനിധികളും, വിവിധ യുവജന സംഘടനകളും വിഷയത്തിൽ ഇടപെട്ടു. ഇതിന്റെ ഫലമായി സ്കൂൾ അധികൃതർ നിരുപാധികം മാപ്പ് പറയാൻ സന്നദ്ധത പ്രകടിപ്പിക്കുകയും പ്രശ്നം രമ്യമായി പരിഹരിക്കപ്പെടുകയും ചെയ്തു. സിറിയ ആസ്ഥാനമായുള്ള അന്ത്യോഖ്യാ പാത്രിയാർക്കീസിന് കീഴിലുള്ള യാക്കോബായ സഭയുടെ സ്ഥാപനമാണിത്. അറബ് ലോകവുമായി അടുത്ത സാംസ്കാരികവും ചരിത്രപരവുമായ ബന്ധമുള്ള സഭയ്ക്ക് ഒരിക്കലും അറബ് സമൂഹത്തോട് വിദ്വേഷം പ്രചരിപ്പിക്കാൻ കഴിയില്ലെന്നതും യാഥാർത്ഥ്യമാണ്. അതുകൊണ്ടുതന്നെ സ്കൂൾ അധികൃതരുടെ ഖേദപ്രകടനത്തോടെ ഈ വിഷയം ഒരു അടഞ്ഞ അധ്യായമാകേണ്ടതായിരുന്നു.

യാക്കോബായ സഭയുടെ രാഷ്ട്രീയ മാറ്റവും ഇടതുപക്ഷത്തിന്റെ തിരിച്ചടിയും

എന്നാൽ, ഒത്തുതീർപ്പായ ഒരു വിഷയത്തെ വീണ്ടും ആളിക്കത്തിക്കുന്നതിന് പിന്നിലെ രാഷ്ട്രീയ പശ്ചാത്തലം മനസ്സിലാക്കണമെങ്കിൽ അടുത്തിടെ യാക്കോബായ സഭയിലുണ്ടായ നിലപാട് മാറ്റങ്ങൾ പരിശോധിക്കേണ്ടതുണ്ട്. പതിറ്റാണ്ടുകളായി ഇടതുപക്ഷത്തോട് ചേർന്നുനിന്നിരുന്ന യാക്കോബായ സഭ, സഭാ ആസ്ഥാനത്ത് നടന്ന മഹാസമ്മേളനത്തോടെ യു.ഡി.എഫുമായി അടുക്കുന്നതിന്റെ വ്യക്തമായ സൂചനകളാണ് നൽകിയത്. ചർച്ച് ബിൽ നടപ്പാക്കാത്തതിലുള്ള അതൃപ്തിയും മറ്റ് കാരണങ്ങളും സഭയെ ഇടതുപക്ഷത്തുനിന്ന് അകറ്റി.

ഈ രാഷ്ട്രീയ മാറ്റം എറണാകുളം, ഇടുക്കി ജില്ലകളിലെ തിരഞ്ഞെടുപ്പ് ഫലങ്ങളിൽ ഇടതുപക്ഷത്തിന് വലിയ തിരിച്ചടിയായി മാറിയിരുന്നു. പെരുമ്പാവൂർ, കോതമംഗലം, മൂവാറ്റുപുഴ, കുന്നത്തുനാട്, ഇടുക്കി തുടങ്ങിയ മണ്ഡലങ്ങളിൽ ഇടതുപക്ഷത്തിനുണ്ടായ നഷ്ടത്തിന് പിന്നിൽ യാക്കോബായ സഭയുടെ പിന്തുണ നഷ്ടപ്പെട്ടതാണെന്നത് വ്യക്തമാണ്. ഈ രാഷ്ട്രീയ സാഹചര്യം നിലനിൽക്കെയാണ് അല്ലപ്ര സെന്റ് മേരീസ് സ്കൂളിലെ സംഭവമുണ്ടാകുന്നത്.

പ്രതിഷേധങ്ങൾക്ക് പിന്നിലെ രാഷ്ട്രീയ ലക്ഷ്യങ്ങൾ

വിഷയം രമ്യമായി പരിഹരിക്കപ്പെട്ട ശേഷവും എസ്.ഡി.പി.ഐ പോലുള്ള സംഘടനകൾ പ്രതിഷേധ റാലിയുമായി മുന്നോട്ട് പോകുന്നതിന് പിന്നിൽ കൃത്യമായ രാഷ്ട്രീയ ലക്ഷ്യങ്ങളുണ്ട്. എസ്.എഫ്.ഐ, ഡി.വൈ.എഫ്.ഐ അടക്കമുള്ള ഇടതുപക്ഷ യുവജന-വിദ്യാർത്ഥി സംഘടനകൾ ഇക്കാര്യത്തിൽ തുടക്കം മുതലേ മൗനം പാലിച്ചപ്പോൾ, അധ്യാപകരെ പുറത്താക്കണമെന്നും പോലീസ് ഇരട്ടത്താപ്പ് കാണിക്കുകയാണെന്നും ആരോപിച്ചാണ് എസ്.ഡി.പി.ഐ സമരം പ്രഖ്യാപിച്ചിരിക്കുന്നത്.

യാക്കോബായ സഭയെ രാഷ്ട്രീയമായി പ്രതിരോധത്തിലാക്കാനും, സഭയുടെ ശക്തികേന്ദ്രങ്ങളായ പെരുമ്പാവൂർ മേഖലയിൽ വർഗീയ ധ്രുവീകരണമുണ്ടാക്കാനുമാണ് ഈ നീക്കം. ഇതിന് പിന്നിൽ ഇടതുപക്ഷത്തിന്റെ പരോക്ഷ പിന്തുണയുണ്ടോ എന്ന് സംശയിക്കുന്നവരെ കുറ്റം പറയാനാവില്ല. തങ്ങളെ കൈവിട്ട യാക്കോബായ സഭയോടുള്ള രാഷ്ട്രീയ പകപോക്കലായും, നഷ്ടപ്പെട്ട വോട്ട് ബാങ്കിന് പകരം പുതിയ സമവാക്യങ്ങൾ ഉണ്ടാക്കാനുള്ള ശ്രമമായുമാണ് ഈ നീക്കങ്ങളെ വിലയിരുത്തേണ്ടത്. മുമ്പ് ജോസഫ് മാഷ് വിഷയത്തിലുണ്ടായതിന് സമാനമായ രീതിയിൽ ഒരു ചെറിയ വീഴ്ചയെ സമുദായങ്ങള്‍ തമ്മില്‍ അകലുന്ന വിധം വലിയൊരു വിദ്വേഷ പ്രചാരണമാക്കി മാറ്റാനാണ് ഇവിടെ ശ്രമം നടക്കുന്നത്.

അപകടകരമായ രാഷ്ട്രീയ നാടകം

ചുരുക്കത്തിൽ, അല്ലപ്ര സ്കൂളിന്റെ പടിക്കൽ നിന്ന് ഉയരുന്ന പ്രതിഷേധ ശബ്ദങ്ങൾ കേവലം ഒരു പാട്ടിന്റെ പേരിലുള്ളതല്ല; മറിച്ച് വരുംകാല തിരഞ്ഞെടുപ്പുകളെ ലക്ഷ്യം വെച്ചുള്ള രാഷ്ട്രീയ കരുനീക്കങ്ങളുടെ തുടക്കമാണ്. സമുദായ സമവാക്യങ്ങളും, വോട്ട് ബാങ്ക് രാഷ്ട്രീയവും, പകപോക്കലുകളും എല്ലാം കൂടിക്കുഴഞ്ഞ ഒരു രാഷ്ട്രീയ നാടകമായി ഇത് മാറിക്കഴിഞ്ഞു.

മാപ്പ് പറയാമെന്നും വീഴ്ച പരിശോധിക്കാമെന്നും സ്കൂൾ അധികൃതർ സമ്മതിച്ചപ്പോൾ തന്നെ അവസാനിപ്പിക്കേണ്ട ഒരു വിഷയത്തെ ആളിക്കത്തിക്കുന്നത് വഴി കേരളത്തിന്റെ മതസൗഹാർദ്ദ അന്തരീക്ഷത്തിന് വലിയ ആഘാതമാണ് ഏൽക്കുന്നത്. താൽക്കാലിക രാഷ്ട്രീയ ലാഭങ്ങൾക്കായി വിഭാഗീയതയുടെ തീപ്പൊരികൾ വിതറുമ്പോൾ, അത് നാടിന്റെ സമാധാനത്തെ എങ്ങനെ ബാധിക്കുമെന്ന് ബന്ധപ്പെട്ടവർ ചിന്തിക്കേണ്ടിയിരിക്കുന്നു. വരും ദിവസങ്ങളിൽ ഈ വിഷയം രാഷ്ട്രീയ കേരളത്തിൽ എന്ത് പ്രതിഫലനങ്ങളാണ് ഉണ്ടാക്കുകയെന്ന് കാത്തിരുന്നു കാണാം.

Related Stories