ഹാളണ്ടിന്റെ ഇരട്ട ‘അടി’; കാനറികളുടെ നെഞ്ചുതകർന്നു, നോർവേ ലോകകപ്പ് ക്വാർട്ടറിൽ, ബ്രസീൽ പുറത്ത് (2-1)

ന്യൂജഴ്സി: ചരിത്രം തിരുത്തിക്കുറിക്കാനിറങ്ങിയ ബ്രസീലിനെ ചരിത്രത്തിന്റെ തനിയാവർത്തനത്തിലൂടെ വീഴ്ത്തി നോർവേ ഫിഫ ലോകകപ്പ് ക്വാർട്ടർ ഫൈനലിൽ. ആവേശകരമായ പ്രീ ക്വാർട്ടർ പോരാട്ടത്തിൽ ഒന്നിനെതിരെ രണ്ട് ഗോളുകൾക്കാണ് നോർവേ കാനറിപ്പടയെ തറപ്പറ്റിച്ചത്. നോർവേയ്ക്കായി സൂപ്പർ താരം എർലിങ് ഹാളണ്ട് ഇരട്ട ഗോളുകൾ നേടിയപ്പോൾ, ഇൻജറി ടൈമിൽ പെനാൽറ്റിയിലൂടെ നെയ്മാറാണ് ബ്രസീലിന്റെ ആശ്വാസ ഗോൾ കണ്ടെത്തിയത്. ഈ തോൽവിയോടെ 1990-ന് ശേഷം ആദ്യമായി ബ്രസീൽ ലോകകപ്പിന്റെ പ്രീ ക്വാർട്ടറിൽ പുറത്താകുന്ന നാണക്കേടും നേരിട്ടു.

ആദ്യ പകുതിയിൽ ഇരു ടീമുകൾക്കും നിരവധി അവസരങ്ങൾ ലഭിച്ചെങ്കിലും ഗോൾ മാത്രം അകന്നുനിന്നു. മത്സരത്തിന്റെ 14–ാം മിനിറ്റിൽ ലീഡെടുക്കാനുള്ള സുവർണാവസരം ബ്രസീൽ പാഴാക്കിയിരുന്നു. മത്തേയൂസ് കുഞ്ഞയെ ഫൗൾ ചെയ്തതിന് വാർ (VAR) പരിശോധനയ്ക്ക് ശേഷം ലഭിച്ച പെനാൽറ്റി എടുത്ത മിഡ്ഫീൽഡർ ബ്രൂണോ ഗിമാറസിന്റെ ഷോട്ട് നോർവീജിയൻ ഗോൾകീപ്പർ ഓറിയൻ നെയ്‌ലാൻഡ് തകർപ്പൻ സേവിലൂടെ തടയുകയായിരുന്നു. മൂന്നാം മിനിറ്റിൽ നോർവേ താരം പാട്രിക് ബെർഗ് വലകുലുക്കിയെങ്കിലും ഓഫ്‌സൈഡ് വിധി വന്നത് ബ്രസീലിന് തുണയായി.

രണ്ടാം പകുതിയിൽ നോർവേ താരം ആൻഡ്രിയാസ് ഷെൽഡ്രൂപ്പ് സബ്സ്റ്റിറ്റ്യൂട്ടായി കളത്തിലിറങ്ങിയതോടെയാണ് മത്സരത്തിന്റെ ഗതി മാറിയത്. 79–ാം മിനിറ്റിൽ ഷെൽഡ്രൂപ്പ് ഇടതുവശത്ത് നിന്ന് നൽകിയ മനോഹരമായ ക്രോസ്, ബോക്സിനുള്ളിൽ ഉയർന്നുചാടിയ ഏർലിങ് ഹാളണ്ട് ശക്തമായ ഹെഡ്ഡറിലൂടെ വലയിലെത്തിച്ച് നോർവേയ്ക്ക് ലീഡ് നൽകി. തുടർന്ന് മത്സരത്തിന്റെ നിശ്ചിത സമയം അവസാനിക്കാൻ തൊട്ടുമുൻപ് (90-ാം മിനിറ്റിൽ) വീണ്ടും ഷെൽഡ്രൂപ്പിന്റെ അസിസ്റ്റിൽ നിന്ന് പന്ത് സ്വീകരിച്ച് ഹാളണ്ട് ഉതിർത്ത ശക്തമായ ലോ ഷോട്ട് ബ്രസീൽ കീപ്പർ അലിസണെ കാഴ്ചക്കാരനാക്കി വലതുമൂലയിലേക്ക് തുളച്ചുകയറി. ഇതോടെ ഹാളണ്ടിന്റെ ഈ ലോകകപ്പിലെ ഗോൾ നേട്ടം ഏഴായി ഉയർന്നു.

മത്സരത്തിന്റെ അവസാന നിമിഷങ്ങളിൽ ഇൻജറി ടൈമിൽ ലഭിച്ച പെനാൽറ്റി ലക്ഷ്യത്തിലെത്തിച്ച് സൂപ്പർ താരം നെയ്മാർ ബ്രസീലിന്റെ തോൽവിയുടെ ഭാരം കുറച്ചെങ്കിലും പരാജയം ഒഴിവാക്കാൻ അത് മതിയാകുമായിരുന്നില്ല. ഈ ലോകകപ്പിലെ നെയ്മാറിന്റെ ആദ്യത്തെയും അവസാനത്തെയും ഗോളായി ഇത് മാറി. 1998 ലോകകപ്പിലും ബ്രസീലിനെ നോർവേ ഇതേ സ്കോറിനാണ് (2-1) തോൽപ്പിച്ചിരുന്നത്. ഈ പരാജയത്തോടെ, 2002-ലെ അഞ്ചാം കിരീട നേട്ടത്തിന് ശേഷം തുടർച്ചയായ ആറാം ലോകകപ്പിലാണ് ബ്രസീൽ കിരീടമില്ലാതെ കണ്ണീരോടെ മടങ്ങുന്നത്. ഒപ്പം നോർവേയ്‌ക്കെതിരെ ഇതുവരെ ഒരു മത്സരം പോലും ജയിച്ചിട്ടില്ലെന്ന നാണക്കേടും ബ്രസീലിനെ ഇനിയും പിന്തുടരും.