അർജന്റീനയുടെ കൗമാരതാരത്തെ സ്വന്തമാക്കി റയൽ മാഡ്രിഡ്

മാഡ്രിഡ്: അർജന്റീനിയൻ ക്ലബ് റിവർ പ്ലേറ്റിന്റെ യുവമിഡ്ഫീൽഡർ ഫ്രാങ്കോ മാസ്റ്റന്റോണോയുമായി റയൽ മാഡ്രിഡ് ദീർഘകാല കരാറിൽ ഒപ്പുവെച്ചു. അടുത്ത ആറ് സീസണുകളിൽ താരം റയൽ മാഡ്രിഡിനൊപ്പം ചേരുമെന്ന് ക്ലബ് ഔദ്യോഗിക പ്രസ്താവനയിൽ അറിയിച്ചു.

17 വയസ്സ് മാത്രം പ്രായമുള്ള യുവതാരം 2025 ഓഗസ്റ്റ് 14 മുതൽ 2031 ജൂൺ 30 വരെ റയൽ മാഡ്രിഡിൽ തുടരും.

മാസ്റ്റന്റോണോ റിവർ പ്ലേറ്റിന്റെ യൂത്ത് അക്കാദമിയിലൂടെ വളർന്നുവന്ന താരമാണ്. 2019 മുതൽ 2024 വരെ അദ്ദേഹം റിവർ പ്ലേറ്റിനൊപ്പം കളിക്കുകയും, 2024-2025 സീസണിൽ സീനിയർ ടീമിന്റെ ഭാഗമാകുകയും ചെയ്തിട്ടുണ്ട്.

റിവർ പ്ലേറ്റിന്റെ ചരിത്രത്തിലെ ഏറ്റവും പ്രായം കുറഞ്ഞ ഗോൾവേട്ടക്കാരൻ എന്ന റെക്കോർഡ് 2024 ഫെബ്രുവരിയിൽ ഫ്രാങ്കോ മാസ്റ്റന്റോണോ സ്വന്തമാക്കിയിരുന്നു. കൂടാതെ, 17-ാം വയസ്സിൽ അർജന്റീന ദേശീയ ടീമിനായി ഔദ്യോഗിക മത്സരത്തിൽ കളിക്കുന്ന ഏറ്റവും പ്രായം കുറഞ്ഞ താരം എന്ന നേട്ടവും അദ്ദേഹം കൈവരിച്ചു. ഇത് ലയണൽ മെസ്സിയെ പോലുള്ള ടാംഗോയിലെ ഇതിഹാസങ്ങളെ പോലും മറികടക്കുന്ന നേട്ടമാണ്.

നേരത്തെ, നിലവിലെ വേനൽക്കാല ട്രാൻസ്ഫർ വിൻഡോയിൽ, റയൽ മാഡ്രിഡ് ഇംഗ്ലീഷ് ക്ലബ് ലിവർപൂളിൽ നിന്ന് റൈറ്റ് ബാക്ക് താരം ട്രെന്റ് അലക്സാണ്ടർ-ആർനോൾഡിനെയും, ബോൺമൗത്തിൽ നിന്ന് ഡിഫൻഡർ ഡീൻ ഹ്യൂസനെയും ടീമിലെത്തിച്ചിരുന്നു.