ഓസ്‌ട്രേലിയക്കെതിരെ വിൻഡീസ് 27 റൺസിന് ഓൾ ഔട്ട്

കിംഗ്സ്റ്റൺ: ഓസ്ട്രേലിയക്കെതിരായ മൂന്നാം ടെസ്റ്റ് മത്സരത്തിൽ വെസ്റ്റ് ഇൻഡീസ് 27 റൺസിന് ഓൾ ഔട്ടായി ടെസ്റ്റ് ക്രിക്കറ്റ് ചരിത്രത്തിലെ ഏറ്റവും കുറഞ്ഞ രണ്ടാമത്തെ സ്കോർ എന്ന നാണക്കേടിന്റെ റെക്കോർഡ് സ്വന്തമാക്കി. 176 റൺസിനാണ് ഓസ്ട്രേലിയ ഈ മത്സരം വിജയിച്ച് മൂന്ന് മത്സരങ്ങളടങ്ങിയ പരമ്പര തൂത്തുവാരിയത്.

204 റൺസ് വിജയലക്ഷ്യം പിന്തുടർന്നിറങ്ങിയ വെസ്റ്റ് ഇൻഡീസ് വെറും 27 റൺസിന് എല്ലാവരും പുറത്താവുകയായിരുന്നു. വിൻഡീസ് നിരയിൽ ഒരാൾക്ക് മാത്രമാണ് രണ്ടക്കം കാണാൻ സാധിച്ചത് (ജസ്റ്റിൻ ഗ്രീവ്സ് – 11). ഏഴ് ബാറ്റ്സ്മാൻമാർ പൂജ്യത്തിന് പുറത്തായി.

കരിയറിലെ 100-ാം ടെസ്റ്റ് കളിച്ച മിച്ചൽ സ്റ്റാർക്ക് രണ്ടാം ഇന്നിംഗ്സിൽ 6 വിക്കറ്റുകൾ വീഴ്ത്തി വിൻഡീസ് ബാറ്റിംഗ് നിരയെ തകർത്തു. ടെസ്റ്റ് ക്രിക്കറ്റിൽ ഏറ്റവും വേഗത്തിൽ അഞ്ച് വിക്കറ്റ് നേടുന്ന താരം എന്ന റെക്കോർഡും (15 പന്തുകൾ) സ്റ്റാർക്ക് സ്വന്തമാക്കി.

ടെസ്റ്റ് ക്രിക്കറ്റ് ചരിത്രത്തിലെ ഏറ്റവും കുറഞ്ഞ സ്കോർ 1955-ൽ ഇംഗ്ലണ്ടിനെതിരെ ന്യൂസിലൻഡ് നേടിയ 26 റൺസാണ്. അതിന് ശേഷം ഇത്രയും കുറഞ്ഞ സ്കോറിന് ഒരു ടീം ഓൾ ഔട്ടാകുന്നത് ഇതാദ്യമാണ്.