ഏഷ്യ കപ്പ്: സൂപ്പർ ഓവറിൽ സൂപ്പറായി ഇന്ത്യ, ശ്രീലങ്ക പൊരുതി വീണു

ഏഷ്യാ കപ്പില്‍ ഇന്ത്യയും ശ്രീലങ്കയും തമ്മില്‍ നടന്ന അവസാന സൂപ്പര്‍ ഫോര്‍ മത്സരം ആവേശകരമായാണ് അവസാനിച്ചത്. മത്സരം ടൈ ആയതോടെ സൂപ്പര്‍ ഓവറിലാണ് ഇന്ത്യ ജയം സ്വന്തമാക്കിയത്. സൂപ്പര്‍ ഓവറിനിടെ ശ്രീലങ്കന്‍ താരം ദസുന്‍ ഷാനകയുടെ വിക്കറ്റുമായി ബന്ധപ്പെട്ട് നാടകീയ രംഗങ്ങളാണ് മൈതാനത്ത് അരങ്ങേറിയത്.

ഈ ഏഷ്യാകപ്പിലെ ഏറ്റവുമുയർന്ന സ്കോറായ 202 റൺസ് ഉയർത്തിയ ഇന്ത്യക്കെതിരെ ലങ്ക നടത്തിയത് തീപാറും പോരാട്ടം. 58 പന്തിൽ 107 റൺസുമായി പാതും നിസാങ്ക നടത്തിയ പോരാട്ടത്തിന്റെ മിടുക്കിൽ ലങ്ക പൊരുതിയപ്പോൾ മത്സരം കലാശിച്ചത് ടൈയിൽ. ഏഴ് ബൗണ്ടറിയും ആറ് സിക്സറുമടക്കമായിരുന്നു നിസാങ്കയുടെ സെഞ്ച്വറി. അവസാന ഓവറുകളിൽ ഇന്ത്യ താളം വീണ്ടെടുത്തതോടെ മത്സരം സൂപ്പർ ഓവറിലേക്ക് നീണ്ടു. സൂപ്പർ ഓവറിൽ ഇന്ത്യക്കായി അർഷ്ദീപ് ഉജ്ജ്വലമായി പന്തെറിഞ്ഞതോടെ ലങ്കക്ക് കുറിക്കാനായത് രണ്ട് റൺസ് മാത്രം. മറുപടി ബാറ്റിങ്ങിൽ ഇന്ത്യ ആദ്യപന്തിൽ ലക്ഷ്യം മറികടന്നു.