കേരളത്തിലും എസ്‌ഐആര്‍, വോട്ടര്‍ പട്ടിക ഇന്ന് അര്‍ധ രാത്രിയോടെ മരവിപ്പിക്കും

രാജ്യവ്യാപക വോട്ടർപട്ടികാ പരിഷ്കരണത്തിനായുള്ള സ്പെഷ്യൽ ഇൻ്റൻസീവ് റിവിഷൻ (എസ്.ഐ.ആർ.) ൻ്റെ രണ്ടാം ഘട്ടത്തിനായുള്ള ഷെഡ്യൂൾ കേന്ദ്ര തെരഞ്ഞെടുപ്പ് കമ്മീഷൻ പ്രഖ്യാപിച്ചു. ആദ്യഘട്ടത്തിൽ ഒൻപത് സംസ്ഥാനങ്ങളിലും മൂന്ന് കേന്ദ്രഭരണ പ്രദേശങ്ങളിലുമായി എസ്.ഐ.ആർ. നടപ്പാക്കുമെന്നാണ് കേന്ദ്ര മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ വാർത്താസമ്മേളനത്തിൽ വ്യക്തമാക്കിയത്. ഇതിൻ്റെ ഭാഗമായി കേരളത്തിലും ഇന്ന് അർധരാത്രി മുതൽ നടപടിക്രമങ്ങൾ ആരംഭിക്കുന്നതാണ്.

എന്നാൽ, കേരളത്തിലെ തദ്ദേശ തെരഞ്ഞെടുപ്പ് നടക്കാനിരിക്കുന്ന സാഹചര്യം കണക്കിലെടുത്ത് എസ്.ഐ.ആർ. നടപടികൾ നീട്ടിവെക്കണമെന്ന് സംസ്ഥാനത്തെ വിവിധ രാഷ്ട്രീയ കക്ഷികൾ ആവശ്യമുന്നയിച്ചിരുന്നു. ഈ ആവശ്യം തെരഞ്ഞെടുപ്പ് കമ്മീഷൻ തള്ളിക്കളഞ്ഞു. എങ്കിലും, കേരളത്തിൽ തദ്ദേശ തെരഞ്ഞെടുപ്പിനെ എസ്.ഐ.ആർ. നടപടിക്രമങ്ങൾ ബാധിക്കില്ലെന്നാണ് തെരഞ്ഞെടുപ്പ് കമ്മീഷൻ വിശദീകരണം നൽകിയിരിക്കുന്നത്.

എസ്.ഐ.ആർ. നടപ്പിലാക്കുന്ന ഈ സംസ്ഥാനങ്ങളിലെ നിലവിലെ വോട്ടർപട്ടിക ഇന്ന് അർധരാത്രി മുതൽ മരവിപ്പിക്കും. ഇതിനായുള്ള പ്രാഥമിക നടപടികൾ നാളെ (ഒക്ടോബർ 28) മുതൽ നവംബർ മൂന്നാം തീയതി വരെ നടക്കും. ഇതിന് പിന്നാലെ, നവംബർ നാല് മുതൽ ഡിസംബർ നാല് വരെ വീടുകൾ കയറിയുള്ള വിവരശേഖരണവും പൂർത്തിയാക്കുന്നതാണ്.

വിവരശേഖരണം പൂർത്തിയാക്കിയ ശേഷം ഡിസംബർ ഒൻപതാം തീയതിയോടുകൂടി കരട് വോട്ടർ പട്ടിക പ്രസിദ്ധീകരിക്കും. ഈ കരട് പട്ടികയുമായി ബന്ധപ്പെട്ട പരാതികൾ വോട്ടർമാർക്ക് അടുത്ത വർഷം ജനുവരി എട്ടാം തീയതി വരെ സമർപ്പിക്കാവുന്നതാണ്. തുടർന്ന് എല്ലാ നടപടിക്രമങ്ങളും പൂർത്തിയാക്കി ഫെബ്രുവരി ഏഴിനായിരിക്കും അന്തിമ വോട്ടർ പട്ടിക പ്രസിദ്ധീകരിക്കുക.

അടുത്ത വർഷം തെരഞ്ഞെടുപ്പ് നടക്കുന്ന അസം ഒഴികെയുള്ള 12 സംസ്ഥാനങ്ങളിൽ എസ്.ഐ.ആർ. നടപ്പിലാക്കുമെന്നും കമ്മീഷൻ അറിയിച്ചു. ആൻഡമാൻ നിക്കോബാർ, ഛത്തീസ്ഗഢ്, ഗോവ, ഗുജറാത്ത്, കേരളം, ലക്ഷദ്വീപ്, മധ്യപ്രദേശ്, പുതുച്ചേരി, രാജസ്ഥാൻ, തമിഴ്‌നാട്, ഉത്തർപ്രദേശ്, വെസ്റ്റ് ബംഗാൾ എന്നീ സംസ്ഥാനങ്ങളിലാണ് രണ്ടാം ഘട്ട എസ്.ഐ.ആർ. നടപ്പാക്കുന്നത്. വോട്ടർമാർക്ക് ഓൺലൈനായും അപേക്ഷ പൂരിപ്പിക്കാൻ സൗകര്യമുണ്ടായിരിക്കും. ബിഹാറിൽ ആദ്യഘട്ട എസ്.ഐ.ആർ. വിജയകരമായി പൂർത്തിയാക്കിയെന്നും, 1951 മുതൽ 2004 വരെ രാജ്യത്ത് എട്ടു തവണ തീവ്ര വോട്ടർപട്ടിക പരിഷ്‌കരണം നടന്നിട്ടുണ്ടെന്നും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ വ്യക്തമാക്കി.