മാധവ് ഗാഡ്‌ഗിൽ അന്തരിച്ചു, പശ്ചിമഘട്ടത്തിന്റെ നിലനിൽപ്പിനായി പൊരുതിയ പോരാളി

മുതിർന്ന പരിസ്ഥിതി ശാസ്ത്രജ്ഞനും പശ്ചിമഘട്ട സംരക്ഷണത്തിനായി വിട്ടുവീഴ്ചയില്ലാത്ത പോരാട്ടം നയിച്ച പരിസ്ഥിതി സ്നേഹിയുമായ മാധവ് ഗാഡ്‌ഗിൽ (83) അന്തരിച്ചു. പൂനെയിൽ വെച്ചായിരുന്നു അദ്ദേഹത്തിന്റെ അന്ത്യം. വാർദ്ധക്യസഹജമായ അസുഖങ്ങളെത്തുടർന്ന് ചികിത്സയിലായിരുന്ന അദ്ദേഹത്തിന്റെ സംസ്കാര ചടങ്ങുകൾ പൂനെയിലെ വൈകുണ്ഡ് ശ്മശാനത്തിൽ നടക്കും.

1942 മെയ് 24-ന് പൂനെയിൽ ജനിച്ച മാധവ് ഗാഡ്‌ഗിൽ, പൂനെ സർവകലാശാലയിലും മുംബൈ സർവകലാശാലയിലുമായിരുന്നു തന്റെ ജീവശാസ്ത്ര പഠനം പൂർത്തിയാക്കിയത്. പിന്നീട് പ്രശസ്തമായ ഹാർവാഡ് സർവകലാശാലയിൽ നിന്ന് ഗണിത പരിസ്ഥിതിശാസ്ത്രത്തിൽ (Mathematical Ecology) അദ്ദേഹം ഡോക്ടറേറ്റ് നേടി. ഹാർവാഡിൽ ഐബിഎം ഫെലോ ആയും അപ്ലൈഡ് മാത്തമാറ്റിക്സിൽ റിസർച്ച് ഫെലോ ആയും അദ്ദേഹം സേവനമനുഷ്ഠിച്ചിട്ടുണ്ട്.

പശ്ചിമഘട്ടത്തിന്റെ നിലനിൽപ്പിനായി 2011-ൽ അദ്ദേഹം സമർപ്പിച്ച ‘ഗാഡ്‌ഗിൽ റിപ്പോർട്ട്’ ലോകശ്രദ്ധ നേടിയ ഒന്നാണ്. പരിസ്ഥിതി സംരക്ഷണം മുൻനിർത്തി അദ്ദേഹം മുന്നോട്ടുവെച്ച കർശനമായ നിർദ്ദേശങ്ങൾ വലിയ ചർച്ചകൾക്കും വിവാദങ്ങൾക്കും വഴിവെച്ചു. ജനസംഖ്യാശാസ്ത്രം, മനുഷ്യ-പരിസ്ഥിതിശാസ്ത്രം, പരിസ്ഥിതി ചരിത്രം തുടങ്ങിയ മേഖലകളിൽ പ്രഗത്ഭനായ അദ്ദേഹം 215 ഗവേഷണ പ്രബന്ധങ്ങളും ആറ് പുസ്തകങ്ങളും രചിച്ചിട്ടുണ്ട്.

കേരളത്തിൽ സമീപകാലത്തായി ആവർത്തിച്ചുണ്ടാകുന്ന പ്രകൃതിക്ഷോഭങ്ങളുടെ പശ്ചാത്തലത്തിൽ തന്റെ റിപ്പോർട്ട് അവഗണിക്കപ്പെട്ടതിനെതിരെ അദ്ദേഹം ശക്തമായ വിമർശനം ഉയർത്തിയിരുന്നു. പശ്ചിമഘട്ടം സംരക്ഷിച്ചില്ലെങ്കിൽ വലിയ ദുരന്തങ്ങൾ സംഭവിക്കുമെന്ന് താൻ നേരത്തെ മുന്നറിയിപ്പ് നൽകിയിരുന്നതാണെന്നും എന്നാൽ അധികാരികൾ ആ റിപ്പോർട്ടിനെ അട്ടിമറിക്കുകയായിരുന്നുവെന്നും അദ്ദേഹം തുറന്നടിച്ചിരുന്നു.

ഭാരത സർക്കാർ പത്മശ്രീ, പത്മഭൂഷൺ ബഹുമതികൾ നൽകി അദ്ദേഹത്തെ ആദരിച്ചിട്ടുണ്ട്. അന്താരാഷ്ട്ര തലത്തിൽ പരിസ്ഥിതി സംരക്ഷണത്തിനുള്ള ടൈലർ പുരസ്കാരവും അദ്ദേഹത്തിന് ലഭിച്ചിട്ടുണ്ട്. പശ്ചിമഘട്ടത്തിന്റെ കാവലാൾ എന്ന് വിശേഷിപ്പിക്കാവുന്ന ഗാഡ്‌ഗിലിന്റെ വിയോഗം പരിസ്ഥിതി പഠന ശാസ്ത്ര മേഖലയ്ക്ക് നികത്താനാവാത്ത നഷ്ടമാണ്.