വിവി പ്രകാശിന്‍റെ കുടുംബം വോട്ട് ചെയ്യില്ലെന്ന് കെകെ ലതിക

നിലമ്പൂര്‍ ഉപതെരഞ്ഞെടുപ്പിൽ അന്തരിച്ച കോൺഗ്രസ് നേതാവ് വി.വി. പ്രകാശിന്‍റെ കുടുംബം വോട്ട് ചെയ്യില്ലെന്ന് പറഞ്ഞ് സി.പി.എം. നേതാവ് കെ.കെ. ലതിക പങ്കുവെച്ച ഫേസ്ബുക്ക് പോസ്റ്റ് വിവാദത്തിൽ. എന്നാൽ, ഈ അവകാശവാദങ്ങളെല്ലാം തെറ്റാണെന്ന് തെളിയിച്ചുകൊണ്ട് വി.വി. പ്രകാശിന്റെ ഭാര്യയും മകളും പോളിംഗ് ബൂത്തിലെത്തി വോട്ട് രേഖപ്പെടുത്തി.

പ്രകാശിന്റെ കുടുംബം വോട്ട് ചെയ്ത വാർത്തയും ചിത്രങ്ങളും പുറത്തുവന്നതിന് പിന്നാലെ, കെ.കെ. ലതികയുടെ ഫേസ്ബുക്ക് പോസ്റ്റിന് താഴെ കമന്റുകളുടെ പ്രവാഹമായിരുന്നു. ലതികയെ വിമർശിച്ചുകൊണ്ട് നൂറുകണക്കിന് ആളുകളാണ് രംഗത്തെത്തിയത്.

“വടകരയിലെ കാഫിർ സ്ക്രീൻഷോട്ട് പ്രചാരണം പൊളിഞ്ഞപ്പോൾ പോസ്റ്റ് മുക്കിയത് പോലെ, ഇതും വേഗം മുക്കിക്കോളൂ” എന്നായിരുന്നു പല കമന്റുകളുടെയും ഉള്ളടക്കം. രാഷ്ട്രീയ എതിരാളികളെ താറടിച്ചു കാണിക്കാൻ വ്യാജപ്രചാരണങ്ങൾ നടത്തുന്നു എന്ന ആരോപണമാണ് ലതികയ്ക്കെതിരെ ഉയർന്നത്.