ട്രംപ് പിന്‍വാങ്ങുന്നു?; ഇറാനുമായി ചർച്ചക്ക് ഒരുങ്ങി അമേരിക്ക, അഞ്ച് ദിവസത്തേക്ക് ആക്രമണം നിർത്തിവെക്കുമെന്ന് പ്രഖ്യാപനം

മൂന്ന് ആഴ്ച്ചയായി തുടരുന്ന പശ്ചിമേഷ്യൻ സംഘർഷത്തിൽ നിർണായക വഴിത്തിരിവ് സൃഷ്ടിച്ചുകൊണ്ട് അമേരിക്കയും ഇറാനും തമ്മിൽ നയതന്ത്ര ചർച്ചകൾ ആരംഭിച്ചു. കഴിഞ്ഞ രണ്ട് ദിവസമായി നടന്ന ആശയവിനിമയം ‘വളരെ മികച്ചതും ഫലപ്രദവുമാണെന്ന്’ യുഎസ് പ്രസിഡന്റ് ഡൊണാൾഡ് ട്രംപ് വിശേഷിപ്പിച്ചു. ഈ ചർച്ചകളുടെ പശ്ചാത്തലത്തിൽ ഇറാന്റെ ഊർജ പശ്ചാത്തല സൗകര്യങ്ങൾക്ക് നേരെ അമേരിക്ക നടത്തിവന്ന എല്ലാ ആക്രമണങ്ങളും അഞ്ച് ദിവസത്തേക്ക് നിർത്തിവെക്കാൻ തീരുമാനിച്ചിട്ടുണ്ട്.

ഹോർമുസ് കടലിടുക്ക് വീണ്ടും തുറക്കുന്നതിനായി ട്രംപ് നൽകിയ സമയപരിധി അവസാനിക്കാനിരിക്കെയാണ് ഈ അപ്രതീക്ഷിത പ്രഖ്യാപനം വരുന്നത്. ഇറാനുമായുള്ള ബന്ധം മെച്ചപ്പെടുത്തുന്നതിനും തർക്കങ്ങൾ പരിഹരിക്കുന്നതിനും നിലവിലെ ചർച്ചകൾ സഹായിക്കുമെന്ന് വൈറ്റ് ഹൗസ് വൃത്തങ്ങൾ പ്രത്യാശ പ്രകടിപ്പിച്ചു. മേഖലയിൽ സമാധാനം പുനഃസ്ഥാപിക്കാനുള്ള നിർണായക ചുവടുവെപ്പായാണ് അന്താരാഷ്ട്ര സമൂഹം ഈ വെടിനിർത്തലിനെ നോക്കിക്കാണുന്നത്.

അതേസമയം, മേഖലയിൽ യുദ്ധസന്നദ്ധമായിരുന്ന ലോകത്തിലെ ഏറ്റവും വലിയ വിമാനവാഹിനിക്കപ്പൽ യുഎസ്എസ് ജെറാൾഡ് ആർ. ഫോർഡ് ഗ്രീസിലെ നാവിക താവളത്തിലേക്ക് മടങ്ങി. ഇറാന്റെ തീരങ്ങളിൽ നിന്നുള്ള കപ്പലിന്റെ ഈ പിന്മാറ്റം സംഘർഷാവസ്ഥയിൽ നേരിയ അയവുണ്ടാക്കിയിട്ടുണ്ട്. കപ്പലിലെ ലോൺട്രിയിലുണ്ടായ ചെറിയ തീപിടുത്തവും രണ്ട് നാവികർക്ക് പരിക്കേറ്റതും ഈ മടക്കത്തിന് കാരണമായിട്ടുണ്ടെങ്കിലും, ചർച്ചകൾക്ക് അനുകൂലമായ സാഹചര്യമൊരുക്കാൻ ഈ സൈനിക പിന്മാറ്റം സഹായിച്ചിട്ടുണ്ട്.

എന്നാൽ, അമേരിക്കയുമായി നേരിട്ട് ചർച്ച നടത്തിയെന്ന ട്രംപിന്റെ വാദം ഇറാൻ ഔദ്യോഗികമായി തള്ളിക്കളഞ്ഞു. തങ്ങളുടെ ഊർജ നിലയങ്ങൾ ആക്രമിക്കുമെന്ന ട്രംപിന്റെ ഭീഷണിക്ക് മുന്നിൽ ഇറാൻ നൽകിയ ശക്തമായ മുന്നറിയിപ്പിനെത്തുടർന്നാണ് അമേരിക്ക പിന്നോട്ട് പോയതെന്നാണ് ഇറാന്റെ അവകാശവാദം. ഇറാന്റെ അതിർത്തികളിൽ ഏതെങ്കിലും തരത്തിലുള്ള കടന്നുകയറ്റം ഉണ്ടായാൽ പേർഷ്യൻ ഗൾഫിലെ എല്ലാ കപ്പൽ പാതകളും മൈനുകൾ ഉപയോഗിച്ച് തകർക്കുമെന്ന് ഇറാന്റെ നാഷണൽ ഡിഫൻസ് കൗൺസിൽ മുന്നറിയിപ്പ് നൽകിയിട്ടുണ്ട്.