അനർഹമായ പരാജയം, ഉദാസീനവും അരാഷ്ട്രീയവുമായ ചിന്ത വോട്ടർമാരെ സ്വാധീനിച്ചു: എം. സ്വരാജ്

തിരുവനന്തപുരം: നിയമസഭാ തിരഞ്ഞെടുപ്പിൽ എൽ.ഡി.എഫിനുണ്ടായ കനത്ത തിരിച്ചടി തികച്ചും അപ്രതീക്ഷിതവും ‘അനർഹമായ പരാജയവുമാണെന്ന്’ സി.പി.എം നേതാവ് എം. സ്വരാജ്. ഭരണതലത്തിൽ മികച്ച മുന്നേറ്റം കാഴ്ചവെച്ചിട്ടും അത് വോട്ടായി മാറിയില്ലെന്നും നാടിന്റെ ഭാവിയേക്കാൾ ഉപരിയായി വോട്ടർമാരുടെ ചില അരാഷ്ട്രീയ ചിന്തകളാണ് ഫലത്തെ സ്വാധീനിച്ചതെന്നും അദ്ദേഹം ഫേസ്ബുക്കിൽ കുറിച്ചു. പരാജയപ്പെട്ടെങ്കിലും ജനങ്ങൾക്കായി ഉറച്ചുനിൽക്കുമെന്നും കരുത്തുറ്റ പ്രതിപക്ഷമായി തിരിച്ചു വരുമെന്നും അദ്ദേഹം വ്യക്തമാക്കി.

നാടിനെ ബാധിക്കുന്ന പ്രധാന പ്രശ്നങ്ങളോ വികസനമോ തിരഞ്ഞെടുപ്പിൽ വേണ്ട രീതിയിൽ ചർച്ചയായില്ലെന്ന് സ്വരാജ് വിലയിരുത്തുന്നു. ‘രണ്ടു തവണ ഇവർ ഭരിച്ചല്ലോ, ഇനി ഒരു തവണ അവർ ഭരിക്കട്ടെ’ എന്ന രീതിയിലുള്ള വോട്ടർമാരുടെ ഉദാസീനമായ സമീപനം തിരിച്ചടിയായി. പത്തു കൊല്ലം മുമ്പുള്ള കേരളത്തിന്റെ അവസ്ഥ പലരും മറന്നുപോയതാവാം ഇത്തരമൊരു മാറ്റത്തിന് വോട്ടർമാരെ പ്രേരിപ്പിച്ചതെന്നും അദ്ദേഹം തന്റെ കുറിപ്പിലൂടെ നിരീക്ഷിക്കുന്നു.

ഇടതുപക്ഷത്തിന്റെ ചെറിയ വീഴ്ചകൾ പോലും ജനങ്ങൾ ഗൗരവമായി കാണുന്നുണ്ടെന്നും അത് ആർജവത്തോടെ തിരുത്താൻ പാർട്ടി തയ്യാറാണെന്നും സ്വരാജ് പറഞ്ഞു. ഇതിൽ പാർട്ടിക്കോ മുന്നണിക്കോ യാതൊരുവിധ ദുരഭിമാനവുമില്ല. ‘ആയിരം ശരികൾക്കിടയിൽ അര തെറ്റെങ്കിലും സംഭവിച്ചിട്ടുണ്ടെങ്കിൽ അത് ആർജവത്തോടെ തിരുത്തും. പരാജയത്തിന്റെ ഇരുട്ടിൽ നിന്ന് വിജയത്തിന്റെ സൂര്യോദയത്തിലേക്ക് പറന്നുയർന്ന ചരിത്രമാണ് ഇടതുപക്ഷത്തിനുള്ളത്,’ അദ്ദേഹം കൂട്ടിച്ചേർത്തു.

തോൽവിയിൽ നിന്നും ഊർജ്ജം ഉൾക്കൊണ്ട് വരും ദിവസങ്ങളിൽ സജീവമായി മുന്നോട്ട് പോകാനാണ് മുന്നണിയുടെ തീരുമാനം. ക്രിയാത്മക പ്രതിപക്ഷമായി ഉത്തരവാദിത്തത്തോടെ പ്രവർത്തിക്കുമെന്നും കൊടുങ്കാറ്റുപോലെ എൽ.ഡി.എഫ് തിരികെ വരുമെന്നും ഉറപ്പിച്ചു പറഞ്ഞുകൊണ്ടാണ് സ്വരാജ് തന്റെ ഫേസ്ബുക്ക് പോസ്റ്റ് അവസാനിപ്പിക്കുന്നത്. യു.ഡി.എഫിന് മികച്ച വിജയം നേടാനായെങ്കിലും എൽ.ഡി.എഫ് ഭരണത്തിൽ നാടിനുണ്ടായ പുരോഗതി എതിരാളികൾ പോലും സമ്മതിക്കുന്നതാണെന്നും അദ്ദേഹം ഓർമ്മിപ്പിച്ചു.