ചിത്തരഞ്ജന്‍ വീണു, ആലപ്പുഴയിലും അട്ടിമറി, ഏറ്റവും പ്രായം കുറഞ്ഞ എംഎല്‍എയായി എഡി തോമസ്

കേരള നിയമസഭാ തെരഞ്ഞെടുപ്പില്‍ ആലപ്പുഴ മണ്ഡലത്തില്‍ കോണ്‍ഗ്രസിന്റെ യുവസ്ഥാനാര്‍ത്ഥി എ.ഡി. തോമസ് തകര്‍പ്പന്‍ വിജയത്തിലേക്ക്. 16 റൗണ്ടുകളില്‍ 13 റൗണ്ടുകള്‍ പിന്നിടുമ്പോള്‍ 14,643 വോട്ടുകളുടെ ഭൂരിപക്ഷവുമായാണ് തോമസ് മുന്നേറുന്നത്. നിലവിലെ ലീഡ് നില തുടരുകയാണെങ്കില്‍ ഈ നിയമസഭയിലെ ഏറ്റവും പ്രായം കുറഞ്ഞ അംഗമെന്ന പദവി തോമസിനെ തേടിയെത്തും.

നിലവില്‍ 26 വയസ്സ് മാത്രമുള്ള തോമസ്, ആലപ്പുഴയില്‍ സിറ്റിംഗ് എംഎല്‍എയായ പി.പി. ചിത്തരഞ്ജനെയാണ് പിന്നിലാക്കിയത്. എ.ഡി. തോമസ് 65,957 വോട്ടുകള്‍ നേടിയപ്പോള്‍ ചിത്തരഞ്ജന് 51,314 വോട്ടുകള്‍ മാത്രമേ ഇതുവരെ നേടാനായുള്ളൂ. ബിജെപി സ്ഥാനാര്‍ത്ഥി എം.ജെ. ജോബ് 13,032 വോട്ടുകളുമായി മൂന്നാം സ്ഥാനത്താണ്. തോമസിന്റെ ഈ മുന്നേറ്റം ഇടതുപക്ഷത്തിന്റെ ഉറച്ച കോട്ടകളില്‍ ഒന്നായ ആലപ്പുഴയില്‍ വലിയ വിള്ളലാണ് ഉണ്ടാക്കിയിരിക്കുന്നത്.

കെഎസ്യു, യൂത്ത് കോണ്‍ഗ്രസ് പ്രസ്ഥാനങ്ങളിലൂടെ രാഷ്ട്രീയത്തിലേക്ക് വന്ന തോമസിന് ജനങ്ങള്‍ നല്‍കിയ അംഗീകാരമാണ് ഈ വന്‍ മുന്നേറ്റം. കേവലം 30 വയസ്സില്‍ നിയമസഭയുടെ പടിവാതില്‍ക്കല്‍ എത്തി നില്‍ക്കുന്ന ഇദ്ദേഹം വരുംദിവസങ്ങളില്‍ കേരള രാഷ്ട്രീയത്തിലെ ശ്രദ്ധേയമായ യുവസാന്നിധ്യമായി മാറും. മണ്ഡലത്തിലെ വികസന മുരടിപ്പിനും ഭരണവിരുദ്ധ വികാരത്തിനുമെതിരെ തോമസ് നടത്തിയ പ്രചാരണം വോട്ടര്‍മാര്‍ ഏറ്റെടുത്തുവെന്നാണ് ഫലസൂചനകള്‍ വ്യക്തമാക്കുന്നത്.

സംസ്ഥാനത്തുടനീളം യുഡിഎഫ് തരംഗം ആഞ്ഞടിക്കുമ്പോള്‍ ആലപ്പുഴയിലെ ഈ വിജയം കോണ്‍ഗ്രസ് ക്യാമ്പുകളില്‍ വലിയ ആവേശമാണ് സൃഷ്ടിച്ചിരിക്കുന്നത്. സിപിഎമ്മിന്റെ മുതിര്‍ന്ന നേതാവിനെ തോല്‍പ്പിച്ച് സഭയിലെ ഏറ്റവും ഇളയ അംഗമാകാന്‍ തയ്യാറെടുക്കുന്ന തോമസിലൂടെ ആലപ്പുഴയില്‍ പുതിയൊരു രാഷ്ട്രീയ ചരിത്രം കുറിക്കപ്പെടുകയാണ്. വോട്ടെണ്ണല്‍ പൂര്‍ത്തിയാകുന്നതോടെ ഭൂരിപക്ഷം പതിനയ്യായിരത്തിന് മുകളില്‍ പോകുമെന്നാണ് യുഡിഎഫ് കണക്കുകൂട്ടുന്നത്.