പോലീസിലും രക്ഷയില്ല, എസ്പി മോശം സന്ദേശങ്ങള്‍ അയച്ചു; പരാതിയുമായി വനിതാ എസ്ഐമാര്‍

തിരുവനന്തപുരം: കേരള പോലീസിലെ ഒരു ഉന്നത ഉദ്യോഗസ്ഥനെതിരെ ലൈംഗികാതിക്രമ പരാതി. മോശം സന്ദേശങ്ങള്‍ അയച്ച് അപമര്യാദയായി പെരുമാറി എന്ന് ആരോപിച്ച് രണ്ട് വനിതാ സബ് ഇന്‍സ്പെക്ടര്‍മാര്‍ (എസ്ഐമാര്‍) പോലീസ് സൂപ്രണ്ടിനെതിരെ (എസ്പി) ഡിഐജി അജിതാ ബീഗത്തിന് പരാതി നല്‍കി.

പരാതിയെത്തുടര്‍ന്ന് വനിതാ ഉദ്യോഗസ്ഥരുടെ മൊഴി രേഖപ്പെടുത്തി. ഡിഐജി ഇത് സംബന്ധിച്ച വിശദമായ റിപ്പോര്‍ട്ട് സംസ്ഥാന പോലീസ് മേധാവിക്ക് കൈമാറിയിട്ടുണ്ട്.

ജോലിസ്ഥലത്ത് സ്ത്രീകള്‍ക്കെതിരായ ലൈംഗികാതിക്രമം തടയുന്നതിനുള്ള ‘പോഷ്’ നിയമപ്രകാരം അന്വേഷണം നടത്താന്‍ ഡിജിപി നിര്‍ദേശം നല്‍കി.

നേരത്തെ ജില്ലാ പോലീസ് മേധാവിയായിരുന്നതും ഇപ്പോള്‍ തലസ്ഥാനത്ത് ഒരു പ്രധാന പദവി വഹിക്കുന്നതുമായ ഐപിഎസ് ഉദ്യോഗസ്ഥനെതിരെയാണ് പരാതി. നേരിട്ട് എസ്ഐമാരായി സേനയില്‍ പ്രവേശിച്ച ഉദ്യോഗസ്ഥരാണ് പരാതിക്കാര്‍. ഇവര്‍ പരാതിക്കൊപ്പം സന്ദേശങ്ങളുടെ വിവരങ്ങളും തെളിവായി കൈമാറിയിട്ടുണ്ട്. അന്വേഷണത്തില്‍ ഉദ്യോഗസ്ഥന്‍ കുറ്റക്കാരനാണെന്ന് കണ്ടെത്തിയാല്‍ കര്‍ശനമായ വകുപ്പുതല നടപടികള്‍ നേരിടേണ്ടിവരും.