ടി20 ലോകകപ്പ്: ബംഗ്ലാദേശ് മത്സരങ്ങൾക്ക് തിരുവനന്തപുരം വേദിയായേക്കും; ഐസിസി നിർദേശം ബിസിബിക്ക് മുന്നിൽ

വരാനിരിക്കുന്ന ട്വന്റി20 ലോകകപ്പിന്റെ വേദികളുമായി ബന്ധപ്പെട്ട് ഐസിസിയും ബംഗ്ലാദേശ് ക്രിക്കറ്റ് ബോർഡും (ബിസിബി) തമ്മിൽ നടത്തുന്ന നിർണായക ചർച്ചകളിൽ തിരുവനന്തപുരവും ഇടംപിടിക്കുന്നു. സുരക്ഷാ കാരണങ്ങൾ ചൂണ്ടിക്കാട്ടി തങ്ങളുടെ മത്സരങ്ങൾ ഇന്ത്യയിൽ നിന്ന് ശ്രീലങ്കയിലേക്ക് മാറ്റണമെന്ന് ബംഗ്ലാദേശ് ക്രിക്കറ്റ് ബോർഡ് ഐസിസിയോട് നേരത്തെ അഭ്യർത്ഥിച്ചിരുന്നു. ഇതിന്റെ അടിസ്ഥാനത്തിൽ നടന്ന ചർച്ചകളിലാണ് മത്സരങ്ങൾ ദക്ഷിണേന്ത്യയിലെ സുരക്ഷിതമായ വേദികളിലേക്ക് മാറ്റാനുള്ള നിർദേശം ഉയർന്നുവന്നത്. തിരുവനന്തപുരത്തെ കാര്യവട്ടം ഗ്രീൻഫീൽഡ് സ്റ്റേഡിയം ഒരു ബദൽ വേദിയായി ഐസിസി ബിസിബിക്ക് മുന്നിൽ നിർദേശിച്ചതായാണ് റിപ്പോർട്ടുകൾ സൂചിപ്പിക്കുന്നത്.

നിലവിൽ കൊൽക്കത്തയിലും മുംബൈയിലുമാണ് ബംഗ്ലാദേശിന്റെ ഗ്രൂപ്പ് ഘട്ട മത്സരങ്ങൾ നിശ്ചയിച്ചിരുന്നത്. എന്നാൽ ഈ വേദികൾക്ക് പകരം തിരുവനന്തപുരത്തെയും ചെന്നൈയെയും പരിഗണിക്കാമെന്ന് ഐസിസി അറിയിച്ചു. ദക്ഷിണേന്ത്യയിലെ സുരക്ഷാ ക്രമീകരണങ്ങളും സാഹചര്യങ്ങളും ബംഗ്ലാദേശ് ടീമിന് അനുയോജ്യമാകുമെന്നാണ് വിലയിരുത്തൽ. എന്നാൽ ഐസിസി മുന്നോട്ടുവെച്ച ഈ നിർദേശങ്ങളിൽ ചെന്നൈയെ നേരത്തെ തന്നെ ബംഗ്ലാദേശ് തള്ളിയതായി സൂചനയുണ്ട്. കാര്യവട്ടം ഗ്രീൻഫീൽഡ് സ്റ്റേഡിയത്തിന്റെ കാര്യത്തിൽ സർക്കാരുമായി ആലോചിച്ച ശേഷം മാത്രമേ തീരുമാനമെടുക്കൂ എന്നാണ് ബിസിബി പ്രസിഡന്റ് അമിനുൽ ഇസ്ലാം വ്യക്തമാക്കിയത്.

വേദി മാറ്റത്തെക്കുറിച്ചുള്ള വാർത്തകൾ പുറത്തുവരുമ്പോഴും തങ്ങൾക്ക് അത്തരമൊരു വിവരം ലഭിച്ചിട്ടില്ലെന്നാണ് ബിസിസിഐ പ്രതികരിക്കുന്നത്. ഐസിസിയും ബംഗ്ലാദേശ് ബോർഡും തമ്മിലാണ് ഇപ്പോൾ ചർച്ചകൾ നടക്കുന്നത്. വേദികളുടെ കാര്യത്തിൽ ഐസിസിയിൽ നിന്ന് ഔദ്യോഗികമായി തങ്ങളെ അറിയിച്ചിട്ടില്ലെന്ന് ബിസിസിഐ സെക്രട്ടറി ദേവജിത് സൈകിയ വ്യക്തമാക്കി. ഐപിഎൽ ഫ്രാഞ്ചൈസിയായ കൊൽക്കത്ത നൈറ്റ് റൈഡേഴ്സിനോട് ബംഗ്ലാദേശ് താരം മുസ്തഫിസുർ റഹ്മാനെ ഒഴിവാക്കാൻ ബിസിസിഐ നിർദേശിച്ചതുമായി ബന്ധപ്പെട്ട തർക്കമാണ് ലോകകപ്പ് വേദികൾ മാറ്റണമെന്ന കടുത്ത നിലപാടിലേക്ക് ബിസിബിയെ എത്തിച്ചതെന്നാണ് വിവരം.

അതേസമയം, ബിസിബിയുമായുള്ള തർക്കങ്ങൾക്കിടയിലും മാച്ച് ഒഫീഷ്യലുകൾക്ക് നിലവിൽ വിലക്കുകളൊന്നും ഏർപ്പെടുത്തിയിട്ടില്ലെന്നത് ശ്രദ്ധേയമാണ്. ഇതിന്റെ ഭാഗമായി കഴിഞ്ഞ ഞായറാഴ്ച വഡോദരയിൽ നടന്ന ഇന്ത്യ-ന്യൂസിലൻഡ് ഏകദിന മത്സരത്തിൽ ബംഗ്ലാദേശിൽ നിന്നുള്ള റഫറി ഷർഫുള്ള സയീഖ് മാച്ച് റഫറിയായി പ്രവർത്തിച്ചിരുന്നു. ക്രിക്കറ്റ് ബോർഡുകൾ തമ്മിലുള്ള ഭിന്നത മത്സരങ്ങളെയും ഒഫീഷ്യലുകളെയും ബാധിക്കാതിരിക്കാൻ ഐസിസി ജാഗ്രത പാലിക്കുന്നുണ്ട്. വരാനിരിക്കുന്ന ലോകകപ്പ് സുഗമമായി നടത്തുന്നതിനായി നിലവിലെ പ്രശ്നങ്ങൾ എത്രയും വേഗം പരിഹരിക്കാനാണ് ഐസിസി ശ്രമിക്കുന്നത്.

ബംഗ്ലാദേശ് സർക്കാർ ഗ്രീൻഫീൽഡ് സ്റ്റേഡിയത്തിന് പച്ചക്കൊടി കാട്ടുകയാണെങ്കിൽ അത് കേരളത്തിന് വലിയൊരു കായിക നേട്ടമായി മാറും. ഇതിനുമുൻപും അന്താരാഷ്ട്ര മത്സരങ്ങൾക്ക് വിജയകരമായി ആതിഥേയത്വം വഹിച്ച ചരിത്രം കാര്യവട്ടം സ്റ്റേഡിയത്തിനുണ്ട്. ലോകകപ്പ് പോലൊരു വലിയ ടൂർണമെന്റിന് തിരുവനന്തപുരം വേദിയാകുന്നത് കേരളത്തിലെ ക്രിക്കറ്റ് ആരാധകർക്കും വലിയ ആവേശം പകരുന്ന വാർത്തയാണ്. ബിസിബിയുടെയും ഐസിസിയുടെയും അന്തിമ തീരുമാനത്തിനായി കാത്തിരിക്കുകയാണ് കായിക ലോകം.