കോഴിക്കോട് മെഡിക്കല്‍ കോളേജ് പിടിച്ച് എസ്എഫ്ഐ, കോട്ടയം പിടിച്ച് കെ എസ് യു

നീണ്ട 23 വർഷത്തെ കാത്തിരിപ്പിന് ഒടുവിൽ കോഴിക്കോട് മെഡിക്കൽ കോളജ് യൂണിയൻ ഭരണം തിരിച്ചുപിടിച്ച് എസ്എഫ്‌ഐ. ക്യാമ്പസ് രാഷ്‌ട്രീയത്തിൽ വലിയ ചലനങ്ങൾ സൃഷ്ടിച്ച ഈ തിരഞ്ഞെടുപ്പിൽ, ആകെയുള്ള 16 സീറ്റുകളിൽ 13 എണ്ണത്തിലും വൻ ഭൂരിപക്ഷത്തോടെയാണ് എസ്എഫ്‌ഐ സ്ഥാനാർത്ഥികൾ വിജയം ഉറപ്പിച്ചത്. രണ്ട് പതിറ്റാണ്ടിലധികമായി തുടർന്ന എതിർപ്പുകളെയും രാഷ്ട്രീയ സമവാക്യങ്ങളെയും മറികടന്നാണ് എസ്എഫ്‌ഐയുടെ ഈ ചരിത്ര മുന്നേറ്റം.

യൂണിയൻ തിരഞ്ഞെടുപ്പിലെ ഏറ്റവും ശ്രദ്ധേയമായ പോരാട്ടം നടന്ന പിജി വിഭാഗം യൂണിവേഴ്സിറ്റി യൂണിയൻ കൗൺസിലർ (യുയുസി) സ്ഥാനത്തേക്ക് മുൻ മന്ത്രിയും എംഎൽഎയുമായ ഡോ. കെ.ടി ജലീലിന്റെ മകൾ ഡോ. സുമയ്യ ബീഗം എസ്എഫ്‌ഐ പ്രതിനിധിയായി മത്സരിച്ച് മികച്ച വിജയം നേടി. എന്നാൽ, ചെയർമാൻ, ലേഡി വൈസ് ചെയർമാൻ എന്നീ രണ്ട് പ്രധാന ജനറൽ പോസ്റ്റുകളിൽ ഇൻഡിപെൻഡൻസ് മുന്നണിയാണ് വിജയിച്ചത്.

അതേസമയം, കോഴിക്കോടിന് പുറമെ സംസ്ഥാനത്തെ മറ്റ് പ്രമുഖ മെഡിക്കൽ കോളജുകളിൽ വലിയ രാഷ്ട്രീയ അട്ടിമറികളാണ് ദൃശ്യമായത്. ചരിത്രത്തിൽ ആദ്യമായി കോട്ടയം മെഡിക്കൽ കോളജ് യൂണിയൻ ഭരണം കെഎസ്‌യു പിടിച്ചെടുത്തു. കെഎസ്‌യു പാനലിൽ മത്സരിച്ച സ്ഥാനാർത്ഥികൾ ചെയർമാൻ, ജനറൽ സെക്രട്ടറി തുടങ്ങിയ പ്രമുഖ പോസ്റ്റുകളിലേക്ക് തിരഞ്ഞെടുക്കപ്പെട്ടു. വർഷങ്ങളായി തുടർന്ന ഇടത് മേധാവിത്വത്തിനാണ് കോട്ടയത്ത് ഇതോടെ വിരാമമായത്.

കോട്ടയത്തിന് പുറമെ സംസ്ഥാനത്തെ മറ്റ് പ്രധാന ക്യാമ്പസുകളിലും കെഎസ്‌യു ശക്തമായ സാന്നിധ്യമറിയിച്ചു. കോട്ടയം ഫാർമസി കോളജ്, തിരുവനന്തപുരം മെഡിക്കൽ കോളജ്, വണ്ടാനം മെഡിക്കൽ കോളജ് എന്നിവിടങ്ങളിലെ യൂണിയൻ ഭരണവും ഇത്തവണ കെഎസ്‌യു ആണ് സ്വന്തമാക്കിയത്. മെഡിക്കൽ ക്യാമ്പസുകളിൽ ഇരു മുന്നണികളും ഒപ്പത്തിനൊപ്പം പോരാടിയ ആവേശകരമായ ഒരു തിരഞ്ഞെടുപ്പ് ഫലത്തിനാണ് കേരളം സാക്ഷ്യം വഹിച്ചത്.