റവാഡ ചന്ദ്രശേഖര്‍ പുതിയ ഡി.ജി.പി

തിരുവനന്തപുരം: കേരളത്തിൻ്റെ പുതിയ സംസ്ഥാന പോലീസ് മേധാവിയായി റവാഡ ചന്ദ്രശേഖർ അധികാരമേൽക്കും. ഇന്ന് രാവിലെ ചേർന്ന മന്ത്രിസഭാ യോഗമാണ് ഇത് സംബന്ധിച്ച തീരുമാനം കൈക്കൊണ്ടത്. നിലവിൽ കേന്ദ്ര ഡെപ്യൂട്ടേഷനിൽ സി.ബി.ഐ. സ്പെഷ്യൽ ഡയറക്ടറായി പ്രവർത്തിക്കുകയാണ് റവാഡ ചന്ദ്രശേഖർ.

ജൂൺ 30, തിങ്കളാഴ്ച വൈകീട്ടാണ് നിലവിലെ പോലീസ് മേധാവി ഷെയ്ഖ് ദർവേഷ് സാഹിബ് സ്ഥാനമൊഴിയുന്നത്. അതിനുശേഷമാകും റവാഡ ചന്ദ്രശേഖർ ചുമതലയേൽക്കുക. കേന്ദ്ര ഡെപ്യൂട്ടേഷനിൽ നിന്ന് നേരിട്ട് പോലീസ് മേധാവി സ്ഥാനത്തേക്കെത്തുന്ന വ്യക്തി എന്ന പ്രത്യേകതയും റവാഡ ചന്ദ്രശേഖറിനുണ്ട്.

റവാഡ ചന്ദ്രശേഖർ തൻ്റെ ഔദ്യോഗിക ജീവിതം ആരംഭിച്ചത് തലശ്ശേരി എ.എസ്.പി. ആയിട്ടാണ്. ഈ ചുമതലയേറ്റ് 48 മണിക്കൂറിനുള്ളിൽ നടന്ന കൂത്തുപറമ്പ് വെടിവെപ്പ് സംഭവത്തിൽ റവാഡ ചന്ദ്രശേഖർ ആരോപണ നിഴലിലായിരുന്നു. എന്നാൽ, ഈ കേസിൽ കുറ്റക്കാരനാണെന്ന് കണ്ടെത്തിയെങ്കിലും 2012-ൽ അദ്ദേഹം കുറ്റവിമുക്തനാക്കപ്പെട്ടു.

തലശ്ശേരിക്ക് പുറമെ, പത്തനംതിട്ട എ.എസ്.പി., പാലക്കാട് ക്രൈം ബ്രാഞ്ച് എസ്.പി., തിരുവനന്തപുരം പോലീസ് കമ്മീഷണർ തുടങ്ങിയ പ്രധാന സ്ഥാനങ്ങളും റവാഡ ചന്ദ്രശേഖർ വഹിച്ചിട്ടുണ്ട്. ദീർഘകാലത്തെ സേവന പരിചയവുമായാണ് അദ്ദേഹം സംസ്ഥാന പോലീസ് മേധാവിയായി എത്തുന്നത്.