ബലാത്സംഗ കേസ്: വേടനായുള്ള തിരച്ചിൽ കേരളത്തിന് പുറത്തേക്ക് വ്യാപിപ്പിച്ച് പോലീസ്

ബലാത്സംഗക്കേസിൽ റാപ്പർ വേടനായി പോലീസ് അന്വേഷണം കേരളത്തിന് പുറത്തേക്ക് വ്യാപിപ്പിച്ചു. ഒളിവിലുള്ള വേടൻ്റെ മുൻകൂർ ജാമ്യാപേക്ഷയെ ആശ്രയിക്കാതെ അറസ്റ്റ് ചെയ്യാനാണ് പോലീസിന്റെ നീക്കം. കൊച്ചി സിറ്റി പോലീസ് കമ്മീഷണർ പുട്ട വിമലാദിത്യയുടെ നേതൃത്വത്തിൽ സാക്ഷികളുടെ മൊഴിയെടുപ്പ് പുരോഗമിക്കുകയാണ്. തന്നെ ബലാത്സംഗം ചെയ്യുകയും പിന്നീട് വിവാഹവാഗ്ദാനം നൽകി പീഡിപ്പിക്കുകയും ചെയ്തുവെന്ന യുവ ഡോക്ടറുടെ പരാതിയിലാണ് തൃക്കാക്കര പോലീസ് കേസെടുത്തത്.

അതേസമയം, റാപ്പർ വേടൻ മുൻകൂർ ജാമ്യത്തിനായി ഹൈക്കോടതിയെ സമീപിച്ചു. ഭീഷണിപ്പെടുത്തി പണം തട്ടാനുള്ള ശ്രമമാണ് പരാതിയെന്നും, പരാതിക്കാരി തൻ്റെ ആരാധികയായിരുന്നെന്നും വേടൻ ജാമ്യാപേക്ഷയിൽ പറയുന്നു. അഭിപ്രായവ്യത്യാസങ്ങളാണ് പരാതിക്ക് പിന്നിലെന്നും അദ്ദേഹം കൂട്ടിച്ചേർത്തു.