പിഎം ശ്രീ ‘സിപിഐ നേതാക്കളുടെ പ്രതികരണം ഏറെ വേദനയുണ്ടാക്കി’ മന്ത്രി വി ശിവൻകുട്ടി

വിദ്യാഭ്യാസ മന്ത്രി വി. ശിവൻകുട്ടി പിഎം ശ്രീ പദ്ധതിയുമായി ബന്ധപ്പെട്ട് സിപിഐ നേതാക്കളിൽ നിന്നുണ്ടായ പ്രതികരണങ്ങളിൽ തനിക്കുണ്ടായ വേദന തുറന്നു പ്രകടിപ്പിച്ചു. കേന്ദ്രഫണ്ട് നഷ്ടപ്പെടാതിരിക്കാൻ ധാരണാപത്രം ഒപ്പിട്ടതിനെതിരെ എൽ.ഡി.എഫ്. ഘടകകക്ഷിയായ സിപിഐ ശക്തമായ എതിർപ്പുമായി രംഗത്തെത്തിയ സാഹചര്യത്തിലാണ് മന്ത്രിയുടെ ഈ വൈകാരിക പ്രതികരണം. സിപിഐക്കെതിരെ കടുത്ത വിമർശനം തന്റെ ഭാഗത്ത് നിന്ന് ഉണ്ടായിട്ടില്ല. ഒരു മാധ്യമം തെറ്റായി വാർത്ത നൽകിയെന്നും മന്ത്രി വി. ശിവൻകുട്ടി പറഞ്ഞു. കഴിഞ്ഞ ദിവസം ബിനോയ് വിശ്വത്തെ താൻ നേരിൽ കണ്ടു. പൊതുവിദ്യാഭ്യാസ വകുപ്പിനെ കുറിച്ച് അദ്ദേഹത്തിന് നല്ല മതിപ്പാണുള്ളതെന്നും മന്ത്രി വി. ശിവൻകുട്ടി പറഞ്ഞു.