പിഎം ശ്രീ പദ്ധതിയില്‍ നിന്ന് പിന്നോട്ടില്ലെന്ന് വിദ്യാഭ്യാസ വകുപ്പ്, കേന്ദ്ര വിഹിതം വെറുതെ കളയാനാകില്ലെന്ന് വിദ്യാഭ്യാസ മന്ത്രി, പിന്തുണച്ച് മുഖ്യമന്ത്രി

തിരുവനന്തപുരം: പിഎം ശ്രീ പദ്ധതിയിൽ നിന്ന് പിന്നോട്ടില്ലെന്ന് വ്യക്തമാക്കി സംസ്ഥാന വിദ്യാഭ്യാസ വകുപ്പ്. പദ്ധതിയിൽ തുടരാനുള്ള നിലപാട് സർക്കാർ ശക്തമായി മുന്നോട്ട് വെച്ചു. കേന്ദ്ര പദ്ധതികളിലെ വിഹിതം ഉപേക്ഷിക്കാനാകില്ലെന്നും, കേന്ദ്രം നിശ്ചയിക്കുന്ന നിബന്ധനകൾ അംഗീകരിച്ച് മറ്റ് വകുപ്പുകളും പദ്ധതികൾ നടപ്പാക്കുന്നുണ്ടെന്നും വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. വിദ്യാഭ്യാസ വകുപ്പിൻ്റെ നിലപാടിന് മുഖ്യമന്ത്രി പിണറായി വിജയൻ പൂർണ്ണ പിന്തുണ നൽകി. സംസ്ഥാനത്തിൻ്റെ സാമ്പത്തിക സ്ഥിതി കണക്കിലെടുക്കുമ്പോൾ, ലഭിക്കുന്ന കേന്ദ്ര വിഹിതം പാഴാക്കിക്കളയുന്നത് ഉചിതമല്ലെന്നും, പദ്ധതിയുടെ നേട്ടങ്ങൾ ഉപയോഗപ്പെടുത്തണമെന്നുമാണ് മുഖ്യമന്ത്രിയുടെ നിലപാട്.

കേന്ദ്ര പദ്ധതികൾ സംസ്ഥാനത്തിൻ്റെ ഭരണഘടനപരമായ അവകാശങ്ങൾ കവർന്നെടുക്കുമെന്ന പ്രതിപക്ഷത്തിൻ്റെ വിമർശനങ്ങളെ വിദ്യാഭ്യാസ വകുപ്പ് തള്ളി. മറ്റ് കേന്ദ്രാവിഷ്കൃത പദ്ധതികൾ നടപ്പാക്കുമ്പോൾ ഉണ്ടാകാത്ത ഈ വിമർശനം പിഎം ശ്രീ പദ്ധതിയുടെ കാര്യത്തിൽ മാത്രം ഉയർത്തുന്നത് രാഷ്ട്രീയ ലക്ഷ്യത്തോടെയാണെന്നും മന്ത്രി കുറ്റപ്പെടുത്തി. സംസ്ഥാനത്തെ സ്കൂളുകളുടെ അടിസ്ഥാന സൗകര്യ വികസനത്തിനും വിദ്യാഭ്യാസ നിലവാരം ഉയർത്തുന്നതിനും പിഎം ശ്രീ പദ്ധതി സഹായകമാകുമെന്നാണ് സർക്കാർ വിലയിരുത്തൽ.