അരുണ്‍ കുമാറിനെതിരെ മലങ്കര ഓര്‍ത്തഡോക്‌സ് സഭ, പ്രതികരണങ്ങളുണ്ടാകുമെന്ന് മുന്നറിയിപ്പ്

മാധ്യമപ്രവര്‍ത്തകന്‍ ഡോ. അരുണ്‍ കുമാര്‍ നടത്തിയ ‘പുണ്യാളന്‍’ പരാമര്‍ശം സഭയെയും മുന്‍ മുഖ്യമന്ത്രി ഉമ്മന്‍ചാണ്ടിയെയും അവഹേളിക്കുന്നതാണെന്ന് മലങ്കര ഓര്‍ത്തഡോക്‌സ് സഭ. സഭയുടെ ഔദ്യോഗിക മീഡിയ വിംഗ് പുറത്തിറക്കിയ പ്രസ്താവനയില്‍, അരുണ്‍ കുമാറിന്റേത് നിര്‍ഭാഗ്യകരവും വൃത്തികെട്ടതുമായ മാധ്യമരീതിയാണെന്നും ഇതില്‍ ശക്തമായി പ്രതിഷേധിക്കുന്നുവെന്നും അറിയിച്ചു.

ചാനല്‍ റേറ്റിംഗോ വ്യക്തിപരമായ താല്പര്യങ്ങളോ ആകാം ഇത്തരം പരാമര്‍ശത്തിന് പിന്നിലെന്നും സഭ സംശയം പ്രകടിപ്പിച്ചു. ഉമ്മന്‍ചാണ്ടിയെ മലങ്കര സഭ വിശുദ്ധനായോ പുണ്യവാളനായോ പ്രഖ്യാപിച്ചിട്ടില്ല. അദ്ദേഹത്തിന്റെ കല്ലറയില്‍ വരുന്നത് സഭാംഗങ്ങള്‍ മാത്രമല്ല, അദ്ദേഹത്തെ സ്‌നേഹിക്കുന്ന എല്ലാ വിഭാഗം ജനങ്ങളുമാണ്. ജനങ്ങളുടെ മനസ്സില്‍ ഇടംപിടിച്ച ഒരു നേതാവിന്റെ കല്ലറ പുതുപ്പള്ളി പള്ളിയില്‍ സ്ഥിതി ചെയ്യുന്നതുകൊണ്ട് അവിടെ ആളുകള്‍ വരുന്നത് സഭയെ അവഹേളിക്കാനുള്ള കാരണമായി കാണുന്നതിനോട് യോജിക്കാനാവില്ലെന്നും പ്രസ്താവനയില്‍ പറയുന്നു.

പുതുപ്പള്ളി പള്ളി പ്രശസ്തമായ ജോര്‍ജ്ജിയന്‍ തീര്‍ത്ഥാടന കേന്ദ്രമാണ്. വിശ്വാസികള്‍ കല്ലറയില്‍ പ്രാര്‍ത്ഥിക്കുന്നതും മെഴുകുതിരി കത്തിക്കുന്നതും സഭയുടെ പാരമ്പര്യത്തിന് വിരുദ്ധമല്ല. മരിച്ചവരെ വിശുദ്ധ കുര്‍ബ്ബാനയില്‍ ഓര്‍ക്കുന്നതും കല്ലറയില്‍ ധൂപപ്രാര്‍ത്ഥന നടത്തുന്നതും സഭയുടെ പാരമ്പര്യത്തിന്റെ ഭാഗമാണ്. ഇത് മനസ്സിലാക്കാതെയാണ് അരുണ്‍ കുമാറിന്റെ പരാമര്‍ശമെന്നും സഭ കുറ്റപ്പെടുത്തി.

‘നാടിനെ ഭരിച്ച രണ്ട് മുഖ്യമന്ത്രിമാരെയും അവരുടെ മരണത്തെയും സഭ വേണ്ടവിധത്തില്‍ ആദരിക്കുന്നു. അതിനിടക്ക് പൊള്ളയായ വാക്കുകള്‍ കുത്തിക്കയറ്റി ആരെയെങ്കിലും കരിവാരിത്തേക്കാനാണ് ഉദ്ദേശമെങ്കില്‍ അതിനെതിരെ പ്രതിഷേധങ്ങളും പ്രതികരണങ്ങളും ഉണ്ടാകും. സ്വാര്‍ത്ഥ താല്പര്യങ്ങള്‍ക്ക് വേണ്ടി സഭയെ അവഹേളിക്കാന്‍ നോക്കിയാല്‍ പ്രതികരണങ്ങള്‍ ഉണ്ടാകുമെന്ന് അറിയിക്കട്ടെ,’ എന്ന് പ്രസ്താവനയില്‍ മുന്നറിയിപ്പ് നല്‍കുന്നു.

വിശ്വാസങ്ങളെയും ആചാരങ്ങളെയും അപമാനിക്കുന്ന താരതമ്യങ്ങള്‍ ആവിഷ്‌കാര സ്വാതന്ത്ര്യത്തിന്റെ പേരില്‍ സംഭവിക്കുമ്പോള്‍ ഇന്ത്യയുടെ നാനാത്വത്തില്‍ ഏകത്വം എന്ന മേന്മയ്ക്ക് കളങ്കം ചാര്‍ത്തുകയാണെന്നും സഭയുടെ മീഡിയ വിംഗ് കുറ്റപ്പെടുത്തി. ഈ വിഷയത്തില്‍ മാധ്യമപ്രവര്‍ത്തകനോടും ചാനലിനോടുമുള്ള ശക്തമായ പ്രതിഷേധവും സഭ രേഖപ്പെടുത്തി.

മലങ്കര ഓര്‍ത്തഡോക്‌സ് സഭ മീഡിയ വിംഗ് പുറത്തിറക്കിയ പ്രസ്താവന വായിക്കാം