ആർഎസ്എസ് ഗണവേഷമണിഞ്ഞ് മുൻ സിപിഎം എംഎൽഎ എസ്. രാജേന്ദ്രൻ; മൂന്നാറിലെ വിജയദശമി ചടങ്ങിലെ ‘കൗതുകക്കാഴ്ച്ച’

മുൻ സിപിഎം നേതാവും ദേവികുളം മുൻ എംഎൽഎയുമായ എസ്.രാജേന്ദ്രൻ ആർഎസ്എസ് ഗണവേഷമണിഞ്ഞ് വിജയദശമി പരിപാടിയിൽ പങ്കെടുത്തു. മൂന്നാറിൽ സംഘടിപ്പിച്ച പ്രത്യേക ചടങ്ങിലാണ് അദ്ദേഹം ആർഎസ്എസിന്റെ ഔദ്യോഗിക വേഷത്തിലെത്തിയത്.

വിജയദശമി ആഘോഷങ്ങളുടെ ഭാഗമായി നടന്ന ചടങ്ങിൽ ആർഎസ്എസിന്റെ മുഖപത്രമായ ‘കേസരി’ വാരികയുടെ പ്രചാരണ ഉദ്ഘാടനവും എസ്.രാജേന്ദ്രൻ നിർവഹിച്ചു. ദേവികുളം നിയോജകമണ്ഡലത്തിൽ നിന്ന് മൂന്നുതവണ സിപിഎം ടിക്കറ്റിൽ നിയമസഭയിലെത്തിയ മുതിർന്ന നേതാവാണ് അദ്ദേഹം.

ദീർഘകാലം സിപിഎമ്മിന്റെ സജീവ പ്രവർത്തകനായിരുന്ന രാജേന്ദ്രൻ, പിന്നീട് പാർട്ടി നേതൃത്വവുമായി അകലുകയും ബിജെപിയിൽ ചേരുകയും ചെയ്യുകയായിരുന്നു. തുടർന്ന് നടന്ന നിയമസഭാ തെരഞ്ഞെടുപ്പിൽ ദേവികുളം മണ്ഡലത്തിൽ എൻഡിഎ സ്ഥാനാർത്ഥിയായി അദ്ദേഹം ജനവിധി തേടുകയും ചെയ്തിരുന്നു.

വർഷങ്ങളോളം ഇടതുപക്ഷ രാഷ്ട്രീയത്തിന്റെ മുന്നണിപ്പോരാളിയായി പ്രവർത്തിച്ച ഒരു നേതാവ് പൂർണ ഗണവേഷത്തിൽ ആർഎസ്എസ് വേദിയിൽ എത്തിയത് രാഷ്ട്രീയ കേരളത്തിൽ വലിയ ചർച്ചകൾക്കും കൗതുകത്തിനും വഴിവെച്ചിട്ടുണ്ട്.