മഞ്ചേശ്വരത്ത് എല്‍ഡിഎഫിന് പിന്തുണയില്ല; എസ്‌വൈഎസ് ജില്ലാ സെക്രട്ടറിയെ തിരുത്തി കാന്തപുരം വിഭാഗം

വരാനിരിക്കുന്ന നിയമസഭാ തിരഞ്ഞെടുപ്പിൽ മഞ്ചേശ്വരം ഉൾപ്പെടെയുള്ള മണ്ഡലങ്ങളിൽ ഇടതുപക്ഷ ജനാധിപത്യ മുന്നണിക്ക് (എൽഡിഎഫ്) പിന്തുണ പ്രഖ്യാപിച്ചു എന്ന തരത്തിൽ പ്രചരിക്കുന്ന വാർത്തകൾ തള്ളി കേരള മുസ്‌ലിം ജമാഅത്ത്. കഴിഞ്ഞ മാർച്ച് 29-ന് നടന്ന സംഘടനയുടെ പാർലമെന്ററി സംഗമത്തെ തെറ്റായ രീതിയിൽ വ്യാഖ്യാനിച്ചാണ് ഇത്തരം പ്രചാരണങ്ങൾ നടക്കുന്നതെന്ന് കാസർഗോഡ് ജില്ലാ കമ്മിറ്റി അറിയിച്ചു.

സമസ്ത സെന്റിനറിയുടെ ഭാഗമായുള്ള പ്രവർത്തനങ്ങൾ വിശദീകരിക്കാനാണ് പാർലമെന്ററി സംഗമം ചേർന്നത്. എന്നാൽ, ഈ യോഗം കക്ഷി രാഷ്ട്രീയ ചർച്ചകൾക്കും തീരുമാനങ്ങൾക്കും വേണ്ടിയായിരുന്നു എന്ന രീതിയിൽ സോഷ്യൽ മീഡിയ വഴി പ്രചരിക്കുന്ന വീഡിയോ ക്ലിപ്പുകൾ വസ്തുതാവിരുദ്ധമാണെന്ന് സംഘടന വ്യക്തമാക്കി. ഇത്തരത്തിൽ പ്രചരിക്കുന്ന ദൃശ്യങ്ങളുമായി കേരള മുസ്‌ലിം ജമാഅത്തിനോ സുന്നി സംഘടനകൾക്കോ യാതൊരു ബന്ധവുമില്ലെന്ന് പത്രക്കുറിപ്പിൽ പറയുന്നു.

വീഡിയോയിൽ പറയുന്ന കാര്യങ്ങൾ സംഘടനയുടെ ഔദ്യോഗിക നയത്തിന് വിരുദ്ധമാണെന്നും നേതൃത്വം വ്യക്തമാക്കി. വോട്ടർമാരെ തെറ്റിദ്ധരിപ്പിക്കുന്ന ഇത്തരം പ്രചാരണങ്ങളിൽ പ്രവർത്തകർ വഞ്ചിതരാകരുതെന്നും പള്ളങ്കോട് അബ്ദുൽ ഖാദർ മദനി (ജനറൽ സെക്രട്ടറി) അറിയിച്ചു.

തിരഞ്ഞെടുപ്പ് അടുത്ത സാഹചര്യത്തിൽ രാഷ്ട്രീയ പാർട്ടികൾക്ക് നിരുപാധിക പിന്തുണ നൽകുന്നു എന്ന തരത്തിലുള്ള വ്യാജ വാർത്തകൾക്കെതിരെ ജാഗ്രത പാലിക്കണമെന്നും സംഘടന നിർദ്ദേശിച്ചു.