ദേശീയ പണിമുടക്ക് കേരളത്തില്‍ പൂര്‍ണ്ണം, ജനജീവിതം സ്തംഭിച്ചു

കേന്ദ്രസര്‍ക്കാരിന്റെ തൊഴില്‍ നയങ്ങളില്‍ പ്രതിഷേധിച്ച് തൊഴിലാളി സംഘടനകള്‍ ആഹ്വാനം ചെയ്ത ദേശീയ പണിമുടക്ക് കേരളത്തില്‍ പൂര്‍ണ്ണം. സംസ്ഥാനത്ത് കടകമ്പോളങ്ങള്‍ അടഞ്ഞുകിടക്കുകയും ഗതാഗത സംവിധാനങ്ങള്‍, പ്രത്യേകിച്ച് കെഎസ്ആര്‍ടിസി സര്‍വീസുകള്‍ സ്തംഭിക്കുകയും ചെയ്തതോടെ പണിമുടക്ക് ബന്ദിന് സമാനമായി.

പണിമുടക്കിന്റെ ഭാഗമായി സംസ്ഥാനത്തിന്റെ വിവിധയിടങ്ങളില്‍ കെഎസ്ആര്‍ടിസി ബസുകള്‍ സമരക്കാര്‍ തടഞ്ഞു. തിരുവനന്തപുരം, കൊച്ചി, തൃശൂര്‍, കൊല്ലം, മലപ്പുറം തുടങ്ങിയ പ്രധാന നഗരങ്ങളിലെല്ലാം ബസ് സര്‍വീസുകള്‍ മുടങ്ങി. കൊട്ടാരക്കരയില്‍ നിന്ന് കോട്ടയത്തേക്ക് പോകുകയായിരുന്ന ബസ് സമരക്കാര്‍ തടഞ്ഞത് സംഘര്‍ഷത്തിന് ഇടയാക്കി.

ഗതാഗത മന്ത്രി കെ.ബി. ഗണേഷ് കുമാറിന്റെ മണ്ഡലമായ പത്തനാപുരത്ത് കെഎസ്ആര്‍ടിസി ഡിപ്പോയില്‍ നിന്ന് ഒരു ബസ് പോലും പുറത്തിറക്കാന്‍ സാധിച്ചില്ല. ജോലിക്ക് ഹാജരായ ജീവനക്കാരും സമരക്കാരും തമ്മില്‍ ഇവിടെ വാക്കേറ്റമുണ്ടായി. കൊല്ലം ഡിപ്പോയില്‍ സ്ഥിതിഗതികള്‍ കൂടുതല്‍ രൂക്ഷമായിരുന്നു. മുന്‍കൂട്ടി റിസര്‍വ്വ് ചെയ്ത യാത്രക്കാരുമായി പുറപ്പെടാന്‍ തയ്യാറായ മൂന്നാര്‍, എറണാകുളം അമൃത സര്‍വീസുകള്‍ക്കുള്ളില്‍ സമരക്കാര്‍ കൊടികുത്തി തടയുകയായിരുന്നു.

പുതിയ ലേബര്‍ കോഡുകള്‍ പിന്‍വലിക്കുക എന്നതടക്കമുള്ള ആവശ്യങ്ങള്‍ ഉന്നയിച്ചാണ് തൊഴിലാളി സംഘടനകള്‍ സംയുക്തമായി ദേശീയ പണിമുടക്കിന് ആഹ്വാനം ചെയ്തത്.