മുട്ടിൽ മരംമുറിക്കേസ്: അ​ഗസ്റ്റിൻ സഹോദരങ്ങൾക്ക് തിരിച്ചടി; വിചാരണ സ്റ്റേ ചെയ്യണ‍മെന്ന ഹരജി ഹൈക്കോടതി തള്ളി

വിവാദപരമായ മുട്ടിൽ മരംമുറി കേസിൽ പ്രധാന പ്രതികളായ അഗസ്റ്റിൻ സഹോദരങ്ങൾക്ക് വീണ്ടും തിരിച്ചടി. കേസിന്റെ വിചാരണ നടപടികൾ സ്റ്റേ ചെയ്യണമെന്നാവശ്യപ്പെട്ട് നൽകിയ ഹരജി ഹൈക്കോടതി തള്ളി. മരംമുറിയുമായി ബന്ധപ്പെട്ട് അമ്പലമേട് പൊലീസ് രജിസ്റ്റർ ചെയ്ത കേസിലാണ് ഹൈക്കോടതി നിർണായകമായ ഈ നിലപാട് സ്വീകരിച്ചത്.

ഇതിനിടെ, മുട്ടിൽ മരംമുറിയുമായി ബന്ധപ്പെട്ട വഞ്ചനാ കേസിൽ പ്രധാന പ്രതികളിലൊരാളായ റോജി അഗസ്റ്റിൻ കോടതിയിൽ നേരിട്ട് ഹാജരായി. എന്നാൽ കേസിലെ മറ്റ് പ്രതികളായ ആന്റോ അഗസ്റ്റിനും ജോസ് കുട്ടി അഗസ്റ്റിനും കോടതിയിൽ എത്തിയിരുന്നില്ല. പ്രതികളുടെ ഈ നടപടിയിൽ കോടതി കടുത്ത അമർഷം രേഖപ്പെടുത്തുകയും ചെയ്തു.

മറ്റ് പ്രതികൾ എവിടെയെന്ന് ചോദിച്ച കോടതി, തങ്ങളെ കളിയാക്കുകയാണോ എന്നും പ്രതിഭാഗത്തോട് രൂക്ഷമായ ഭാഷയിൽ ചോദിച്ചു. തുടര്‍ന്ന് കേസ് പരിഗണിക്കുന്ന സമയത്ത് റോജി അഗസ്റ്റിനോട് മാറിനിൽക്കാൻ കോടതി നിർദേശിക്കുകയായിരുന്നു.

അതേസമയം, കോടതി വളപ്പിൽ വെച്ച് മാധ്യമങ്ങളോട് പ്രതികരണവുമായി റോജി അഗസ്റ്റിൻ രംഗത്തെത്തി. മാധ്യമങ്ങൾ തങ്ങൾക്കെതിരെ കള്ളങ്ങൾ പ്രചരിപ്പിക്കുകയാണെന്ന് അദ്ദേഹം ആരോപിച്ചു. തങ്ങൾക്കെതിരെ ജാമ്യമില്ലാ വാറണ്ട് പുറപ്പെടുവിച്ചു എന്നത് തെറ്റായ വാർത്തയാണെന്നും, ഹൈക്കോടതി ഹരജി തള്ളിയാലും തങ്ങൾക്ക് മുന്നിൽ മറ്റ് കോടതികൾ തുറന്നുകിടപ്പുണ്ടെന്നും അദ്ദേഹം മാധ്യമങ്ങളോട് കയർത്തു സംസാരിച്ചു.