വാളയാറിൽ ആൾക്കൂട്ട മർദനം: അതിഥിത്തൊഴിലാളി കൊല്ലപ്പെട്ടു; നടന്നത് കൊടും ക്രൂരത

പാലക്കാട് വാളയാറിന് സമീപം അട്ടപ്പള്ളത്ത് അതിഥിത്തൊഴിലാളിയെ ആൾക്കൂട്ടം തല്ലിക്കൊന്നു. ഛത്തീസ്ഗഡ് ബിലാസ്പുർ സ്വദേശി രാമനാരായൺ ഭയ്യാർ (31) ആണ് മരിച്ചത്. മോഷ്ടാവാണെന്ന് സംശയിച്ചാണ് ഒരു സംഘം ആളുകൾ ഇദ്ദേഹത്തെ വളഞ്ഞിട്ട് ക്രൂരമായി മർദിച്ചത്.

സംഭവത്തെക്കുറിച്ച് പോലീസ് പറയുന്നത്: ബുധനാഴ്ച വൈകിട്ട് ആറുമണിയോടെയാണ് സംഭവം നടന്നത്. രാമനാരായൺ മദ്യപിച്ച നിലയിലായിരുന്നു. എന്നാൽ ഇയാളുടെ പക്കൽ നിന്ന് മോഷണവസ്തുക്കളൊന്നും കണ്ടെത്താനായില്ല. ചോദ്യം ചെയ്യൽ എന്ന പേരിൽ നാട്ടുകാർ ഇയാളെ തടഞ്ഞുവെക്കുകയും ക്രൂരമായി മർദിക്കുകയുമായിരുന്നു. മർദനമേറ്റ രാമനാരായൺ രക്തം ഛർദിച്ച് നിലത്തുവീണു.

അറസ്റ്റ്: സംഭവവുമായി ബന്ധപ്പെട്ട് 10 പേരെ പോലീസ് കസ്റ്റഡിയിലെടുത്തു. ഇതിൽ 5 പേരുടെ അറസ്റ്റ് ഇതിനോടകം രേഖപ്പെടുത്തിയിട്ടുണ്ട്. മരിച്ച യുവാവിന്റെ ശരീരത്തിൽ ക്രൂരമായ അടിയേറ്റ പാടുകളുണ്ട്. പോസ്റ്റ്‌മോർട്ടം റിപ്പോർട്ട് ലഭിച്ചാലേ മരണകാരണത്തിൽ കൂടുതൽ വ്യക്തത വരൂ എന്ന് വാളയാർ ഇൻസ്പെക്ടർ എൻ.എസ്. രാജീവ് അറിയിച്ചു.

മധു വധക്കേസിന്റെ ഓർമ്മകൾ: 2018-ൽ പാലക്കാട് അട്ടപ്പാടിയിൽ മോഷണം ആരോപിച്ച് മധു എന്ന ആദിവാസി യുവാവിനെ ആൾക്കൂട്ടം വിചാരണ ചെയ്ത് കൊലപ്പെടുത്തിയ സംഭവത്തിന്റെ നടുക്കം മാറുന്നതിന് മുൻപാണ് കേരളത്തെ വീണ്ടും നാണംകെടുത്തുന്ന സമാനമായ സംഭവം ഉണ്ടായിരിക്കുന്നത്. മധു വധക്കേസിൽ 13 പ്രതികൾക്ക് ഏഴ് വർഷം കഠിനതടവ് ശിക്ഷ ലഭിച്ചിരുന്നു.