കവടിയാർ കൊട്ടാരത്തിൽ വൻ കവർച്ച; രണ്ട് കോടി രൂപയുടെ അമൂല്യ ആഭരണങ്ങൾ നഷ്ടപ്പെട്ടു

തിരുവനന്തപുരം: തലസ്ഥാനത്തെ ചരിത്രപ്രസിദ്ധമായ കവടിയാർ കൊട്ടാരത്തിൽ വൻ കവർച്ച നടന്നതായി പരാതി. ഏകദേശം രണ്ട് കോടി രൂപയോളം വിലമതിക്കുന്ന സ്വർണാഭരണങ്ങളും അമൂല്യമായ രത്നങ്ങളുമാണ് മോഷണം പോയത്. കൊട്ടാരത്തിലെ മുതിർന്ന അംഗമായ അശ്വതി തിരുനാൾ ഗൗരി ലക്ഷ്മിഭായി ആണ് ഇതുസംബന്ധിച്ച് പേരൂർക്കട പോലീസിൽ ഔദ്യോഗികമായി പരാതി നൽകിയത്.

പാരമ്പര്യമായി കൈമാറി വന്നതും അത്യപൂർവ്വവുമായ ആഭരണങ്ങളാണ് നഷ്ടപ്പെട്ടവയിൽ അധികവും. പത്മനാഭസ്വാമിയുടെ രൂപം ആലേഖനം ചെയ്ത സ്വർണ്ണ പതക്കങ്ങൾ, വിലപിടിപ്പുള്ള റൂബിയും ഡയമണ്ടും പതിപ്പിച്ച വളകൾ, എട്ടുലക്ഷത്തോളം രൂപ വിലമതിക്കുന്ന നാഗപട കമ്മലുകൾ, അപൂർവ്വമായ കുതിര പവൻ നാണയങ്ങൾ എന്നിവ മോഷണം പോയവയിൽ ഉൾപ്പെടുന്നു. ഇവയിൽ പലതും വിദേശത്തുനിന്നും മറ്റും ശേഖരിച്ചവയും ചരിത്രപരമായ പ്രാധാന്യമുള്ളവയുമാണ്.

കഴിഞ്ഞ വർഷം ഒക്ടോബർ – നവംബർ മാസങ്ങളിലാണ് കവർച്ച നടന്നതെന്നാണ് സംശയിക്കുന്നത്. നവംബറിൽ ബെംഗളൂരുവിലേക്ക് പോകാനായി അലമാര തുറന്നപ്പോഴാണ് ആഭരണങ്ങൾ കാണാനില്ലെന്ന വിവരം ഗൗരി ലക്ഷ്മിഭായി ആദ്യം ശ്രദ്ധിച്ചത്. എന്നാൽ അന്ന് പോലീസിൽ പരാതി നൽകുന്നതിന് പകരം കൊട്ടാരത്തിനുള്ളിൽ തന്നെ ആഭരണങ്ങൾ ഉണ്ടാകുമെന്ന പ്രതീക്ഷയിൽ കുടുംബാംഗങ്ങൾ സ്വയം തിരച്ചിൽ നടത്തുകയായിരുന്നു.

മാസങ്ങൾ നീണ്ട തിരച്ചിലിനൊടുവിലും ആഭരണങ്ങൾ കണ്ടെത്താനാകാതെ വന്നതോടെയാണ് കവർച്ച നടന്നതാണെന്ന് ഉറപ്പിക്കുകയും പോലീസിനെ സമീപിക്കുകയും ചെയ്തത്. കൊട്ടാരത്തിനുള്ളിൽ വെച്ച് തന്നെയാകാം മോഷണം നടന്നതെന്നാണ് പ്രാഥമിക നിഗമനം. വിലപിടിപ്പുള്ള ആഭരണങ്ങൾ സൂക്ഷിച്ചിരുന്ന അലമാരയിൽ നിന്ന് കൃത്യമായി ഇവ മാത്രം നഷ്ടപ്പെട്ടത് ആസൂത്രിതമായ നീക്കമാണെന്ന് സംശയിക്കപ്പെടുന്നു.

സംഭവത്തിൽ പേരൂർക്കട പോലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചു. കൊട്ടാരത്തിലെ ജീവനക്കാരെയും സ്ഥിരമായി അവിടെ വന്നുപോകുന്നവരേയും കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. അതീവ സുരക്ഷാ മേഖലയായ കൊട്ടാരത്തിനകത്ത് നടന്ന ഈ വൻ കവർച്ച പോലീസിനും വലിയ വെല്ലുവിളിയാണ് ഉയർത്തുന്നത്.