മുജാഹിദ് പ്രസ്ഥാനങ്ങളുടെ ഐക്യവേദിയായി വളപുരം ഫാത്തിമ മസ്ജിദ് ഉദ്ഘാടനം; നേതാക്കളുടെ അപൂർവ്വ സംഗമം

സംസ്ഥാനത്തെ വിവിധ മുജാഹിദ് സംഘടനകൾ തമ്മിലുള്ള ഭിന്നതകളും തർക്കങ്ങളും തുടരുന്നതിനിടയിൽ, നേതാക്കളുടെ അപൂർവ്വ സംഗമത്തിന് വേദിയായി മലപ്പുറം വളപുരത്തെ ഫാത്തിമ മസ്ജിദ് ഉദ്ഘാടന ചടങ്ങ്. കെ.എൻ.എം, മർക്കസുദ്ദാവ, വിസ്ഡം ഓർഗനൈസേഷൻ തുടങ്ങിയ പ്രമുഖ മുജാഹിദ് വിഭാഗങ്ങളുടെ സംസ്ഥാന നേതാക്കൾ ഒരേ വേദിയിൽ അണിനിരന്നത് പ്രവർത്തകർക്കിടയിൽ ശ്രദ്ധേയമായി. വിങ്‌സ് ചാരിറ്റബിൾ ട്രസ്റ്റിന്റെ നേതൃത്വത്തിൽ മസ്ജിദ് കേന്ദ്രീകരിച്ച് നടത്തുന്ന റിലീഫ് പ്രവർത്തനങ്ങളുടെ ഉദ്ഘാടനത്തിന്റെ ഭാഗമായാണ് ഈ ഐക്യസംഗമം നടന്നത്.

പിളർപ്പിന് ശേഷം മുജാഹിദ് വിഭാഗങ്ങൾക്കിടയിൽ ഇത്തരമൊരു ഒത്തുചേരൽ ഉണ്ടാകുന്നത് ഏറെ കാലത്തിന് ശേഷമാണ്. കെ.എൻ.എം സംസ്ഥാന വൈസ് പ്രസിഡന്റ് ഡോക്ടർ ഹുസൈൻ മടവൂർ, മർക്കസുദ്ദാവ സംസ്ഥാന പ്രസിഡന്റ് സി.പി. ഉമർ സുലമി, വിസ്ഡം ഓർഗനൈസേഷൻ സംസ്ഥാന വൈസ് പ്രസിഡന്റ് കുഞ്ഞുമുഹമ്മദ് മദനി പറപ്പൂർ തുടങ്ങിയവർ ചടങ്ങിൽ ഒന്നിച്ച് പങ്കെടുത്തു. ആശയപരമായ വിയോജിപ്പുകൾ നിലനിൽക്കുമ്പോൾ തന്നെ, യോജിക്കാവുന്ന മേഖലകളിൽ ഒന്നിച്ച് പ്രവർത്തിക്കാനുള്ള സന്ദർഭം എന്ന നിലയിൽ ഇത് ശ്ലാഘനീയമാണെന്ന് നേതാക്കൾ അഭിപ്രായപ്പെട്ടു.

മസ്ജിദ് ഉദ്ഘാടനത്തോടൊപ്പം വിവിധ ജീവകാരുണ്യ പ്രവർത്തനങ്ങൾക്കും വേദിയിൽ തുടക്കമിട്ടു. പള്ളി കേന്ദ്രീകരിച്ച് വിപുലമായ റിലീഫ് പ്രവർത്തനങ്ങളാണ് വിങ്‌സ് ചാരിറ്റബിൾ ട്രസ്റ്റ് വിഭാവനം ചെയ്യുന്നത്. മതരംഗത്തെ നേതാക്കൾക്ക് പുറമെ രാഷ്ട്രീയ രംഗത്തെ പ്രമുഖരും ചടങ്ങിൽ സാന്നിധ്യമറിയിച്ചു. പി.വി. അബ്ദുൽ വഹാബ് എം.പി, നജീബ് കാന്തപുരം എം.എൽ.എ എന്നിവർ ചടങ്ങിൽ സംബന്ധിച്ചു.

മുജാഹിദ് പ്രസ്ഥാനങ്ങൾക്കിടയിലെ ഐക്യശ്രമങ്ങൾക്ക് ഈ വേദി കരുത്തുപകരുമെന്നാണ് വിലയിരുത്തപ്പെടുന്നത്. രണ്ട് പതിറ്റാണ്ടോളമായി വ്യത്യസ്ത സംഘടനകളായി പ്രവർത്തിക്കുന്നവർ ഒരുമിച്ചെത്തിയത് മത-സാമൂഹിക രംഗങ്ങളിൽ വലിയ ചർച്ചയായിട്ടുണ്ട്. നൂർ മുഹമ്മദ് നൂർഷാ, ഹാരിസ് ബിൻ സലീം തുടങ്ങിയവരും ചടങ്ങിൽ പങ്കെടുത്തു.