പാചകവാതക ബുക്കിങ്ങിന് നിയന്ത്രണം; സിലിണ്ടർ ബുക്ക് ചെയ്യാൻ ഇനി 21 ദിവസത്തെ ഇടവേള

 രാജ്യത്ത് പാചകവാതക വില വർധനവിന് പിന്നാലെ സിലിണ്ടർ ബുക്കിങ്ങിന് കേന്ദ്ര സർക്കാർ കർശന നിയന്ത്രണം ഏർപ്പെടുത്തി. പുതിയ ഉത്തരവ് പ്രകാരം, ഒരു സിലിണ്ടർ മാത്രമുള്ള ഉപഭോക്താക്കൾക്ക് ഇനിമുതൽ 21 ദിവസത്തിന് ശേഷം മാത്രമേ അടുത്ത ബുക്കിങ് നടത്താൻ സാധിക്കൂ. നിലവിൽ ഇത് 17 ദിവസമായിരുന്നു. അതേസമയം, രണ്ട് സിലിണ്ടറുകൾ കൈവശമുള്ളവർക്ക് അടുത്ത റീഫില്ലിനായി 30 ദിവസത്തെ ഇടവേള നിർബന്ധമാക്കിയിട്ടുണ്ട്.

പശ്ചിമേഷ്യയിൽ നിലനിൽക്കുന്ന യുദ്ധസാഹചര്യങ്ങളെത്തുടർന്നുണ്ടായ ഊർജ്ജ പ്രതിസന്ധിയാണ് നിയന്ത്രണങ്ങളിലേക്ക് നയിച്ചത്. കടൽമാർഗമുള്ള കപ്പൽ സർവീസുകൾ കുറഞ്ഞത് ആഗോള ഊർജ്ജ വിതരണ ശൃംഖലയെ ബാധിച്ചതോടെ രാജ്യത്ത് പാചകവാതക ക്ഷാമം അനുഭവപ്പെട്ടു തുടങ്ങിയിട്ടുണ്ട്. ഈ സാഹചര്യത്തിൽ സിലിണ്ടർ വിതരണം പരിമിതപ്പെടുത്താൻ കേന്ദ്ര സർക്കാർ ഗ്യാസ് ഏജൻസികൾക്ക് പ്രത്യേക നിർദ്ദേശം നൽകി.

ബുക്കിങ് നിയന്ത്രണത്തിന് പിന്നാലെ പാചകവാതക വിലയിലും വലിയ വർധനവുണ്ടായി. ഗാർഹിക ആവശ്യത്തിനുള്ള 14.2 കിലോ സിലിണ്ടറിന് 60 രൂപയാണ് ഇന്ന് വർധിപ്പിച്ചത്. ഇതോടെ ഡൽഹിയിൽ ഒരു സിലിണ്ടറിന്റെ വില 913 രൂപയായി ഉയർന്നു. വിപണിയിൽ സാധാരണക്കാർക്ക് വലിയ സാമ്പത്തിക ബാധ്യത വരുത്തുന്നതാണ് ഈ തീരുമാനം.

വാണിജ്യ ആവശ്യത്തിനുള്ള ഗ്യാസ് സിലിണ്ടറുകൾക്കും വില കൂട്ടിയിട്ടുണ്ട്. 19 കിലോയുടെ വാണിജ്യ സിലിണ്ടറിന് 115 രൂപയാണ് വർധിപ്പിച്ചത്. ഇതോടെ ഡൽഹിയിൽ ഇതിന്റെ വില 1883 രൂപയായി. വാണിജ്യ സിലിണ്ടറുകളുടെ വില ഉയർന്നത് ഹോട്ടൽ മേഖലയ്ക്കും ചെറുകിട വ്യവസായ സംരംഭകർക്കും കനത്ത തിരിച്ചടിയാകുമെന്നാണ് വിലയിരുത്തപ്പെടുന്നത്. ഇത് ഭക്ഷണ സാധനങ്ങളുടെ വിലക്കയറ്റത്തിനും കാരണമായേക്കാം.

പശ്ചിമേഷ്യയിലെ സംഘർഷം ക്രൂഡ് ഓയിൽ വിലയെയും ഊർജ്ജ ഇറക്കുമതിയെയും ബാധിച്ചതാണ് വില വർധനവിന് കാരണമായി എണ്ണക്കമ്പനികൾ ചൂണ്ടിക്കാട്ടുന്നത്. എന്നാൽ ഇറാൻ-ഇസ്രായേൽ സംഘർഷത്തിന്റെ മറവിൽ എണ്ണക്കമ്പനികൾക്ക് അമിത ലാഭമുണ്ടാക്കാൻ കേന്ദ്ര സർക്കാർ സൗകര്യമൊരുക്കുന്നു എന്ന തരത്തിലുള്ള രൂക്ഷമായ വിമർശനങ്ങളും വിവിധ കോണുകളിൽ നിന്ന് ഉയർന്നു തുടങ്ങിയിട്ടുണ്ട്.