പറവൂരില്‍ എല്‍ഡിഎഫ് വിമത സ്ഥാനാര്‍ത്ഥിയ്ക്ക് കുത്തേറ്റു

എറണാകുളം പറവൂരിൽ തദ്ദേശ തിരഞ്ഞെടുപ്പ് പ്രചാരണത്തിനിടെ സ്ഥാനാർഥിക്ക് കുത്തേറ്റു. ചേന്ദമംഗലം പഞ്ചായത്ത് പത്താം വാർഡിലെ സ്ഥാനാർത്ഥിയായ ഫസൽ റഹ്മാനെയാണ് അക്രമി കുത്തി പരിക്കേൽപ്പിച്ചത്. എൽഡിഎഫ് വിമത സ്ഥാനാർഥിയായാണ് ഫസൽ ഇവിടെ മത്സരിക്കുന്നത്.

സംഭവവുമായി ബന്ധപ്പെട്ട് വടക്കേക്കര സ്വദേശി മനോജ് വലിയപുരക്കലിനെതിരെ ആരോപണം ഉയർന്നിട്ടുണ്ട്. യൂട്യൂബിൽ വീഡിയോ പോസ്റ്റ് ചെയ്തതുമായി ബന്ധപ്പെട്ടുണ്ടായ തർക്കമാണ് അക്രമത്തിൽ കലാശിച്ചതെന്നാണ് പ്രാഥമിക വിവരം.

മൂന്നാറിൽ സ്ഥാനാർഥിയെ കാട്ടാന ഓടിച്ചു

അതെസമയം മൂന്നാറിൽ പ്രചാരണം കഴിഞ്ഞ് മടങ്ങുകയായിരുന്ന യുഡിഎഫ് സ്ഥാനാർഥിയുടെ വാഹനത്തിന് നേരെ കാട്ടാനയുടെ ആക്രമണമുണ്ടായി. യുഡിഎഫ് സ്ഥാനാർഥി സി. നെൽസൺ സഞ്ചരിച്ച ജീപ്പിന് നേരെയാണ് ഒറ്റക്കൊമ്പൻ പാഞ്ഞടുത്തത്.

ഇന്നലെ രാത്രി നല്ലതണ്ണി കല്ലാറിലായിരുന്നു സംഭവം. അരക്കിലോമീറ്ററോളം ദൂരം ആന വാഹനത്തെ പിന്തുടർന്നു. സ്ഥാനാർഥിയും ഒപ്പമുണ്ടായിരുന്നവരും തലനാരിഴയ്ക്കാണ് രക്ഷപ്പെട്ടത്.