വിരമിക്കൽ പ്രഖ്യാപനം പിൻവലിച്ച് കെ.ടി ജലീൽ, വീണ്ടും മത്സരരംഗത്തേക്ക്

തിരഞ്ഞെടുപ്പ് രാഷ്ട്രീയത്തിൽ നിന്നുള്ള വിരമിക്കൽ പ്രഖ്യാപനം പിൻവലിച്ച് കെ.ടി ജലീൽ എം.എൽ.എ വീണ്ടും നിയമസഭാ തിരഞ്ഞെടുപ്പിൽ മത്സരിക്കാൻ ഒരുങ്ങുന്നതായി സൂചന. വരുന്ന തിരഞ്ഞെടുപ്പിൽ തവനൂർ മണ്ഡലത്തിൽ ഇടതുപക്ഷ സ്ഥാനാർത്ഥിയായി അദ്ദേഹം തന്നെ മത്സരിക്കുമെന്നാണ് റിപ്പോർട്ടുകൾ.

കഴിഞ്ഞ വർഷം ഒക്ടോബർ 2-നാണ് ജലീൽ തിരഞ്ഞെടുപ്പ് രംഗത്തുനിന്ന് വിരമിക്കുന്നതായി പ്രഖ്യാപിച്ചത്. എന്നാൽ, ഒരു വർഷം പിന്നിടുമ്പോൾ പാർട്ടി സമ്മർദ്ദത്തെ തുടർന്ന് അദ്ദേഹം തീരുമാനം മാറ്റുകയാണെന്നാണ് വിവരം. തവനൂർ മണ്ഡലത്തിൽ കെ.ടി ജലീലിന് മാത്രമേ വിജയസാധ്യതയുള്ളൂ എന്ന പാർട്ടി വിലയിരുത്തലാണ് ഈ മാറ്റത്തിന് പിന്നിൽ.

തവനൂർ പൂർണമായും ഒരു ഇടതുപക്ഷ മണ്ഡലമല്ല. യു.ഡി.എഫിൽ നിന്നുൾപ്പെടെ വോട്ടുകൾ സമാഹരിക്കാനുള്ള വ്യക്തിപരമായ കരിസ്മയാണ് ജലീലിന്റെ വിജയത്തിന് പിന്നിലെ പ്രധാന ഘടകം. ഈ സാഹചര്യം മറ്റൊരാൾക്ക് അനുകൂലമായേക്കില്ലെന്ന തിരിച്ചറിവാണ് ജലീലിനെ തന്നെ വീണ്ടും മത്സരിപ്പിക്കാൻ പാർട്ടിയെ പ്രേരിപ്പിക്കുന്നത്.